Iberuuri Kwanda che machi Balak kochub
Ki teech Balak kapkorosusyek tisap konyil aeng' ak konyoor beruryet konyil aeng'. Ko wolu Balaam kole ma po chii Kwandanyo si koong'oor anan kowal kabwaatennyi; kiy ne kagoberber ma kimuuchi keweeksi, agot ngo tya tuloonook che itestoi laitoryat.
Ng'alaali Kwandanyo eng' mustarisyek 5, 16
23 1Koleenji Balaam Balak, “Itoiywo kapkorosusyek tisap eng' olooni, ak ichobwo kiruugik tisap ak aarek tisap eng' olooni.”
2Ki yai Balak ko uu ye ki le Balaam; kigoito Balak ak Balaam kirgit ak aarwet eng' kapkorosusyek age tugul. 3Koleenji Balaam Balak, “Itonon eng' ole mi kagoochinoiguk che kibeelei ye awendi; abeere kotuiyo Kamuktaindet ak anee, ak amwaun kiy age tugul ne koboorwo.” Yeityo kwo paragutap tulweet ne tegaat.
4Ki tuiyo Kwandanyo Balaam, ak koleenji, “Kaayai kapkorosusyek tisap ak kaagoite kirgit ak aarwet eng' kapkorosusyek age tugul.”
5Ki inde Kwandanyo ng'olyoot eng' kutitap Balaam: “Iweege ole mi Balak ak imwa niito.”
6Ki weege ole mi Balak—ak ogeero, kitononi Balak eng' ole mi kagoochinennyi che kibeelei, kobooto pounik tugul che po Moab. 7Ki getyigei kalewenennyi ak kole: “Kaibwo Balak kobunu Aram, laitoryatap Moab kobunu tuloonoogap kong'asiis: Nyoo, ichubwa Jakobo; nyoo, ileelji Israel. 8Amuuchi ano achub che ma kichub Kwandanyo? Amuuchi ano aleelji che ma kileelji Kwandanyo? 9Ageere kobunu paragutap rwandosyek, kobunu tuloonook ageere icheek: piik che menyei pogei, che ma iityigei among pororyosyek. 10Ng'oo ne imuuchi koit temburyegap Jakobo, anan koit agot ne po ang'wan ne po Israel? Amet ko uu ye meet piik che po iman, ak ingoek letennyu ko uu nenywa!”
11Koleenji Balak Balaam, “Nee ni ka iyachi? Kaibu si ichup punwekyuk, ak ogeero—kaiberuur icheek agenge!”
12Kowolji koleenji, “Tos manyolu ariipkei amwa kiy ne inde Kamuktaindet eng' kutinnyu?”
Kiim ng'olyootap Kwandanyo
13Koleenji Balak, “Nyoo kebwa ak anee komosta age ole imuuchi igeer icheek. Igeere tabandannywa kityo, ma tugul, ak ichubwa eng' olooto.”
14Ki imut ineendet koba mbareetap Zophim, paragutap Piska, ak koyai kapkorosusyek tisap, ak kogoito kirgit ak aarwet eng' age tugul. 15Koleenji Balaam Balak, “Itonon eng' olooni ole mi kagoochinoiguk che kibeelei ye atuiye ak ineendet eng' olooto.”
16Ki tuiyo Kwandanyo Balaam, ak koinde ng'olyoot eng' kutinnyi, ak kole, “Iweege ole mi Balak ak imwa niito.”
17Ki nyoonji ineendet, kotononi Balak eng' ole mi kagoochinennyi che kibeelei, ak kiboto ineendet pounik che po Moab. Koleenji Balak, “Nee ne kimwa Kamuktaindet?”
18Ki getyigei kalewenennyi: “Ing'eet, Balak, ak igas; igasyi anee, weeriitap Sipor: 19Kwandanyo ko ma chiito, si komwa lembech, ak ma weeriitap chii, si kowalak. Tos kimwa kiy age ak koma yai? Tos kinget ng'olyoot ak koma kosulda? 20Ogeero, kanam ng'atuutyet si aberuur. Kagoberuur ineendet, ak mamuuchi awal. 21Ma kigeer yaityet eng' Jakobo, ak ma kigeer pichiindo eng' Israel. Mi Kwandanyo kobooto ineendet, ak mi waachetap Laitoryat eng' kwenunnywa. a a v21 Waachetap Laitoryat: Laitornatei Kamuktaindetap Israel icheek ko uu Laitoryat, ak wendi waachetap saruunennyi taitap icheek kowendi lugeet. 22Kwandanyo, ne ki imutu icheek kobunu Misiri, ko uu nenywa kuinoigap tany ne po timdo. b b v22 Tany ne po timdo ko ki tyony ne oo miising', ne kamemeyo nguno; kutunoikyik ko ki boorunei kimnateet ne oo ne ma imuuchi kinam. 23Ma mi ng'oorset ne agaigai Jakobo, ma mi sageiywek che agaigai Israel. Nguno kimwaei agobo Jakobo ak agobo Israel, ‘Ogeer kiy ne kayai Kwandanyo!’ 24Ogeero, piik che ing'eeti ko uu ng'etundo ne subeendo, che ing'eetyigei ko uu ng'etundo; ma ru agoi koam tyondo ne kaibar, ak koee korotiigap che kagebar.”
25Koleenji Balak Balaam, “Mat ichup icheek agot kityo, ak mat iberuur icheek agot kityo!”
26Ago kowolji Balaam Balak, “Tos maa kamwaun ale anyolu ayai tugul che le Kamuktaindet?”
27Koleenji Balak Balaam, “Nyoo, aibun komosta age. Abeere koyan Kamuktaindet si ichubwa eng' olooto.”
28Ki imut Balak Balaam koba paragutap Peor, ne ing'ururi surkwen. 29Koleenji Balaam Balak, “Itoiywo kapkorosusyek tisap eng' olooni, ak ichobwo kiruugik tisap ak aarek tisap eng' olooni.”
30Ki yai Balak ko uu ye ki le Balaam, ak kogoito kirgit ak aarwet eng' kapkorosusyek age tugul.