Kaphābing Anaomayarali Rāhaira
Zingshoshongwui thangkhameibingna nao chi samphangda ali khoruma; Jerusalemwui awungana inala khorumra da yuiya, chiwui thili Bethlehemwui mayarnao naoshinao saikorali shaothat ngasaka. Awui Avāna pangshap eina maningla, mangshong kala ngayāwui Egyptli yāmvā eina ali ngasharmi. Rachelwui kachap chi paowui ngachaili lei ngasakhaowa.
2 1Jishu awunga Herodwui atamli Judeawui Bethlehemli pharākahaiwui thili, zingshoshongwui eina thangkhameibing Jerusalemli ungshunga, 2hānga, "Jihudibingwui awunga kapharā chi khaleipamkhala? Kaja ithumna awui sirā zingshoshongli theihaira, kala ali khorum khavai rāhaira." 3Awunga Herodna hi shālaga, a ning chotta leihaowa, kala Jerusalem saikorala ali ngasoda chithāhaowa. 4Ana mibingwui pāngmon akhokabing eina ain kathembing saikorali kazipkhuilaga, Khrista khaleipamli pharāki kaji da ngahāna. 5Athumna ali hānga, "Judeawui Bethlehemli pharāra; kaja marānna hithada kapihaida lei: 6'Kha Judahwui ngaleili khalei Bethlehem, na Judahwui khamungabingwui ngachaili teokhameia maningphutmana; kaja nawui eina khamunga akhana thānshokra, chi mina iwui mibing Israelli homra.'"
7Chiwui thili Herodna thangkhameibingli ngathum sāda hokhuilaga, sirā shokkahaiwui atam tāzak chi athumwui eina thei. 8Ana athumli Bethlehemli chihovāda hānga, "Vālaga, nao chi ningsanglak eina phālu. Nathumna ali samphangakha, latungda ili hānglu, chithāda inala vālaga ali khorumra."
9Awungawui tui shālaga, athumna zatphoka; kala athumna zingshoshongli theikahai sirā china nao khalei apam chiwui tunglungli nganingranglakha eina tangda athumwui rida vai. 10Athumna sirā chi kathei tharan, khamathān tarākha eina soso ringphahaowa. 11Shimli kazangda, athumna nao chi awui ava̱ Mary eina ngasoda theilaga, kui mashunzangda ali khoruma. Athumna athumwui lan khuikashebing yirphoklaga ali sinā, frankincense kala myrrh lemmet mi. 12Herodli malatung khavai mangshongli ningmi kahai eina, athumna shongfa khangatei eina athumwui ngaleili latunga.
Avāna Awui Naomayarali Kankhuia
13Athum vākahaiwui thili, ithumwui Avāwui kazingrao akhana Josephwui mangshongli rāhānga: "Ngakarthuilu, nao chi eina awui ava̱li khuiphunglaga, Egyptli yāmvālu, kala ina nali hāngranglakha eina tangda pamsanglu; kaja Herodna nao chi shaothat khavai phāki kajina."
14Chieina ana ngakarthuida, ngayā nao chi eina awui ava̱li khuiphunglaga Egyptli vai,
15kala Herod thiranglakha eina tangda chili pamsanga, chithāda ithumwui Avāna marān eina hāngkahai chi ungshunga: "Egyptwui eina ina iwui naomayarali hokhui." a a v15 Matthewna Hoseawui tui hibing chi Jishuli sāshura: Egyptwui eina hokakhuia Israelna maungshung sāthukkahai chi ungshung ngasaka khamashunga Naomayara chi.
16Chiwui thili Herodna, thangkhameibingna ali yuihaira da theilaga, malungvātlakhaowa, kala thangkhameibingwui eina theikahai atam chi athishurda, Bethlehem eina awui ngalei hupta khalei zingkum khani kala chiwui azing mayarnao naoshinao saikorali shaothat khavai mi chihovai. 17Hi Jeremiah marānna hānghaikasā chi ungshung khavaina: 18"Ramahli akhon akha shai, kachap kala panglāk eina chapkhangachā, Rachelna awui naongarābingwui vang chapta; ana ringphā khuikhavai mamayāmana, khikhalajila athum maleithuwa."
Avāna Ali Shimli Hokhui
19Kha Herod thihaida, ithumwui Avāwui kazingrao akhana Egyptli khalei Josephli mangshongli rāchithei, 20hānga, "Ngakarthuilu, nao chi kala awui ava̱li khuiphungda, Israel ngaleili vālu, kaja nao chiwui mirin phākazatbing thihaira."
21Chieina ana ngakarthuida, nao chi kala awui ava̱li khuiphungda, Israel ngaleili vāhaowa. 22Archelausna avāva̱ Herodwui pamli Judeawui rammunga kaji Josephna kashā eina apam chili vākhavai ngacheehaowa. Mangshongli ning ngasharkahai eina, Galileewui ngaleili vāhaowa. 23Ana vāda Nazareth kaho keinung akhali apama. Hi marānbingna hāngkahai tui chi ungshung khavaina: "Ali Nazarva̱ hora."
