Mishān 23

23 ¹Balaamna Balakli hānga, "Hili ili hanphut shini sākhuilu, kala hili ili mukvā shini kala yaovā shini ngarānmilu."

²Balakna Balaamwui tui nganai; Balak kala Balaamna hanphut kachiva̱tungli mukvā akha kala yaovā akha chigata. ³Balaamna Balakli hānga, "Ina vaakha nawui rikkatā kachigat ngalemli nganinglu; kaja Varena ili samphangpai, kala ana ili chitheikhami athishurda ina nali unghāngra." Chieina ana kajui siwuk akhali vai.

⁴Ithumwui Avāna Balaamli samphanga, kala ana ali hānga, "Ina hanphut shini sākhuihaira kala hanphut kachiva̱tungli mukvā akha kala yaovā akha chigata."

⁵Ithumwui Avāna Balaamwui khamorli tui akha sangmilaga hānga, "Balakli latungda hithāda hānglu."

⁶Ana Balakli latunga; apam chili Balakna awui rikkatā kachigat ngalemli Moabwui wungnaobing katonga eina ngasoda nganinga. ⁷Ana awui hāngki kaji hānga: "Moabwui awunga Balakna Aramwui eina, zingshoshong khalei kaphungbing eina ili khuirāmi: Ralu, iwui vang Jacobli khonshimilu; ralu, Israelli yangkharinglu. ⁸Ithumwui Avāna khonshi makahaibingli ina kathāda khonshira? Ithumwui Avāna yangkharing makahaibingli ina kathāda yangkharingra? ⁹Lunghārwui atung eina ina athumli thei, kaphungbing eina ina athumli ngashānkai: kachiphun somkasā mibing, yurbingwui alungli akhalatta mashānkhuia. ¹⁰Jacobwui chifa chi khipāna shānkhuishaprakhala, lah Israelwui khamateli tangdala khipāna shānshaprakhala? Khangarong mibingna thi thāda ina thipairanu, kala iwui khanao chi athumwuina thāda ngasakranu!"

¹¹Balakna Balaamli hānga, "Nana ili khi sāhaokhala? Iwui yangkashebingli khonshi khavai nali hokhui, kha yanglu, nana athumli somimāng sāhaira!"

¹²Ana ngahānkai, "Varena ikhamorli sangkhami chi hāngkhavai ina ningngashar khavai maleimala?"

Ithumwui Avāwui Tui chi Nganingtitna

¹³Chieina Balakna hānga, "Ina nali kapona, ili ngasoda kha̱ khangatei akhali ralu, apam chili nana athumli theira. Nana athum katonga matheimara, athumwui ayār thari maningla theira; kala apam chiwui eina iwui vang athumli khonshimilu."

¹⁴Ana ali Zophimwui luili, Pisgahwui atungli khuivāda, hanphut shini sākhui, kala hanphut kachiva̱tungli mukvā akha kala yaovā akha chigata. ¹⁵Balaamna Balakli hānga, "Ina apam chili ali samphanglakha hili nawui rikkatā kachigat ngalemli nganinglu."

¹⁶Ithumwui Avāna Balaamli samphanga, awui khamorli tui akha sangmilaga hānga, "Balakli latungda hithāda hānglu."

¹⁷Ana awuili rāhaowa; apam chili Balakna awui rikkatā kachigat ngalemli Moabwui wungnaobing eina ngasoda nganinga. Balakna ali hānga, "Varena khi hānghaikhala?"

¹⁸Ana awui khamarān chi khuilaga hānga, "Ngakarthuilu, Balak, kala nganālu; ili nganāmilu, Zipporwui naomayara: ¹⁹Kapik khavai, ithumwui Avā mikumo maningmana; lah ning khangatei khavai, miwui naomayara maningmana. Ana kachikathā hānglaga masāmala? Lah ana matuilaga ungshung masāmala? ²⁰Yanglu, ina somi khavai ningkhami samphanga. Ana somihaira, kha ina chi mayangmimara. ²¹Ana Jacobli kalākashi matheimana, lah Israelli kakhanang matheimana. Ithumwui Avā awuili lei, kala awungawui khamathānkhon athumwui ngachaili lei. ^a a v21 Awungawui khamathānkhon: Israelwui Varena athumwuitungli awunga sāda munga, kala awui huikazakwui khavao rai khavai athumwui mangāli zatna. ²²Athumli Egyptwui eina khuishoka ithumwui Avā chi athumwui vang ramseiwui angaji kathāna. ^b b v22 Ramsei chi reikhamei, ara maleiluimana kahai sāyur akhana; awui angaji na makhangatei pangshap chi chitheina. ²³Jacobli mamayāla laivā maleimana, Israelli mamayāla khanong khayang maleimana. Ara Jacob kala Israelwui pongli hāngra, 'Yanglu, ithumwui Avāna khi sāhaira!' ²⁴Yanglu, miyur akha kazingkha̱ ava̱ thāda ngakarthuida, kazingkha̱ thāda khalatta ngatha̱ ngasaka; sāshai mashairanglakha eina tangda, kala shaothat kahaibingwui ashee mamangranglakha eina tangda a mangayaimara."

²⁵Balakna Balaamli hānga, "Athumli khikhana makhonshipaimara, kala khikhana masomipaimara!"

²⁶Kha Balaamna Balakli ngahānkai, "Varena kahāng saikora ina sāphalungra da ina nali mahāngmala?"

²⁷Balakna Balaamli hānga, "Ralu, ina nali apam khangatei akhali khuivāra. Chithākha chipam eina Varena athumli iwui vang nali khonshi ngasakpai."

²⁸Chieina Balakna Balaamli siwuk yangtāpsangda khalei Peorwui atonli khuivai. ²⁹Balaamna Balakli hānga, "Iwui vang hili hanphut shini sākāmilu, kala mukvā shini kala yaovā shini hili ngarānlu."

³⁰Balakna Balaamna hāngkahai athishurda sāda, hanphut kachiva̱li mukvā akha kala yaovā akha chigata.