ዘሑልቍ 23 FHB Father's Heart Bible™

23 ¹በለዓም ድማ ንባላቅ ከምዙይ በሎ፦ “ኣብዝ ቦታ ሸውዓተ መሰውኢ ስርሓለይ፤ ሸውዓተ ዝራብዓትን ሸውዓተ ማጓሉን ከዓ ኣብዙይ ኣዳልወለይ”።

²ባላቅ ድማ ከምቲ በለዓም ዝበሎ ገበረ፤ ባላቅን በለዓምን ኣብ ነፍሲ ወከፍ መሰውኢ ሓደ ዝራብዕን ሓደ ማጕላን ሰውኡ። ³በለዓም ድማ ንባላቅ “ኣነ ክሳዕ ዝኸይድ ኣብ ጥቓ ዝቃፀል መስዋእትኻ ደው በል፤ ምናልባሽ እግዚኣብሄር ይራኸበኒ ይኸውን እዩ፤ እቲ ዘርእየኒ ዅሉ ድማ ክነግረካ እየ” በሎ። ሽዑ ናብ ሓደ ባዶ በሪኽ ቦታ ኸደ።

⁴ኣቦና ድማ ንበለዓም ተራኸቦ፤ ንሱ ኸዓ “ሸውዓተ መሰውኢ ኣዳሊአ፤ ኣብ ነፍሲ ወከፍ መሰውኢ ድማ ሓደ ዝራብዕን ሓደ ማጕላን ሰዊአ ኣለኹ” በሎ።

⁵ኣቦና ድማ ንበለዓም ኣብ ኣፉ ቃል ኣንበረሉ፤ “ተመሊስካ ናብ ባላቅ ከይድካ ከምዙይ በል” በሎ።

⁶ናብ ባላቅ ድማ ተመለሰ፤ እንሆ ባላቅ ምስ ኵሎም መሳፍንቲ ሞኣብ ኣብ ጥቓ ዝቃፀል መስዋእቱ ደው ኢሉ ነበረ። ⁷ምስላኡ ኽምስል ጀመረ፤ ከምዙይ ድማ በለ፦ “ባላቅ ካብ ኣራም ኣምፅአኒ፤ ንጉስ ሞኣብ ካብ እምባታት ምብራቕ፦ ንዓ፥ ንያእቆብ ርገመለይ፤ ንዓ፥ ንእስራኤል ፅረፎ። ⁸ነቶም ኣቦና ዘይረገሞም ከመይ ጌረ ክረግሞም እኽእል? ነቶም ኣቦና ዘይፀረፎም ከመይ ጌረ ክፅረፎም እኽእል? ⁹ካብ ርእሲ እቶም ኣኻውሕ እርእዮም ኣለኹ፤ ካብቲ ኰረብታታት ድማ እጥምቶም ኣለኹ፤ በይኑ ዝነብር ህዝቢ፥ ኣብ ማእኸል ኣህዛብ ዘይቍፀር። ¹⁰ንሓመድ ያእቆብ ዝቘፅሮ፥ ወይ ርብዒ እስራኤል ዝፅብፅብ መን እዩ? ከምቶም ቅኑዓት ዝሞቱ ክመውት፥ መወዳእታይ ድማ ከምቲ ናታቶም ይኹን!”

¹¹ባላቅ ድማ ንበለዓም “እንታይ ዲኻ ጌርካኒ? ፀላእተይ ክትረግመለይ ኢለ ኣምፂአካ፤ እንሆ ግና ባሪኽካዮም ጥራሕ!” በሎ።

¹²ንሱ ኸዓ “ነቲ እግዚኣብሄር ኣብ ኣፈይ ዘንብሮ ኽዛረብ ክጥንቀቕ ኣይግባእንዶ?” ኢሉ መለሰ።

ቃል ኣቦና ይፀንዕ

¹³ሽዑ ባላቅ “በጃኻ ናብ ካልእ ካብኡ ኽትርእዮም እትኽእል ቦታ ምሳይ ንዓ፤ ወሰኖም ጥራሕ ክትርኢ ኢኻ እምበር፥ ኵሎም ኣይክትርእን ኢኻ፤ ካብኡ ኸዓ ርገመለይ” በለ።

¹⁴ናብ ግራት ሶፊም፥ ናብ ርእሲ ፈስጋ ወሰዶ፤ ሸውዓተ መሰውኢ ሰሪሑ ድማ ኣብ ነፍሲ ወከፍ መሰውኢ ሓደ ዝራብዕን ሓደ ማጕላን ሰወአ። ¹⁵በለዓም ድማ ንባላቅ “ኣነ ኣብኡ ክሳዕ ዝራኸብ፥ ኣብዙይ ኣብ ጥቓ ዝቃፀል መስዋእትኻ ደው በል” በሎ።

¹⁶ኣቦና ድማ ንበለዓም ተራኸቦ፤ ኣብ ኣፉ ቃል ኣንበረ፤ “ናብ ባላቅ ተመሊስካ ድማ ከምዙይ በል” በሎ።

¹⁷ናብኡ ድማ መፀ፤ እንሆ ንሱ ምስ መሳፍንቲ ሞኣብ ኣብ ጥቓ ዝቃፀል መስዋእቱ ደው ኢሉ ነበረ። ባላቅ ከዓ “እግዚኣብሄር እንታይ ተዛሪቡ?” በሎ።

¹⁸ምስላኡ ኸዓ ኽምስል ጀመረ፦ “ኦ ባላቅ፥ ተንስእ ስማዕ፤ ኦ ወዲ ሴፎር፥ ኣፅምኣለይ፦ ¹⁹ኣቦና ኽሕሱ ሰብ ኣይኮነን፤ ኽናሳሕ ድማ ወዲ ሰብ ኣይኮነን። ተዛሪቡ ዘይገብሮ ነገር ኣሎዶ? ተዛሪቡ ዘይፍፅሞ ነገር ኣሎዶ? ²⁰እንሆ፥ ክባርኽ ትእዛዝ ተቐቢለ ኣለኹ፤ ንሱ ባሪኹ እዩ እሞ፥ ኣነ ኽመልሶ ኣይክእልን እየ። ²¹ኣብ ያእቆብ መከራ ኣይረኣየን፤ ኣብ እስራኤልውን ሽግር ኣይረኣየን። ኣቦና ምስኡ እዩ፥ ዓውታ ንጉስ ድማ ኣብ ማእኸሎም ኣሎ። ^a a v21 ዓውታ ንጉስ፦ ኣምላኽ እስራኤል ከም ንጉስ ኮይኑ ኣብ ልዕሊኦም ይነግስ፥ ድምፂ ዓወቱ ድማ ኣብ ቅድሚኦም ናብ ውግእ ይኸይድ። ²²ኣቦና፥ እቲ ኻብ ግብፂ ዘውፅኦም፥ ከም ኣቕርንቲ ናይ በረኻ ብዕራይ ይኾኖም። ^b b v22 እቲ ናይ በረኻ ብዕራይ ገዚፍ፥ ሕዚ ዝጠፍአ እንስሳ ነበረ፤ ኣቕርንቱ ድማ ተፈጥሮኣዊ ዘይግዛእ ሓይሊ ይምስል ነበረ። ²³ኣብ ልዕሊ ያእቆብ ጥንቆላ የለን፥ ኣብ ልዕሊ እስራኤልውን ጥንቍልና የለን። ሕዚ ብዛዕባ ያእቆብን ብዛዕባ እስራኤልን ‘እንሆ ኣቦና እንታይ ከም ዝገበረ ርአ!’ ክብሃል እዩ። ²⁴እንሆ፥ ከም ኣንስተይቲ ኣንበሳ ዝትስእ ህዝቢ፥ ከም ኣንበሳ ድማ ዝትንስእ፤ ግዳዩ ክሳዕ ዝበልዕ፥ ደም ቅቱላት ከዓ ክሳዕ ዝሰትዮ ኣይድቅስን እዩ።”

²⁵ባላቅ ድማ ንበለዓም “ፈፂምካ ኣይትርገሞም፤ ፈፂምካ ድማ ኣይትባርኾም!” በሎ።

²⁶በለዓም ግና ንባላቅ “እቲ እግዚኣብሄር ዝብሎ ዅሉ ኽገብር ከም ዘለኒ ኣይነገርኩኻንዶ?” ኢሉ መለሰሉ።

²⁷ባላቅ ድማ ንበለዓም “ንዓ፥ ናብ ካልእ ቦታ ክወስደካ፤ ምናልባሽ እግዚኣብሄር ካብኡ ኽትረግመለይ ይፈቕደልካ ይኸውን እዩ” በሎ።

²⁸ስለዙይ ባላቅ ንበለዓም ናብ ርእሲ ፌጎር፥ ናብቲ ናብ በረኻ ዝርኢ ወሰዶ። ²⁹በለዓም ድማ ንባላቅ ከምዙይ በሎ፦ “ኣብዝ ቦታ ሸውዓተ መሰውኢ ስርሓለይ፤ ሸውዓተ ዝራብዓትን ሸውዓተ ማጓሉን ከዓ ኣብዙይ ኣዳልወለይ”።

³⁰ባላቅ ድማ ከምቲ በለዓም ዝበሎ ገበረ፤ ኣብ ነፍሲ ወከፍ መሰውኢ ድማ ሓደ ዝራብዕን ሓደ ማጕላን ሰወአ።