ዘሑልቍ 22 FHB Father's Heart Bible™

22 ¹ደቂ እስራኤል ድማ ተሲኦም፥ ኣብ ጐላጕል ሞኣብ፥ ኣብ ስግር ዮርዳኖስ፥ መንፅር ኢያሪኮ ሰፈሩ። ²ባላቅ ወዲ ሴፎር ከዓ ኵሉ እቲ እስራኤል ንኣሞራውያን ዝገበሮ ረአየ። ³ሞኣብ ነቲ ህዝቢ ብዙሓት ስለ ዝነበሩ የመና ፈርሖ፤ ሞኣብ ከዓ ብደቂ እስራኤል ተሰከፈ። ⁴ሞኣብ ድማ ንሹማግልቲ ምድያም “እዝ ህዝቢ፥ ከምቲ ብዕራይ ሳዕሪ መሮር ዝልሕስ፥ ኣብ ዙርያና ዘሎ ኵሉ ኽልሕሶ እዩ” በሉ። በቲ ጊዜ እቲ ድማ ባላቅ ወዲ ሴፎር ንጉስ ሞኣብ ነበረ።

⁵ናብ በለዓም ወዲ ቢዖር፥ ኣብ ጴቶር፥ ኣብ ጥቓ ሩባ ኤፍራጥስ፥ ኣብ ምድሪ ህዝቡ ናብ ዝነበረ፥ ክፅውዖ ልኡኻት ለኣኸ። ከምዙይ ድማ በለ፦ “እንሆ፥ ሓደ ህዝቢ ኻብ ግብፂ ወፂኡ ኣሎ። እንሆ፥ ገፅ ምድሪ ሸፊኖም፥ ኣብ መንፅረይ ድማ ሰፊሮም ኣለዉ። ⁶ሕዚ ነዓ፥ ካባይ ስለ ዝሕይሉ፥ በይዛኻ ነዝ ህዝቢ እዙይ ርገመለይ። ምናልባሽ ክወቕዖም፥ ካብ ምድሪ ድማ ክሰጎም ይኽእል ይኸውን፤ እቲ ንስኻ እትምርቖ ምሩቕ፥ እቲ እትርግሞ ድማ ርጉም ምዃኑ እፈልጥ እየ እሞ።”

⁷ሹማግልቲ ሞኣብን ሹማግልቲ ምድያምን ድማ፥ ዋጋ ጥንቈላ ሒዞም ተበገሱ፤ ናብ በለዓም በፂሖም ከዓ ዘረባ ባላቅ ነገርዎ።

⁸ንሱ ኸዓ “ኣብዙይ ሎሚ ለይቲ ሕደሩ፤ ከምቲ እግዚኣብሄር ዝዛረበኒ ድማ ቃል ክመልሰልኩም እየ” በሎም። ሹመኛታት ሞኣብ ከዓ ምስ በለዓም ሓደሩ።

⁹ኣቦና ድማ ናብ በለዓም ቀሪቡ “ምሳኻ ዘለዉ እዚኦም ሰባት መን እዮም?” በሎ።

¹⁰በለዓም ድማ ንኣቦና ከምዙይ በሎ፦ “ባላቅ ወዲ ሴፎር፥ ንጉስ ሞኣብ፥ ከምዙይ ኢሉ ቃል ልኢኹለይ፦ ¹¹‘እንሆ፥ እቲ ኻብ ግብፂ ዝወፀ ህዝቢ ንገፅ ምድሪ ሸፊንዎ ኣሎ። ሕዚ ነዓ፥ ርገመለይ፤ ምናልባሽ ክዋግኦም፥ ክሰጎም ድማ ይኽእል ይኸውን’።”

¹²ኣቦና ግና ንበለዓም “ምሳታቶም ኣይትኺድ። እቲ ህዝቢ ምሩቕ እዩ እሞ፥ ኣይትርገሞም” በሎ።

¹³በለዓም ድማ ንግሆ ተሲኡ ንሹመኛታት ባላቅ “እግዚኣብሄር ምሳኻትኩም ክኸይድ ኣብዩኒ እዩ እሞ፥ ናብ ምድሪኹም ተመለሱ” በሎም።

¹⁴ሹመኛታት ሞኣብ ከዓ ተሲኦም፥ ናብ ባላቅ ከይዶም “በለዓም ምሳና ክመፅእ ኣብዩ” በሉ።

¹⁵ባላቅ ድማ ካብቶም ቀዳሞት ዝበዝሑን ዝኸበሩን ካልኦት ሹመኛታት መሊሱ ለኣኸ። ¹⁶ናብ በለዓም መፂኦም ከዓ ከምዙይ በልዎ፦ “ባላቅ ወዲ ሴፎር ከምዙይ ይብል፦ ‘ናባይ ካብ ምምፃእ ዝኽልክለካ ነገር ኣይሃሉ፤ ¹⁷የመና ኸኽብረካ እየ፥ ዝበልካኒ ዅሉ ድማ ክገብር እየ እሞ፤ በይዛኻ ነዓ፥ ነዝ ህዝቢ እዙይ ድማ ርገመለይ’።”

¹⁸በለዓም ድማ ንኣገልገልቲ ባላቅ ከምዙይ ኢሉ መለሰሎም፦ “ባላቅ ብሩርን ወርቅን ዝመልአ ገዛኡ እኳ እንተ ሃበኒ፥ ንእሽቶ ወይ ዓብዪ ነገር ንምግባር፥ ካብ ትእዛዝ እግዚኣብሄር ክሓልፍ ኣይኽእልን እየ። ¹⁹ሕዚ በይዛኻትኩም፥ ንስኻትኩምውን ኣብዙይ ሎሚ ለይቲ ሕደሩ፤ ኣቦና ብዛዕባይ ደጊሙ እንታይ ከም ዝብለኒ ምእንቲ ኽፈልጥ።”

²⁰ኣቦና ድማ ብለይቲ ናብ በለዓም መፂኡ “እዞም ሰባት ክፅውዑኻ ስለ ዝመፁ፥ ተሲእካ ምሳታቶም ኪድ፤ ግና ነቲ ኣነ ዝነግረካ ጥራሕ ደኣ ግበር” በሎ።

²¹በለዓም ድማ ንግሆ ተሲኡ፥ ኣድጉ ፅዒኑ፥ ምስ ሹመኛታት ሞኣብ ከደ።

ኣቦና ብኣድጊ ኣቢሉ ይዛረብ

²²ንሱ ስለ ዝኸደ ግና ቍጥዓ ኣቦና ነደደ፤ መልኣኽ ኣቦና ድማ ንበለዓም ክፃረሮ ኣብ መንገዲ ደው በለ። በለዓም ከዓ ኣብ ኣድጉ ተቐሚጡ፥ ክልተ ኣገልገልቱውን ምስኡ ነበሩ። ²³እታ ኣድጊ ድማ ነቲ ሰይፉ መዚዙ ብኢዱ ሒዙ ኣብ መንገዲ ደው ኢሉ ዘሎ መልኣኽ ኣቦና ረአየት እሞ፥ ካብ መንገዲ ኣግሊሳ ናብ ግራት ኣተወት። በለዓም ከዓ ነታ ኣድጊ ናብ መንገዲ ምእንቲ ኽመልሳ ወቕዓ። ²⁴መልኣኽ ኣቦና ድማ ኣብ መንጎ ኣታኽልቲ ወይኒ፥ ኣብ ፀቢብ መንገዲ፥ ኣብ ክልቲኡ ወገን መናድቕ ኣብ ዘለዎ ደው በለ። ²⁵እታ ኣድጊ ድማ ንመልኣኽ ኣቦና ምስ ረአየት፥ ናብቲ መንደቕ ተፀጊዓ፥ ነእግሪ በለዓም ኣብቲ መንደቕ ኣፀጊዓ ኣቐፀዐቶ፤ ንሱ ድማ መሊሱ ወቕዓ።

²⁶መልኣኽ ኣቦና ድማ ናብ ቅድሚት ሓሊፉ፥ ናብ የማን ወይ ናብ ፀጋም ዝግልሰሉ ቦታ ኣብ ዘይብሉ ፀቢብ ቦታ ደው በለ። ²⁷እታ ኣድጊ ንመልኣኽ ኣቦና ምስ ረአየት፥ ኣብ ትሕቲ በለዓም ፀጥ በለት፤ ቍጥዓ በለዓም ድማ ነደደ፥ በበትሩ ኸዓ ወቕዓ።

²⁸ኣቦና ድማ ኣፍ እታ ኣድጊ ኸፈተ፤ ንሳ ኸዓ ንበለዓም “እዚ ሰለስተ ሻዕ ክትወቕዓኒ፥ እንታይ ገይረልካ?” በለቶ።

²⁹በለዓም ድማ ነታ ኣድጊ “ኣላጊፅክለይ ኢኺ! ኣብ ኢደይ ሰይፊ እንተ ዝህልወኒ ነይሩ፥ ሕዚ ምቐተልኩኺ ነይረ” በላ።

³⁰እታ ኣድጊ ድማ ንበለዓም “ኣነዶ ኣድግኻ ኣይኮንኩን፥ እታ ኻብ ጥንቲ ኽሳዕ ሎሚ እትጋልባ ዝነበርካ? ቅድም ከምዙይ ዝበለ ገይረልካዶ እፈልጥ?” በለቶ። ንሱ ኸዓ “ኣይፋሉን” በለ።

³¹ኣቦና ድማ ኣዒንቲ በለዓም ከፈተ፤ ንሱ ኸዓ ነቲ ዝተመዘዘ ሰይፊ ኣብ ኢዱ ሒዙ ኣብ መንገዲ ደው ኢሉ ዘሎ መልኣኽ ኣቦና ረአዮ እሞ፥ ደኒኑ ብገፁ ተደፍአ።

³²መልኣኽ ኣቦና ድማ “ስለ ምንታይ ንኣድግኻ ሰለስተ ሻዕ ወቐዕካያ? መንገድኻ ኣብ ቅድመይ ዓመፀኛ ስለ ዝኾነ፥ ክፃረረካ ወፂአ መፂአ ኣለኹ። ³³እዛ ኣድጊ ንኣይ ረአየት፥ እዚ ሰለስተ ሻዕ ከዓ ኻባይ ኣግለሰት። ንሳ እንተ ዘይተግልስ ነይራ፥ ንኣኻ ሕዚ ምቐተልኩኻ፥ ንዕኣ ግና ብህይወት ምሓደግኩዋ ነይረ” በሎ።

³⁴በለዓም ድማ ንመልኣኽ ኣቦና “ንስኻ ክትፃረረኒ ኣብ መንገዲ ደው ኢልካ ኸም ዘለኻ ኣይፈለጥኩን እሞ፥ ሓጢአ እየ። ሕዚ እዙይ ኣብ ኣዒንትኻ ዘይጥዑም እንተ ኾይኑ፥ ክምለስ እየ” በሎ።

³⁵መልኣኽ ኣቦና ድማ ንበለዓም “ምስቶም ሰባት ኪድ፤ ግና ነቲ ኣነ ዝነግረካ ጥራሕ ደኣ ተዛረብ” በሎ። በለዓም ከዓ ምስ ሹመኛታት ባላቅ ተጓዕዘ።

³⁶ባላቅ ድማ በለዓም ይመፅእ ከም ዘሎ ምስ ሰምዐ፥ ኣብ ወሰን ኣርኖን ኣብ እትርከብ፥ ኣብ ወሰን ግዝኣት ዘላ ኸተማ ሞኣብ ክቕበሎ ወፀ። ³⁷ባላቅ ድማ ንበለዓም “ክፅውዓካዶ ኣበርቲዐ ኣይለኣኽኩን? ስለ ምንታይ ናባይ ዘይመፃእኻ? ብሓቂ ኸኽብረካዶ ኣይኽእልን እየ?” በሎ።

³⁸በለዓም ድማ ንባላቅ “እንሆ፥ ሕዚ ናባኻ መፂአ ኣለኹ፤ ግና ዝኾነ ነገር ክዛረብ ይኽእልዶ እየ? እቲ እግዚኣብሄር ኣብ ኣፈይ ዝገብሮ ጥራሕ እየ ዝዛረብ” በሎ።

³⁹በለዓም ድማ ምስ ባላቅ ከደ፤ ናብ ቂርያትሑፆት ከዓ መፁ። ⁴⁰ባላቅ ከዓ ኣብዑርን ኣባጊዕን ሰውአ፤ ንበለዓም ከምኡውን ነቶም ምስኡ ዝነበሩ ሹመኛታት ገግደኦም ሰደደሎም። ⁴¹ንግሆ ባላቅ ንበለዓም ሒዙ ናብ ባሞትበዓል ኣደየቦ፤ ካብኡ ድማ ንወሰን እቲ ህዝቢ ጠመተ።