Mishān 21

21 ¹Negebli somkasāpa Canaannao Aradwui awungana, Israel Atharim shongfali rārāli da pao shālaga, Israelli ngarara, kala kaikhali tukvāhaowa. ²Israelna ithumwui Avāli khangashit akha sāda hānga, "Kachangkhat eina mibing hili nana iwui pāngli horsangmiakha, ina athumwui keinungbing chi saikora sākazammira." ³Ithumwui Avāna Israelwui akhon shālaga Canaannaobingli athumwui pāngli horsangmi; athumna athum eina athumwui keinungbing chi saikora sākazammiserhaowa. Chiwui vang eina apam chiwui aming Hormah hoi.

Pithrai Phara̱

⁴Athumna Hor Kaphungwui eina Edom ngaleili kuikhui khavai Red Sea shongfa zatphoka; kha shongfali mibing maja̱mirarthuwa. ⁵Mibingna ithumwui Avā eina Mosesli mangakaida hānga, "Khisāda nana ithumli Egyptwui eina thānshokta lamhāngli thikhavai kasāla? Kashakazā malei, tara̱la malei, kala kayākha kashakazā hiwui vang eina ithum ning thenghaira."

⁶Chieina ithumwui Avāna mibingwui alungli hu kaphunga phara̱bing chihovāda phara̱bingna mibingli mara̱ya, kala Israelwui mi kachungkha thihaowa. ⁷Mibingna Mosesli latungda hānga, "Ithumwui Avā eina nali mangakaida hānglaga ithumna morei sāhaira. Phara̱bing chi ithumwui eina thahaimi khavai ali seihā sālu." Chieina Mosesna mibingwui vang seihā sai.

⁸Ithumwui Avāna Mosesli hānga, "Hu kaphunga phara̱ akha sākhuilu, chi akomli shulu; kachikathā mara̱kahai mi china ali yangakha ringra."

⁹Mosesna pithraiwui phara̱ akha sākhuilaga chi akomli shui; phara̱na mi akhali mara̱ tharan, athumna pithrai phara̱li yanglaga ringhaowa. ^a a v9 Jishuna atam hili apāngwui shākhang thāda hāngkhui: pithrai phara̱ chi kajuiya khāngkā ngasakhai thāda kathikasābingna yangda ring khavai, chithāda Anaomayara chila khāngkā ngasakhai, kachikathā shitkasang eina ali yangakha katang makhavai kharing samphangra khavai (John 3:14-15).

Moabshong Shongzā

¹⁰Israelwui mibingna zatphokta Obothli rāmrah vasāpama. ¹¹Kala athumna Obothwui eina zatphokta, Moabli yangkhangasung, zingshoshongwui lamhāngli khalei Iye-abarimli rāmrah vasāpama. ¹²Chiwui eina athumna zatphokta Zered tampākli rāmrah vasāpama. ¹³Chiwui eina athumna zatphokta, Amorwui thari eina thuilaga lamhāngli khalei Arnon lakhavākli rāmrah vasāpama; kaja Arnonna Moab eina Amorwui ngachaili khalei Moabwui tharina. ¹⁴Chiwui vang eina ithumwui Avāwui Raibingwui Lairikna hānga, "Suphahli khalei Waheb, kala Arnonwui kongrābing, ¹⁵kala kongrābingwui kaphung ashong, chi Arwui apam shongfa ngareikhuilaga Moabwui tharili vāshunga."

¹⁶Chiwui eina athumna Beerli vai; ra̱khong chili ithumwui Avāna Mosesli hānga, "Mibingli kazipserlu, ina athumli tara̱ mira."

¹⁷Chieina Israelna hithāda laa sai, "Okshoklu, O ra̱khong! Chili laa sālu! ¹⁸Wungnaobingna kakhon ra̱khong, mibingwui khangamabingna athumwui khānthing kala khāmshui eina kakhon." Chiwui thili lamhāngwui eina athumna Mattanahli vai, ¹⁹Mattanahwui eina Nahalielli, kala Nahalielwui eina Bamothli, ²⁰kala Bamothwui eina Moabwui ngaleili khalei tampākli, siwuk yangtāpsangda khalei Pisgahwui kaphungtonli vai.

Ithumwui Avāna Sihonli Athumwui Pāngli Horsangmi

²¹Chiwui thili Israelna Amorwui awunga Sihonli paomebing chihoda hānga, ²²"Nawui ngalei hi eina ili kakān ngasakmilu. Ithumna luili, lah drakhā yāmguili mangareimara, lah ra̱khongwui tara̱ mamangmara. Nawui thari makānthuiranglakha eina tangda Wungnaowui Shongrei eina zatra."

²³Kha Sihonna awui thari eina Israelli kānngasak khavai mamayāmithuwa. Ana awui mi saikora kazipkhuida Israelli ngasoda lamhāngli vāda Jahazli shangda Israelli rai sai. ²⁴Israelna ali raighai eina sāthata, kala awui ngalei chi Arnon eina thuilaga Jabbok vāshungda, Ammonnaobing eina tangda khuihaowa; kaja Ammonnaobingwui thari raipan sākahaina. ²⁵Israelna hi keinung saikora khuida Amorwui keinung saikorali pamhaowa; Heshbon kala chiwui kuikhamareili khalei kha̱bing saikoralila pamhaowa. ²⁶Kaja Heshbon hi Amorwui awunga Sihonwui keinungna; ana Moabwui kachama awungali rai ngararda, Arnon vāshungda awui ngalei saikora awui eina khuikahaina. ²⁷Chiwui vang laa kakapebingna hānga: "Heshbonli rālu—chi sakāluishitranu, Sihonwui keinung chi hanngasakranu. ²⁸Kaja Heshbonwui eina mei shoka, Sihonwui keinungwui eina meiwon shoka. China Moabwui Arli kala Arnonwui kajuiwui prohobingli chuitahaowa. ²⁹O Moab, nali kakhanang ngasāranu! Na sākhayanghaira, Chemoshwui mibing! Awui naomayarabingli yāmkazatbing sāda, awui naongalāva̱bingli Amorwui awunga Sihonli narkahai sāhaira. ³⁰Kha ithumna athumli sāthata; Heshbon Dibon vāshungda shimānhaira. Medeba tāshungda khalei Nophah vāshungda ithumna ramcho ngasaka."

³¹Chithāda sāda Israelna Amornaobingwui ngaleili pamhaowa. ³²Kala Mosesna Jazerli ara̱yang khavai mibing chihovai; athumna chiwui kha̱bing khuida chili khalei Amornaobingli kashamshokhaowa. ³³Chiwui thili athumna ngareikhuida Bashanwui shongfali kānvai, kala Bashanwui awunga Ogna awui mi saikora thānlaga ngarar khavai Edre-ili rāngaroka.

³⁴Kha ithumwui Avāna Mosesli hānga, "Ali mangacheelu; ina ala, awui mi saikorala, awui ngaleila nathumwui pāngli horsangmihaira. Nathumna ali Heshbonli kapama Amorwui awunga Sihonli kasā thāda sāmira."

³⁵Athumna ali, anaomayarabing, kala awui mi saikorali sāthata, khipākha mataimana, kala awui ngalei khuihaowa.