Tata wusakumuna mana Balaki kazola bundila
Balaki wátungila mesa ma bimenga tsambwadi mbala zodi amana wátambula disakumunu mbala zodi. Mvutu ya Balami ni Tata wetu kasi mutu ku hanga kavuna, amana kasi mwana wa mutu ku hanga kasoba mabanza mandi; kina kasakumuna kalendaku vutulwa, ata malondi malawu ma kinga kafwani sanda ku manima.
Tata wetu kisi zonza mu mavese 5, 16
23 1Balami wuzimbudi kwena Balaki: «Thungila mesa ma bimenga tsambwadi haha, amana yidikila bangombi tsambwadi yi mikoku mya yakala tsambwadi haha.»
2Balaki wáhanga bwosu Balami kázimbula. Balaki yi Balami bátambika ngombi yi mukoku wa yakala hana kosu mesa ma kimenga. 3Balami wuzimbudi kwena Balaki: «Telama bela-bela yi kimenga kyaku kya kuyoka, meni yikwenda; fwaniku Nzambi kakwisa tundakana yi meni, amana mana moosu kandusongila yikuzimbwala kwaku.» Amana wenda ku londi dya phamba.
4Tata wetu wátundakana yi Balami, amana Balami wumuzimbwadini: «Nyidiki mesa ma bimenga tsambwadi amana ntambika ngombi yi mukoku wa yakala hana kosu mesa ma kimenga.»
5Tata wetu wásya ndinga mu munu wa Balami: «Vutuka kwena Balaki amana zimbula bwabu.»
6Wávutuka kwena Balaki; amana hana Balaki wátelama bela-bela yi kimenga kyandi kya kuyoka, kumosi yi bapfumu boosu ba Mowabi. 7Wátambula ndinga yandi amana wuzimbudi: «Balaki wánthwala tuka ku Alami, kinga kya Mowabi tuka ku myongu mya kutuka kwa tangwa: Wisa, bundila Yakobi; wisa, sema Yisaleli. 8Bweti yilenda bundila bana Tata wetu kabundidiku? Bweti yilenda sema bana Tata wetu kasemiku? 9Tuka ku londi dya matadi mbona bawu, tuka ku myongu mbabatala: kanda dyenina dizingila dyawu kaka, ditangidiku dyawu hakati dya makanda. 10Nani kalenda tanga fusyangeni dya Yakobi? Amana nani kalenda tanga kitini kimosi mu byati biya bya Yisaleli? Yambula yifwa bwosu bisi fwa batu ba masonga, amana tsuka yama yakala bwosu ya bawu!»
11Balaki wuzimbudi kwena Balami: «Biki wámbangila? Yákuthwala ndangu ubundila bambeni bama, amana talandi, wásakumuna kaka bawu!»
12Wávutula: «Nati nfweti keba mu kuzimbula mana Nzambi kasya mu munu wama?»
Ndinga ya Tata wetu yizyama ngolu
13Amana Balaki wuzimbudi kwena Balami: «Wisa yi meni ku kuma kwahika, kuna walenda kubamona. Ukamona kaka nzenzi ya bawu, kasi bawu boosu ku; amana ubundila bawu tuka kwakuna.»
14Wámunata ku kilanga kya Sofimi, ku londi dya Phisiga, wátunga mesa ma bimenga tsambwadi amana wátambika ngombi yi mukoku wa yakala hana kosu mesa ma kimenga. 15Balami wuzimbudi kwena Balaki: «Telama haha bela-bela yi kimenga kyaku kya kuyoka, meni yikwenda kutundakana yi yandi kwakuna.»
16Tata wetu wátundakana yi Balami, wásya ndinga mu munu wandi amana wuzimbudi: «Vutuka kwena Balaki amana zimbula bwabu.»
17Wisa kwena yandi; hana Balaki wátelama bela-bela yi kimenga kyandi kya kuyoka, kumosi yi bapfumu ba Mowabi. Balaki wumuzimbwadini: «Biki Nzambi kázimbula?»
18Wátambula ndinga yandi: «Telama, Balaki, amana yuka; ungwa, mwana wa Sipoli: 19Tata wetu kenina mutu ku, ndangu kahuna; kenina mwana wa mutu ku, ndangu kabalumuna mabanza mandi. Nati wázimbula dyambu amana kadihangaku? Nati wázonza amana kadilungisaku? 20Talandi, ntambula lutumu lwa kusakumuna. Wásakumuna kedi, amana yiléndaku kudisobula. 21Kámonaku mambi mu Yakobi, kámonaku phi biwayi mu Yisaleli. Tata wetu kenina yi yandi, amana kindanda kya kinga kyenina hakati dya bawu. a a v21 Kindanda kya kinga: Nzambi wa Yisaleli kayala bawu hanga kinga, amana kindanda kyandi kya ndungunu kikwenda ku thwala ya bawu mu mvita. 22Tata wetu, wuna wábalubula mu Ngiphiti, kenina kwena bawu bwosu mahembu ma ngombi ya mu tseki. b b v22 Ngombi ya mu tseki yákala mbisi yimbuta, yina buthwena yimanisi fwa; mahembu mandi másongila ngolu yingolu-ngolu yina yiléndakaniku kulembikwa. 23Kweku kiloki kwena Yakobi, kweku mbikutulu kwena Yisaleli. Buthwena bakázimbula kikuma kya Yakobi yi kya Yisaleli: “Talenu mana Tata wetu káhanga!” 24Talandi, kanda ditelama bwosu nkosi ya nkhetu, disikama bwosu nkosi; dikálekaku tii yikuna dyadya mbisi yina dyákwata amana dinwa menga ma bafwa.»
25Balaki wuzimbudi kwena Balami: «Kubundilaku bawu luhati, amana kubasakumunaku phi!»
26Kaasi Balami wávutula kwena Balaki: «Nati yákuzimbula ni mfweti hanga mana moosu Nzambi kazimbula?»
27Balaki wuzimbudi kwena Balami: «Wisa, yakunata ku kuma kwahika. Fwaniku Nzambi kakúhana muswa wa kubundila bawu tuka kwakuna.»
28Buna Balaki wánata Balami ku londi dya Pewoli, kuna kutala tsi ya nganga. 29Balami wuzimbudi kwena Balaki: «Thungila mesa ma bimenga tsambwadi haha, amana yidikila bangombi tsambwadi yi mikoku mya yakala tsambwadi haha.»
30Balaki wáhanga bwosu Balami kázimbula, amana wátambika ngombi yi mukoku wa yakala hana kosu mesa ma kimenga.
