Matthew 1

1 ¹Hi Davidwui nao, Abrahamwui nao Jishu Khristawui naotunbingna: ^a a v1 Matthewna Tuingashit Kathar chi naotunbing akha eina haokaphokta, Jishu chi Abraham eina Davidwui kharamda ngashit kahai ara̱-azā china da rāchithei khavai—ithumwui Avāwui kadhara ngashit mangmang chi awuili mashun ngasaka Naomayara chi. ²Abrahamna Isaacwui avāva̱na, Isaacna Jacobwui avāva̱na, kala Jacobna Judah eina achinā ngarāwui avāva̱na. ³Judahna Tamarli ngasoda Perez eina Zerahwui avāva̱na, Perezna Hezronwui avāva̱na, kala Hezronna Ramwui avāva̱na. ⁴Ramna Amminadabwui avāva̱na, Amminadabna Nahshonwui avāva̱na, kala Nahshonna Salmonwui avāva̱na. ⁵Salmonna Rahabli ngasoda Boazwui avāva̱na, Boazna Ruthli ngasoda Obedwui avāva̱na, kala Obedna Jessewui avāva̱na, ⁶kala Jessena awunga Davidwui avāva̱na. Davidna Uriah preiva̱li ngasoda Solomonwui avāva̱na, ⁷Solomonna Rehoboamwui avāva̱na, Rehoboamna Abijahwui avāva̱na, kala Abijahna Asawui avāva̱na. ⁸Asana Jehoshaphatwui avāva̱na, Jehoshaphatna Joramwui avāva̱na, kala Joramna Uzziahwui avāva̱na. ⁹Uzziahna Jothamwui avāva̱na, Jothamna Ahazwui avāva̱na, kala Ahazna Hezekiahwui avāva̱na. ¹⁰Hezekiahna Manassehwui avāva̱na, Manassehna Amonwui avāva̱na, kala Amonna Josiahwui avāva̱na, ¹¹kala Babylonli raithā kahai atamli Josiahna Jeconiah eina achinā ngarāwui avāva̱na.

¹²Babylonli raithā kahaiwui thili, Jeconiahna Shealtielwui avāva̱na, kala Shealtielna Zerubbabelwui avāva̱na. ¹³Zerubbabelna Abiudwui avāva̱na, Abiudna Eliakimwui avāva̱na, kala Eliakimna Azorwui avāva̱na. ¹⁴Azorna Zadokwui avāva̱na, Zadokna Achimwui avāva̱na, kala Achimna Eliudwui avāva̱na. ¹⁵Eliudna Eleazarwui avāva̱na, Eleazarna Matthanwui avāva̱na, kala Mathanna Jacobwui avāva̱na, ¹⁶kala Jacobna Marywui gahara Josephwui avāva̱na. Maryna Khrista kaho Jishuli pharai.

¹⁷Chieina Abrahamwui eina David rāshungda thot saikora tharāda matina; Davidwui eina Babylonli raithā kahai rāshungda thot tharāda matina; Babylonli raithā kahaiwui eina Khrista rāshungda thot tharāda matina.

Avāna Awui Anaomayara Chihovā

¹⁸Jishu Khristawui pharāt hithada shokkahaina: awui ava̱ Mary Josephli khāmhaikasa, kha ani makhokkha saranglakha eina ana Manglā Katharawui mangā eina nao vaida lei kaji theihaowa. ^b b v18 Chi atamli khāmhait chi ainna kasingtit kahai, kalikha sā thāda khamatei ot kahaina — chiwui vang eina chi khangachang khavai kapāngwui lairik kajina, ani gahar-prei ngasozat mapamranglakha tharanla. ¹⁹Awui gahara Joseph khamashung khangaronga mi sāda, ali phonglāk eina maikashi ngasak masākhangaiwui vang, ana ali shukshuk eina pānghai khavai phaninghaowa. ^c c v19 Jihudinaobingwui khalikhali, khāmhait chi ainna kasingtit kahaina — chi khangachang khavai kapāngwui lairik kajina. ²⁰Josephna hi phaninglaga leilakha, Prohowui kazingrao akhana mangshongli ali ramahāda hānga: "Davidwui naomayara Joseph, Maryli khuida napreiva̱ sākhavai mangacheealu, kaja awui lungli nao vaikahai chi Manglā Katharawui einana. ²¹Ana mayarnao akha pharāra; awui ming Jishu phoklu, kaja ana awui mibingli athumwui morei eina huimira."

²²Hi saikora ithumwui Avāna marān eina hānghaikasā chi ungshung khavai shokkahaina: ²³"Yanglu, kachingva̱ china nao vaida mayarnao akha pharāra, kala athumna ali Immanu-el hora" (chiwui kakhalata "ithumwui Avā ithumli ngasoda lei" kajina).

²⁴Josephna ngakarthuida, Prohowui kazingraona ali kaso kahai athishurda sai, kala Maryli khuida apreiva̱ sāhaowa. ²⁵Ana mayarnao akha mapharāranglakha eina tangda Josephna ali makhangasomana, kala ana awui ming Jishu phoka.