ዘኍልቍ 23

23 ¹በለዓም ባላቅን፣ “በዚህ ስፍራ ሰባት መሠዊያዎች ሥራልኝ፤ ሰባት ኮርማዎችና ሰባት አውራ በጎች በዚህ አዘጋጅልኝ” አለው።

²ባላቅም በለዓም እንዳለው አደረገ፤ ባላቅና በለዓምም በእያንዳንዱ መሠዊያ ላይ አንድ ኮርማና አንድ አውራ በግ አቀረቡ። ³በለዓም ባላቅን፣ “እኔ እስክሄድ ድረስ በሚቃጠለው መሥዋዕትህ አጠገብ ቁም፤ ምናልባት እግዚአብሔር ይገናኘኝ ይሆናል፤ የሚያሳየኝንም ሁሉ እነግርሃለሁ” አለው። ከዚያም ወደ ባድማ ኮረብታ ወጣ።

⁴አባታችን በለዓምን ተገናኘው፤ እርሱም፣ “ሰባት መሠዊያዎች አዘጋጅቻለሁ፤ በእያንዳንዱ መሠዊያ ላይም አንድ ኮርማና አንድ አውራ በግ አቅርቤአለሁ” አለው።

⁵አባታችን በበለዓም አፍ ቃል አኖረ፤ “ወደ ባላቅ ተመለስና ይህን ተናገር” አለው።

⁶ወደ ባላቅም ተመለሰ፤ እነሆ፣ ባላቅ ከሞዓብ አለቆች ሁሉ ጋራ በሚቃጠለው መሥዋዕቱ አጠገብ ቆሞ ነበር። ⁷ትንቢቱንም አንሥቶ እንዲህ አለ፤ “ባላቅ ከአራም አመጣኝ፤ የሞዓብ ንጉሥ ከምሥራቅ ተራሮች አስመጣኝ፤ ና፣ ያዕቆብን ርገምልኝ፤ ና፣ እስራኤልን ውቀስልኝ አለኝ። ⁸አባታችን ያልረገማቸውን እንዴት እረግማለሁ? አባታችን ያልወቀሳቸውን እንዴት እወቅሳለሁ? ⁹ከዓለቶች አናት ላይ አያቸዋለሁ፤ ከኮረብቶችም እመለከታቸዋለሁ፤ ለብቻው የሚኖር ሕዝብ ነው፤ ራሱንም ከአሕዛብ መካከል አይቈጥርም። ¹⁰የያዕቆብን ትቢያ ማን ሊቈጥር ይችላል? የእስራኤልንስ ሩብ እንኳ ማን ሊቈጥር ይችላል? እንደ ጻድቃን ሞት ልሙት፤ መጨረሻዬም እንደ እነርሱ ይሁን!”

¹¹ባላቅ በለዓምን፣ “ይህ ያደረግህብኝ ምንድን ነው? ጠላቶቼን እንድትረግም አመጣሁህ፤ አንተ ግን እነሆ፣ ባረክሃቸው እንጂ!” አለው።

¹²እርሱም መልሶ፣ “እግዚአብሔር በአፌ ያኖረውን ለመናገር መጠንቀቅ የለብኝምን?” አለ።

የአባታችን ቃል ጸንቶ ይኖራል

¹³ባላቅም፣ “እባክህ፣ እነርሱን ልታይበት ወደምትችልበት ወደ ሌላ ስፍራ ከእኔ ጋራ ና፤ ዳር ዳራቸውን ብቻ እንጂ ሁሉንም አታይም፤ ከዚያም ሆነህ ርገምልኝ” አለው።

¹⁴እርሱም ወደ ጾፊም ሜዳ፣ ወደ ፈስጋ ተራራ ጫፍ ወሰደው፤ ሰባት መሠዊያዎችም ሠራ፤ በእያንዳንዱ ላይም አንድ ኮርማና አንድ አውራ በግ አቀረበ። ¹⁵በለዓም ባላቅን፣ “እኔ በዚያ እርሱን እስክገናኝ ድረስ በዚህ በሚቃጠለው መሥዋዕትህ አጠገብ ቁም” አለው።

¹⁶አባታችን በለዓምን ተገናኘው፤ በአፉም ቃል አኖረ፤ “ወደ ባላቅ ተመለስና ይህን ተናገር” አለው።

¹⁷ወደ እርሱም መጣ፤ እነሆ፣ ከሞዓብ አለቆች ጋራ በሚቃጠለው መሥዋዕቱ አጠገብ ቆሞ ነበር። ባላቅም፣ “እግዚአብሔር ምን ተናገረ?” አለው።

¹⁸ትንቢቱንም አንሥቶ እንዲህ አለ፤ “ባላቅ ሆይ፣ ተነሥተህ ስማ፤ የሲፖር ልጅ ሆይ፣ አድምጠኝ፤ ¹⁹አባታችን ይዋሽ ዘንድ ሰው አይደለም፤ ሐሳቡንም ይለውጥ ዘንድ የሰው ልጅ አይደለም። ተናግሮ ያላደረገው መቼ አለ? ተናግሮ ያልፈጸመውስ መቼ አለ? ²⁰እነሆ፣ እንድባርክ ትእዛዝ ተቀብያለሁ፤ እርሱም ባርኮአልና እኔ ልሽረው አልችልም። ²¹በያዕቆብ ላይ ክፉ ነገር አላየም፤ በእስራኤልም ላይ መከራ አላየም። አባታችን ከእርሱ ጋራ ነው፤ የንጉሥም እልልታ በመካከላቸው አለ። ^a a v21 የንጉሥ እልልታ፦ የእስራኤል አምላክ እንደ ንጉሥ ሆኖ ይገዛቸዋል፤ የድል ጩኸቱም ወደ ጦርነት ሲገቡ ይቀድማቸዋል። ²²ከግብፅ ያወጣቸው አባታችን፣ ለእነርሱ እንደ ጎሽ ቀንዶች ነው። ^b b v22 ጎሽ ግዙፍ የሆነ፣ አሁን የጠፋ እንስሳ ነበር፤ ቀንዶቹም ያልተገራ ጥሬ ኀይልን ያመለክቱ ነበር። ²³በያዕቆብ ላይ ጥንቆላ የለም፤ በእስራኤልም ላይ ሟርት የለም። አሁንም ስለ ያዕቆብና ስለ እስራኤል፣ ‘አባታችን ያደረገውን ተመልከቱ!’ ተብሎ ይነገራል። ²⁴እነሆ፣ እንደ እንስት አንበሳ የሚነሣ ሕዝብ፤ እንደ አንበሳም ራሱን የሚያነቃቃ፤ ነዋርን እስኪበላና የተገደሉትን ደም እስኪጠጣ ድረስ አይተኛም።”

²⁵ባላቅ በለዓምን፣ “ፈጽመህ አትርገማቸው፤ ፈጽመህም አትባርካቸው!” አለው።

²⁶በለዓም ግን ባላቅን መልሶ፣ “እግዚአብሔር የሚለውን ሁሉ ማድረግ እንዳለብኝ አልነገርሁህምን?” አለው።

²⁷ባላቅ በለዓምን፣ “ና፣ ወደ ሌላ ስፍራ ልውሰድህ፤ ምናልባት እግዚአብሔር ከዚያ ሆነህ እንድትረግምልኝ ይፈቅድልህ ይሆናል” አለው።

²⁸ባላቅም በለዓምን ምድረ በዳውን ወደሚመለከተው ወደ ፌጎር ተራራ ጫፍ ወሰደው። ²⁹በለዓም ባላቅን፣ “በዚህ ስፍራ ሰባት መሠዊያዎች ሥራልኝ፤ ሰባት ኮርማዎችና ሰባት አውራ በጎችም በዚህ አዘጋጅልኝ” አለው።

³⁰ባላቅም በለዓም እንዳለው አደረገ፤ በእያንዳንዱ መሠዊያ ላይም አንድ ኮርማና አንድ አውራ በግ አቀረበ።