Ng'alaali Eliphas
Nam Eliphas ne po Teman kong'alaal kalilot: kagimit Job piik che chaang', si koegu lititindap oorekyik iywenatennyi. Yeityo konyo ng'alaalet, kole ma bek piik che tiliil kogeny, ak kaboorunetap kemoi eng' ung'oot ne mwaei kalilot kole ma mi chii ne tiliil eng' taitap Yaindennyi. Ko kabuuset ne tinyei kirwoogutyet eng' oriitnyi.
4 1Kiwolji Eliphas ne po Teman koleenji: 2“Ngot mwaun chii age ng'olyoot kobootok, tos inyalili? Ago ng'oo ne muuchi koteksei ng'alaalet? 3Keero, kiineet piik che chaang', ak kigimit eunek che nyaluli. 4Kigang'ety ng'aleeguk chiito ne terterei, ak kigimit kutung'oik che nyaluli. 5Ago nguno konyoonin, ak inyalili; kotwaak, ak ipotandos. 6Tos ma iywenateng'ung' Kamuktaindet ko kamang'uneng'ung', ak lititindap oorekuk ko lumdaeng'ung'? 7Ibwaat nguno: ng'oo ne ma tinyei tengek ne kagobek? Ano olooto ki king'emak piigap iman? 8Ko uu ye kaager, icheek che ibati yaityet ak koole nyalilda, koges nooto. 9Eng' kabuusetap Kamuktaindet kobek, ak eng' kimnateetap angeennyi kowong'kei. 10Tuleetap ng'etundo, kutitap ng'etundo ne koroom, kelegap ng'etuunyik che meng'ech— kitui. 11Kobek ng'etundo ne kiim amu mararei logeet, ak kigiiyes aaregap ng'etundo ne nyebuito. 12Kinyoonwaa ng'olyoot eng' ung'oot; kinam itinnyu tuugeet ne po niito. 13Eng' kwenutap kabwaatutik che toorei che bunu ng'ang'utik che po kemoi, ye kobutyi piik rwoeet ne oo, 14Konyoonwaa iywei, ak potanet, ak kobotandos kawekyuk tugul. 15Kosiir kabuuset eng' taitnyu; king'eet suumeegap poortanyu. 16Kitonon, ago kinda amuuch anai togeennyi. Ki mi itoondo eng' taitap konyekyuk; ki mi silem, yeityo kaagas kuut: 17‘Tos muuchi chii ne ng'emaksei koyai imanda eng' taitap Kamuktaindet? Tos muuchi chii koek ne tiliil eng' taitap Makednyi? a a v17 Iboorchi Eliphas Kamuktaindet ko uu kirwoogindet ne mi looita ne ma muuchi kotonon chii age tugul ne ng'emaksei eng' taitannyi — niito ko tebeet ne ma muuchi koweegei chorwenik somok, ak kaboorunet ne king'ang'agis kebeberwegap buku che po let kole ma ki ingen Kwandanyo. 18Keero, ma indoi kayaneet eng' otwogikyik, ak kocharunee angeennyi agobo keniisyet; 19ko siirei icheek che menyei kooriik che po ng'ung'unyek, che tinyei lumeiywek eng' temburyek, che kitui ko uu kutit. 20Eng' kwenutap mornet ak koleny kitui; ma kigeer, kobek koigeny. 21Tos ma kityage rogoetap emaisyekwak eng' icheek? Kobek ago ma ki konyoor utaatyet.’” b b v21 Iboorunee rogoetap emait saboondo ko uu emait: ye kiityage rogoet, koluul emait komugul ak kobetyo.