ዘኍልቍ 21

21 ¹በኔጌብ ይኖር የነበረው የዓራድ ንጉሥ ከነዓናዊው እስራኤል በአታሪም መንገድ እንደመጣ በሰማ ጊዜ እስራኤልን ተዋጋ፤ ከእነርሱም አንዳንዶቹን ማረከ። ²እስራኤልም ለአባታችን ስእለት ተሳለ፤ “ይህን ሕዝብ በእጄ አሳልፈህ በእውነት ብትሰጠኝ፣ ከተሞቻቸውን ፈጽሜ አጠፋለሁ” አለ። ³አባታችንም የእስራኤልን ድምፅ ሰማ፤ ከነዓናውያንንም አሳልፎ ሰጠ፤ እነርሱንና ከተሞቻቸውንም ፈጽመው አጠፉ። ስለዚህም የዚያ ስፍራ ስም ሔርማ ተባለ።

የናስ እባብ

⁴የኤዶምን ምድር ለመዞር ከሖር ተራራ ተነሥተው ወደ ቀይ ባሕር አመሩ፤ ነገር ግን ሕዝቡ በመንገድ ላይ ትዕግሥታቸው አለቀ። ⁵ሕዝቡም በአባታችንና በሙሴ ላይ እንዲህ ሲሉ ተናገሩ፤ “በምድረ በዳ እንድንሞት ከግብፅ ያወጣችሁን ለምንድን ነው? እንጀራ የለም፣ ውሃም የለም፤ ይህችንም የተናቀች ምግብ ተጸየፍናት።”

⁶አባታችንም መርዛማ እባቦችን በሕዝቡ መካከል ላከ፤ እባቦቹም ሕዝቡን ነደፉ፤ ከእስራኤልም ብዙ ሰዎች ሞቱ። ⁷ሕዝቡም ወደ ሙሴ መጥተው፣ “በአባታችንና በአንተ ላይ ተናግረን ኀጢአት ሠራን። እባቦቹን ከእኛ እንዲያርቅ ወደ እርሱ ጸልይ” አሉት። ሙሴም ስለ ሕዝቡ ጸለየ።

⁸አባታችንም ሙሴን፣ “መርዛማ እባብ ሥራ፤ በምሰሶ ላይም ስቀለው፤ የተነደፈ ሁሉ ወደ እርሱ ሲመለከት በሕይወት ይኖራል” አለው።

⁹ሙሴም የናስ እባብ ሠራ፤ በምሰሶም ላይ ሰቀለው፤ እባብም ሰውን በነደፈ ጊዜ ሁሉ ሰውዬው ወደ ናሱ እባብ ሲመለከት በሕይወት ይኖር ነበር። ^a a v9 ኢየሱስ ይህን ኩነት ለራሱ ምሳሌ አድርጎ ጠቆመ፤ የናሱ እባብ ተሰቅሎ የሚሞቱ ሰዎች ተመልክተው በሕይወት እንዲኖሩ እንደ ሆነ ሁሉ፣ ወልድም እንዲሁ ተሰቀለ፤ ይኸውም በእርሱ በእምነት የሚመለከት ሁሉ በሕይወት እንዲኖር ነው (ዮሐንስ 3፥14-15)።

ወደ ሞዓብ የተደረገ ጕዞ

¹⁰እስራኤላውያንም ተነሥተው በኦቦት ሰፈሩ። ¹¹ከኦቦትም ተነሥተው ወደ ምሥራቅ በኩል ሞዓብ ትይዩ ባለው ምድረ በዳ በዒዬ ዓባሪም ሰፈሩ። ¹²ከዚያም ተነሥተው በዛሬድ ሸለቆ ሰፈሩ። ¹³ከዚያም ተነሥተው ከአሞራውያን ዳርቻ በሚዘልቀው ምድረ በዳ ከአርኖን ባሻገር ሰፈሩ፤ አርኖን በሞዓብና በአሞራውያን መካከል ያለ ድንበር ነውና። ¹⁴ስለዚህ የአባታችን ጦርነቶች መጽሐፍ እንዲህ ይላል፤ “በሱፋ ያለ ዋሄብ፣ የአርኖንም ሸለቆዎች፣ ¹⁵ወደ ዓር ስፍራ የሚያዘነብለውና እስከ ሞዓብ ድንበር የሚደርሰው የሸለቆዎች ቍልቍለት።”

¹⁶ከዚያም ወደ ብኤር ሄዱ፤ ይህም አባታችን ሙሴን፣ “ሕዝቡን ሰብስብ፤ ውሃ እሰጣቸዋለሁ” ያለበት የውሃ ጕድጓድ ነው።

¹⁷ያን ጊዜም እስራኤል ይህን መዝሙር ዘመረ፤ “አንተ ጕድጓድ ሆይ፣ ፍለቅ! ዘምሩለት! ¹⁸መሳፍንት የቈፈሩት፣ የሕዝቡ መኳንንት በበትረ መንግሥታቸውና በበትራቸው የማሱት ጕድጓድ።” ከዚያም ከምድረ በዳ ወደ መታና ሄዱ፤ ¹⁹ከመታናም ወደ ናሐልኤል፣ ከናሐልኤልም ወደ ባሞት፣ ²⁰ከባሞትም በሞዓብ ሜዳ ወዳለው ሸለቆ፣ በረሃውን ወደሚመለከተው ወደ ፍስጋ ጫፍ ሄዱ።

አባታችን ሴዎንን በእጃቸው አሳልፎ ሰጠ

²¹ከዚያም እስራኤል ወደ አሞራውያን ንጉሥ ወደ ሴዎን መልእክተኞችን እንዲህ ሲል ላከ፤ ²²“በምድርህ አልፍ ዘንድ ፍቀድልኝ። ወደ እርሻ ወይም ወደ ወይን ተክል አንታጠፍም፤ የጕድጓድ ውሃም አንጠጣም። ድንበርህን እስክናልፍ ድረስ በንጉሥ ጎዳና እንሄዳለን።”

²³ነገር ግን ሴዎን እስራኤል በግዛቱ እንዲያልፍ አልፈቀደም። ሕዝቡን ሁሉ ሰብስቦ በእስራኤል ላይ ወደ ምድረ በዳ ዘመተ፤ ወደ ያሕስ ደርሶም እስራኤልን ተዋጋ። ²⁴እስራኤልም በሰይፍ መትቶ ጣለው፤ ምድሩንም ከአርኖን ጀምሮ እስከ ያቦቅ፣ እስከ አሞናውያንም ድረስ ወሰደ፤ የአሞናውያን ድንበር የተመሸገ ነበርና። ²⁵እስራኤልም እነዚህን ከተሞች ሁሉ ማረከ፤ በአሞራውያንም ከተሞች ሁሉ፣ በሐሴቦንና በዙሪያዋ ባሉ መንደሮች ሁሉ ተቀመጠ። ²⁶ሐሴቦን የአሞራውያን ንጉሥ የሴዎን ከተማ ነበረችና፤ እርሱም የቀድሞውን የሞዓብ ንጉሥ ተዋግቶ ምድሩን ሁሉ እስከ አርኖን ድረስ ከእጁ ማረከ። ²⁷ስለዚህ ባለ ቅኔዎች እንዲህ ይላሉ፤ “ወደ ሐሴቦን ኑ፤ እንደ ገና ትሠራ፤ የሴዎን ከተማ ትታደስ። ²⁸እሳት ከሐሴቦን ወጥቶ ነበርና፣ ነበልባልም ከሴዎን ከተማ፤ የሞዓብን ዓር፣ የአርኖንንም ከፍታዎች ጌቶች በላ። ²⁹ወዮልሽ፣ ሞዓብ ሆይ! የካሞሽ ሕዝብ ሆይ፣ ጠፋህ! ወንዶች ልጆቹን ስደተኞች፣ ሴቶች ልጆቹንም ለአሞራውያን ንጉሥ ለሴዎን ምርኮኞች አደረገ። ³⁰ነገር ግን መትተን ጣልናቸው፤ ሐሴቦን እስከ ዲቦን ድረስ ጠፋች። እስከ ኖፋህ ድረስ አወደምን፤ ይህችም እስከ ሜዴባ ትደርሳለች።”

³¹እስራኤልም በአሞራውያን ምድር ተቀመጠ። ³²ሙሴም ያዔዘርን ይሰልሉ ዘንድ ሰዎችን ላከ፤ መንደሮቿንም ማረኩ፤ በዚያ የነበሩትንም አሞራውያን አባረሩ። ³³ከዚያም ዘወር ብለው በባሳን መንገድ ወጡ፤ የባሳንም ንጉሥ ዐግ ከሕዝቡ ሁሉ ጋራ በኤድሬኢ ይዋጋ ዘንድ ተቃውሞ ወጣባቸው።

³⁴አባታችን ግን ሙሴን፣ “አትፍራው፤ እርሱንና ሕዝቡን ሁሉ ምድሩንም በእጅህ አሳልፌ ሰጥቼሃለሁና። በሐሴቦን ይኖር የነበረውን የአሞራውያንን ንጉሥ ሴዎንን እንዳደረግኸው እርሱንም እንዲሁ አድርግ” አለው።

³⁵እርሱንም ወንዶች ልጆቹንም ሕዝቡንም ሁሉ አንድም ተራፊ ሳያስቀሩ መቷቸው፤ ምድሩንም ወረሱ።