Balakei khükku uokla lambü to Bouei haükuda
Balakei lemshang nyet penyi lamto kümbei hoba haükubü penyi lamto hapbei. Balaameibü jongaibü kho ho ki: seneibü Bou kho müt che aki, khoei haoei helele ayingsi jembü sembung jeileilabü; haoei haükubü kho sunglangla akümbo, choba shongh ajanjan thüka kho kümla kangalaje tokei.
23 1Balaamei Balak to laukei, “Hanei kü shanga lemshang nyet kümashi, hanei kü shanga masu pongsu nyet hoba sanlon paang nyet lamleashi.”
2Balakei Balaam lenbü tegü kümbei; Balak si Balaamei lemshang weko thüka masu pongsu che hoba sanlon paang che lembü kukei. 3Balaamei Balak to laukei, “Ngo haujinei nyi kaibü juokbü lembü junga loashi; aingenyu Mühghaüei kü to haüyolabü, hoba haoei kü la ai lenlaje kho ngei ka to lenlabü.” Kheijinei haoei shongh khüto haukei.
4Bouei Balaam to haüyokei, hoba haoei hao to laukei, “Ngei lemshang nyet kümbüa, hoba lemshang weko thüka masu pongsu che hoba sanlon paang che lembü kua.”
5Bouei Balaameibü sembunga ngüh che jinkukei: “Balak jungto sepeinyu ngaian hai lenashi.”
6Haoei Balak jungto sepeinyu ngaikei; chühashi, Balak Moabbü leiyeibü shuong pendou yoa haoeibü juokbü lembü junga loan kikei. 7Haoei haoeibü ngühphatbü sungbaan laukei: “Balakei, Moabbü Chobaei, chaang aenei kibü shongh ka, ngo Aram ka leian loukei: Kaiya, Jakob to kü shanga khükku uokkuashi; kaiya, Israel to khüktuokkuashi. 8Bouei khükbüuokbü akibü shuong to ngei lai küman khükku uokla? Bouei khükbüokbü akibü shuong to ngei lai küman khüklauokla? 9Laang thüka ka ngei haoen to hapda, shongh ka ngei haoen to chühda: haoen alongei kibü mütshuong che, jembü phang shuong yoa haoen lolo aweanjinda. 10Aoei Jakobeibü thamngu wean chühla? Ayingsi Israel leiboubü phejan che wean chühla? Maang tangbü shuong hailabü tegü ngo haiyingkei, hoba kü thon kho haoeneibü tegü yingshi!”
11Balakei Balaam to laukei, “Nyi kü to ai kümbei? Ngei no kü dangbou khüklauokla shanga ngakei, hoba chühashi, nyi haoen haükubü ong kümbei!”
12Haoei jongaikei, “Mühghaüei kü sembunga jinkubü ngüh kho lenla ngei amaangsang lo?”
Boueibü Ngüh kaangko kida
13Kheijinei Balakei laukei, “Sanoudambo kü yoa nyi haoen hapla thükbü lubü kaoen to louashi; nyi haoeneibü thonbü ong haplabü, pendou ahaplabü, hoba khüka ka kü shanga haoen to khükku uokkuashi.”
14Haoei hao Zofbü jih to, Pisga shonghkhu to leian haukei, hoba lemshang nyet kümbei, hoba lemshang weko thüka masu pongsu che hoba sanlon paang che lembü kukei. 15Balaamei Balak to laukei, “Ngo khünei hao to haüyola haujinei, hanei kaibü juokbü lembü junga loashi.”
16Bouei Balaam to haüyokei, hoba ngüh che haoeibü sembunga jinkukei, hoba hao to laukei, “Balak jungto sepeinyu ngaian hai lenashi.”
17Haoei hao jungto loukei; chühashi, hao Moabbü leiyeibü shuong yoa haoeibü juokbü lembü junga loan kikei. Balakei hao to laukei, “Mühghaüei ai laukei?”
18Haoei haoeibü ngühphatbü sungbaan laukei, “Pienashi, Balak, hoba ditashi; Zipporeibü shou, kü to ngüha leashi: 19Seneibü Bou kho yepeia lele müt che aying, ayingsi maangpon sepeila lele müteibü shou che aying. Haoei denche lauan kho akümen lo? Haoei ngüh lauan kho ajoukei lo? 20Chühashi, ngei haükula shanga sakkubü lekei. Haoei haükua, hoba ngei kho sepeila athük. 21Haoei Jakob yoa shieikoebü ahabei, ayingsi Israel yoa khonsak ahabei. Seneibü Bou hao yoa kia, hoba Chobaeibü ngekbü haoen yoa kia. a a v21 Chobaeibü ngekbü kho: Israelbü Mühghaüei Choba tegü haoen thüka chobada, hoba haoeibü thükbü shangabü ngek haoen thedanga lason to paida. 22Seneibü Bou, aoei haoen Ijep ka leiyenkei, mühghaü ngoueibü laang tegü haoen la kia. b b v22 Mühghaü ngou kho yaangboutham meisiau che kikei, hoba tou akitei; khoeibü laang shuongei yongbü hoba lamtila athükbü dühkü meitikei. 23Jakob khulimbo khopjikseibü aying, Israel khulimbo seibü yaübü aying. Tou Jakob si Israel shanga hai laulabü, ‘Seneibü Bouei kümbü kho chühashi!’ 24Chühashi, mütshuong che molosaonyu pi tegü pienda, molosaonyu tegü hao lolo meimeida; mei taketbü shongko kho ayeplabü, hoba haitibü shuongeibü sii yunglabü.”
25Balakei Balaam to laukei, “Haoen to limbo akhük auokjan, hoba haoen to limbo ahaükujan!”
26Lausikei Balaamei Balak to jongaikei, “Mühghaüei laubü pendou ngei kümjan dogo ngei ka to alau lo?”
27Balakei Balaam to laukei, “Kaiya, ngei no lepsang at to leibalabü. Aingenyu khonei Mühghaüei no kü shanga haoen to khükku uokla kulabü.”
28Kheijinei Balakei Balaam Peor khua to leibakei, laobou phetsen kaodak to chühan yantida. 29Balaamei Balak to laukei, “Hanei kü la lemshang nyet kümashi, hoba hanei masu pongsu nyet si sanlon paang nyet lamleashi.”
30Balakei Balaam laubü tegü kümbei, hoba lemshang weko thüka masu pongsu che si sanlon paang che lembü kukei.
