እስራኤል ይጠርዕ ኣቦናውን ይምልስ

በቲ መንገዲ ተፀሊኦም፥ እቶም ህዝቢ ኣብ ልዕሊ ኣቦኦምን ኣብ ልዕሊ ሙሴን ተዛረቡ እሞ ብኣትማን ተነኸሱ፤ እቲ ፈውሲ ኸዓ ንኽጥምትዎ ኣብ ዓሞድ ዝተሰቕለ ናይ ነሃስ ተመን እዩ። ሽዑ ኣብ ዔላ መዝሙር፥ ኣብ ልዕሊ ሲሆንን ዖግን ከዓ ዓወት መፀ።

ምዕራፍ 21።

እቲ ኣብ ነጌብ ዝነብር ከነዓናዊ ንጉስ ዓራድ፥ እስራኤል ብመንገዲ ኣታሪም ይመፅእ ከም ዘሎ ምስ ሰምዐ፥ ንእስራኤል ተዋግኦ፤ ገሊኡ ድማ ማረኸ። እስራኤል ድማ ንኣቦና ከምዙይ ኢሉ መብፅዓ ተማባፅዐ፦ “ነዝ ህዝቢ እዙይ ብሓቂ ኣብ ኢደይ እንተ ሃብካኒ፥ ንኸተማታቶም ፈፂመ ከጥፍአን እየ።” ኣቦና ድማ ድምፂ እስራኤል ሰሚዑ ንከነዓናውያን ኣሕሊፉ ሃቦም፤ ንሳቶም ከዓ ንእኣቶምን ንከተማታቶምን ፈፂሞም ኣጥፍእዎም። ስለዙይ እቲ ቦታ ሔርማ ተብሃለ።

ናይ ነሃስ ተመን

ካብ እምባ ሆር ተልዒሎም ድማ፥ ንምድሪ ኤዶም ኽዞርዋ ብመንገዲ ቀይሕ ባሕሪ ተጕዓዙ፤ ነፍሲ እቲ ህዝቢ ግና በቲ መንገዲ ጐደለት። እቲ ህዝቢ ድማ ኣብ ልዕሊ ኣቦናን ኣብ ልዕሊ ሙሴን ከምዙይ ኢሉ ተዛረበ፦ “ኣብ ምድረ በዳ ክንመውት ስለምንታይ ካብ ግብፂ ኣውፃእኩምና? እንጀራ የለን፥ ማይ የለን፥ ነዝ ሕሱር ምግቢ እዙይ ከዓ ፀላእናዮ።”

ሽዑ ኣቦና ኣብ ማእኸል እቲ ህዝቢ ዘቃፅሉ ኣትማን ለኣኸ፤ ንህዝቢ ኸዓ ነኸስዎም፤ ብዙሓት ካብ እስራኤል ድማ ሞቱ። እቲ ህዝቢ ድማ ናብ ሙሴ መፂኦም፦ “ኣብ ልዕሊ ኣቦናን ኣብ ልዕሌኻን ብምዝራብና ሓጢኣት ጌርና ኢና። ነቶም ኣትማን ካባና ምእንቲ ከርሕቕ ናብኡ ፀሊ” በልዎ። ሙሴ ድማ ምእንቲ እቲ ህዝቢ ፀለየ።

ኣቦና ድማ ንሙሴ፦ “ዘቃፅል ተመን ስራሕ፤ ኣብ ዓሞድ ከዓ ግበሮ፤ እቲ ዝተነኽሰ ዅሉ ናብኡ እንተ ጠመተ ብህይወት ክነብር እዩ” በሎ።

ሙሴ ድማ ናይ ነሃስ ተመን ገይሩ ኣብ ዓሞድ ገበሮ፤ ተመን ንሓደ ሰብ እንተ ነኸሶ ኸዓ፥ ናብቲ ናይ ነሃስ ተመን ጠሚቱ ብህይወት ይነብር ነበረ። ^a

እቲ ናብ ሞኣብ ዝኾነ ጉዕዞ

ደቂ እስራኤል ድማ ተልዒሎም ኣብ ኦቦት ሰፈሩ። ካብ ኦቦት ተልዒሎም ድማ፥ ኣብ መንፅር ሞኣብ ብወገን ምብራቕ ኣብ ዘላ ምድረ በዳ፥ ኣብ ጋይ ዓባሪም ሰፈሩ። ካብኡ ተልዒሎም ድማ ኣብ ለሰ ዘሬድ ሰፈሩ። ካብኡ ተልዒሎም ድማ ኣብ ማዕዶ ኣርኖን፥ ካብ ወሰን ኣሞራውያን ዝወፀ ምድረ በዳ ሰፈሩ፤ ኣርኖን ደኣ ምስ ኣሞራውያን ዘዋስን ወሰን ሞኣብ እዩ እሞ። ስለዙይ መፅሓፍ ውግኣት ኣቦና ከምዙይ ይብል፦ “ዋሄብ ኣብ ሱፋ፥ ከምኡ ኸዓ ሩባታት ኣርኖን፥ ናብ ቦታ ዓር ዝዘዙር፥ ናብ ወሰን ሞኣብ ከዓ ዝበፅሕ ፀግዒ ሩባታት።”

ካብኡ ድማ ናብ ብኤር ከዱ፤ ንሳ እታ ኣቦና ንሙሴ “ንህዝቢ ኣክቦ፤ ማይ ድማ ክህቦም እየ” ዝበለሉ ዒላ እያ።

ሽዑ እስራኤል እዝ መዝሙር እዙይ ዘመረ፦ “ኦ ዒላ! ፍልፍሊ! ንእኡ ኸዓ ዘምሩሉ! እታ መሳፍንቲ ዝዀዓትዋ ዒላ፥ ክቡራት ህዝቢ ብዘንጊታቶምን ብበትሮምን ዝዀዓትዋ።” ድሕሪኡ ኸዓ ካብ ምድረ በዳ ናብ መታና ኸዱ፥ ካብ መታና ድማ ናብ ናሃልኤል፥ ካብ ናሃልኤል ከዓ ናብ ባሞት፥ ካብ ባሞት ከዓ ናብ እታ ኣብ ጐልጐል ሞኣብ ዘላ ለሰ፥ ናብ ርእሲ ፈስጋ፥ እታ ናብ ምድረ በዳ እትጥምት ከዱ።

ኣቦና ንሴዎን ኣብ ኢዶም ኣሕሊፉ ይህብ

ሽዑ እስራኤል ናብ ሴዎን ንጉስ ኣሞራውያን መልእኽተኛታት ልኢኹ ኸምዙይ በሎ፦ “ብምድርኻ ኣሕልፈኒ። ናብ ግራት ወይ ናብ ቦታ ወይኒ ኣይንግልስን፥ ማይ ዒላ ኸዓ ኣይንሰትን ኢና። ወሰንካ ኽሳዕ እንሓልፍ ብጐደና ንጉስ ኢና እንኸይድ።”

ሴዎን ግና ንእስራኤል ብወሰኑ ኽሓልፉ ኣይፈቐደሎምን። ኵሉ ህዝቡ ኣኪቡ ድማ ናብ ምድረ በዳ ናብ እስራኤል ወፀ፤ ናብ ያሃፅ በፂሑ ኸዓ ምስ እስራኤል ተዋግአ። እስራኤል ድማ ብኣፈ ሴፍ ቀተሎ፤ ምድሩ ኸዓ ካብ ኣርኖን ክሳዕ ያቦቅ፥ ክሳዕ ደቂ ኣሞን ወረሰ፤ ወሰን ደቂ ኣሞን ድማ ፅኑዕ ነበረ። እስራኤል ድማ ንዅለን እዘን ከተማታት እዚኣተን ሓዘ፤ ኣብ ኵለን ከተማታት ኣሞራውያን፥ ኣብ ሓሴቦንን ኣብ ኵለን ኣብ ዙርያኣ ዘለዋ ዓድታትን ተቐመጠ። ሓሴቦን ደኣ ኸተማ ሴዎን ንጉስ ኣሞራውያን ነበረት እሞ፤ ንሱ ነቲ ናይ ቀደም ንጉስ ሞኣብ ተዋጊኡ፥ ኵላ ምድሩ ኽሳዕ ኣርኖን ካብ ኢዱ ወሲዱ ነበረ። ስለዙይ እቶም ገጠምቲ ኸምዙይ ይብሉ፦ “ናብ ሓሴቦን ንዑ፤ ክትህነፅ፥ ከተማ ሴዎን ክትቐውም እያ። ካብ ሓሴቦን ሓዊ ወፀ እሞ፥ ካብ ከተማ ሴዎን ከዓ ሃልሃልታ ወፀ፤ ንዓር ሞኣብ፥ ንጐይቶት እምባታት ኣርኖን በልዐቶ። ኦ ሞኣብ! ወይለኻ! ኣታ ህዝቢ ካሞሽ! ጠፋእካ! ነወዱ ህዱማት፥ ነዋልዱ ኸዓ ንሴዎን ንጉስ ኣሞራውያን ምሩኻት ገበሮም። ንሕና ግና ወቓዕናዮም፤ ሓሴቦን ክሳዕ ዲቦን ጠፍአት። ክሳዕ ኖፋሕ ኣባደምና፥ ንሳ ኽሳዕ ሜድባ ትበፅሕ።”

ከምዙይ ድማ እስራኤል ኣብ ምድሪ ኣሞራውያን ተቐመጠ። ሙሴ ድማ ንኢያዜር ዝስልዩ ሰባት ለኣኸ፤ ንሳቶም ከዓ ንዓድታታ ሓዙ፤ ነቶም ኣብኡ ዝነበሩ ኣሞራውያን ድማ ሰጐግዎም። ሽዑ ተመሊሶም ብመንገዲ ባሳን ደየቡ፤ ንጉስ ባሳን ዓግ ድማ ኣብ ኤድሬዒ ኽዋግኦም ምስ ኵሉ ህዝቡ ናባታቶም ወፀ።

ኣቦና ግና ንሙሴ፦ “ኣይትፍርሃዮ፤ ንእኡን ንዅሉ ህዝቡን ንምድሩን ኣብ ኢድካ ሃብክዎ እየ እሞ። ነቲ ኣብ ሓሴቦን ዝነብር ዝነበረ ሴዎን ንጉስ ኣሞራውያን ከም ዝገበርካዮ፥ ንእኡ ኸዓ ግበሮ” በሎ።

ንእኡን ንደቁን ንዅሉ ህዝቡን ድማ፥ ሓደ እኳ እንተየትረፉሉ ወቕዕዎም፤ ንምድሩ ኸዓ ወረስዋ።