Riirei Israel ak Kowolji Kwandanyo
Kaimegei muguleldap piik amu ooreet, ak ki ng'alaalji icheek Kwandanyo ak Musa, ak ki ur erenook icheek; walutyet ko ereneet ne po keeng'uut ne kiinde keetit si keer icheek. Yeityo konyo songolyet eng' soet ak saruunet agobo Sihon ak Og.
Ng'alaali Kwandanyo eng' mustarisyek 8, 16, 34
21 1Ye kingo kas kanaanindet ne ki laitorani Arad, ne menyei Murot Tai, kole pwoonei Israel eng' ooreetap Atharim, kobargei ak Israel ak koluul alak eng' icheek. 2Ki yai Israel kayomiset Kwandanyo, koleenji, “Ngot ko iman kigoono pichu eunnyu, awech nganasookwak komugul.” 3Ki kas Kwandanyo tuugeetap Israel ak konde Kanaanik eunekwak; ki wech icheek ak nganasookwak komugul. Ki keguure anyun olooto Horma.
Ereneet ne po Keeng'uut
4Ki pa eng' tulweetap Hor kotokyingei Nyanjet ne Birirtuuk, si kosiirtoe emetap Edom, ago ki kaimegei muguleldap piik eng' ooreet. 5Ki ng'alaalji piik Kwandanyo ak Musa, koleenji, “Nee kiiiibech komang'u Misiri, si kebegu eng' surkwen? Ma mi magatyat, ak ma mi peek, ak kaimegei amitwogichu che ya.”
6Yeityo koyook Kwandanyo erenook che ng'woneen kwenutap piik; ki ur erenook piik, ak ki meng'ech che chang' eng' piigap Israel. 7Ki pwa piik kap Musa, koleenji, “Kigeyai tengekto amu kigeng'alaalji Kwandanyo ak inyee. Isai ineendet si koisto erenook eng' acheek.” Ki sai anyun Musa agobo piik.
8Ki leenji Kwandanyo Musa, “Yai ereneet ne ng'wonet, inde keetit; age tugul ne ki ur, ngo kogeer, kosaptos.”
9Ki yai Musa ereneet ne po keeng'uut ak koinde keetit; ye ki ur ereneet chiito age tugul, ko ye kingo keer ereneet ne po keeng'uut, kosaptos. a a v9 Ki boorun Jeso saeennini koek kaboorunetap ineegei: ko uu ye ki igartaat ereneet ne po keeng'uut, si komuuch koger che meei kosaptos, ko uu nooto kigartaat Weeriit, si age tugul ne keeri ineendet eng' iyanet kosaptos (Johana 3:14-15).
Ooreet ne Wendi Moab
10Ki pa piigap Israel ak ki imuung'ee Obot. 11Ki ng'eetyo eng' Obot ak koimuung'ee Iye-abarim, eng' surkwen ne ing'ururi Moab, ole tokyingei kong'asiis. 12Ki pa eng' olooto ak ki imuung'ee kererutap Sered. 13Ki pa eng' olooto ak ki imuung'ee let ap aineetap Arnon, eng' surkwen ne mang'une kiwotetap Amorik; amu aineetap Arnon ko kiwotetap Moab, kobooch Amorik. 14Mwaei anyun Bukuitap Lugosyegap Kwandanyo kole: “Waheb ne mi Supha, ak kereruusyegap Arnon, 15ak chepkeigeusyegap kereruusyek che wegaak kotokyingei oldo ne po Ar, ak koit kiwotetap Moab.”
16Ki pa eng' olooto kwo Beer, keriingonooto po peek ne ki leenji Kwandanyo Musa, “Yum piik, si agoochi peek.”
17Kityenso anyun Israel songoluunini, koleenji, “Ng'etu, ee keriinget! Otyenji! 18Keriinget ne ki baal pounik, ne ki baal piik che taagunotiin eng' rotwekwak ak kirokweekwak.” Yeityo koba eng' surkwen kwo Matana, 19kobun Matana kwo Nahaliel, kobun Nahaliel kwo Bamot, 20ak kobun Bamot kwo atebweet ne mi warengetap Moab, agoi Piska parak ne ing'ururi surkwen.
Konde Kwandanyo Sihon Eunegwak
21Ki yook anyun Israel oikaik kap Sihon laitoryatap Amorik, koleenji, 22“Kaigai abun emeng'ung'. Ma kiwegaak keebe mbar anan mbareenigap sabibuk, ak ma kiee peek che po keriinget. Kiwendi eng' ooreet ne oo ne po laitoryat, kot kesiir kiwoteng'ung'.”
23Ago ma iyan Sihon kosiir Israel kiwotennyi. Ki iyum anyun piikyik tugul, ak kobun surkwen kobargei ak Israel, ak koit Jahas, ak koyai lugeet ak Israel. 24Ki par Israel ineendet eng' rotweet, ak konam emennyi kobooch aineetap Arnon agoi aineetap Jabbok, agoi lagogap Ammon; amu ki iimen kiwotetap lagogap Ammon. 25Ki nam Israel nganasook tugul chuuto, ak komeny eng' nganasook tugul che po Amorik, Hesbon ak nganasookyik tugul che ng'etunotiin. 26Amu Hesbon ko ki nganaseetap Sihon laitoryatap Amorik, ne ki bargei ak laitoryatap Moab ne po tai, ak konam emennyi tugul kobunji, agoi aineetap Arnon. 27Mwaei anyun paoryok kole, “Obwa Hesbon, keteech kogeny, keyaech nganaseetap Sihon. 28Amu ki mang'u maat eng' Hesbon, liplibenetap maat eng' nganaseetap Sihon. Ki am Ar ne po Moab, kiptainigap oldinwek che torooreen che po Arnon. 29Pwo eng' inyee, Moab! Kigobeeti, piigap Kemos! Ki yai weeriikyik koek imweunik, ak tiibiikyik koek luulenik eng' Sihon laitoryatap Amorik. 30Ago ki kibar icheek; ki bet Hesbon agoi Dibon. Ki kiwech agoi Nopa, ne koit Medeba.”
31Ki meny anyun Israel eng' emetap Amorik. 32Ki yook Musa piik si kosegei Jaser; ki nam nganasookyik ak kounda Amorik che ki mi yooto. 33Ki wegaak anyun koba ooreet ne wendi Bashan, kobokyech Og laitoryatap Bashan ak piikyik tugul, konyo koyai lugeet eng' Edrei.
34Ago ki leenji Kwandanyo Musa, “Mat iywei ineendet, amu kaagoonin ineendet, ak piikyik tugul, ak emennyi, eung'ung'. Yachi ko uu ye ki iyachi Sihon laitoryatap Amorik, ne ki menyei Hesbon.”
35Ki par ineendet, ak weeriikyik, ak piikyik tugul, kot koma kochililso agenge, ak konam emennyi.