ଅନ୍ଵେଷଣକାରୀମାନେ ପୁତ୍ରଙ୍କ ନିକଟକୁ ଆସନ୍ତି

ବିଦେଶୀ ଜ୍ୟୋତିର୍ବିତ୍‌ମାନେ ଶିଶୁଙ୍କୁ ଖୋଜିପାଇ ତାଙ୍କୁ ପ୍ରଣାମ କରନ୍ତି; ଯିରୂଶାଲମର ରାଜା ନିଜେ ମଧ୍ୟ ସେପରି କରିବେ ବୋଲି ଛଳନା କରନ୍ତି, ତାʼପରେ ବେଥଲିହିମର ବାଳକମାନଙ୍କୁ ହତ୍ୟା କରନ୍ତି। ତାଙ୍କ ପିତା ବଳ ଦ୍ୱାରା ନୁହେଁ, ସ୍ୱପ୍ନ ଓ ରାତିରେ ମିସରକୁ ପଳାୟନ ଦ୍ୱାରା ତାଙ୍କୁ ରକ୍ଷା କରନ୍ତି। ରାହେଲଙ୍କ କାନ୍ଦଣା କାହାଣୀର ମଝିରେ ଠିଆ ହୋଇ ରହିଯାଏ।

ଅଧ୍ୟାୟ 2।

ହେରୋଦ ରାଜାଙ୍କ ସମୟରେ ଯିହୂଦା ପ୍ରଦେଶର ବେଥଲିହିମରେ ଯୀଶୁ ଜନ୍ମଗ୍ରହଣ କଲା ପରେ, ପୂର୍ବଦେଶରୁ ପଣ୍ଡିତମାନେ ଯିରୂଶାଲମରେ ଉପସ୍ଥିତ ହେଲେ, ସେମାନେ କହିଲେ, “ଯେ ଯିହୂଦୀମାନଙ୍କ ରାଜା ହୋଇ ଜନ୍ମ ହୋଇଅଛନ୍ତି, ସେ କେଉଁଠାରେ ଅଛନ୍ତି? କାରଣ ଆମ୍ଭେମାନେ ପୂର୍ବଦେଶରେ ତାହାଙ୍କ ତାରା ଦେଖି ତାହାଙ୍କୁ ପ୍ରଣାମ କରିବାକୁ ଆସିଅଛୁ।” ହେରୋଦ ରାଜା ଏହା ଶୁଣି ବ୍ୟାକୁଳ ହେଲେ, ପୁଣି ତାହାଙ୍କ ସହିତ ସମସ୍ତ ଯିରୂଶାଲମ ବ୍ୟାକୁଳ ହେଲା। ସେ ଲୋକଙ୍କ ସମସ୍ତ ପ୍ରଧାନ ଯାଜକ ଓ ଶାସ୍ତ୍ରୀମାନଙ୍କୁ ଏକତ୍ର କରି, ଖ୍ରୀଷ୍ଟ କେଉଁଠାରେ ଜନ୍ମଗ୍ରହଣ କରିବେ ବୋଲି ସେମାନଙ୍କୁ ପଚାରିଲେ। ସେମାନେ ତାହାଙ୍କୁ କହିଲେ, “ଯିହୂଦା ପ୍ରଦେଶର ବେଥଲିହିମରେ, କାରଣ ଭାବବାଦୀଙ୍କ ଦ୍ଵାରା ଏହା ଲେଖାଯାଇଅଛି: ‘ହେ ବେଥଲିହିମ, ଯିହୂଦା ଦେଶରେ ତୁମ୍ଭେ ଯିହୂଦାର ଶାସକମାନଙ୍କ ମଧ୍ୟରେ କୌଣସିମତେ କ୍ଷୁଦ୍ରତମ ନୁହଁ; କାରଣ ତୁମ୍ଭଠାରୁ ଜଣେ ଶାସକ ବାହାରି ଆସିବେ, ଯେ ଇସ୍ରାଏଲକୁ ପ୍ରତିପାଳନ କରିବେ, ଯେଉଁମାନେ ମୋହର ଲୋକ ଅଟନ୍ତି।’”

ସେତେବେଳେ ହେରୋଦ ଗୋପନରେ ପଣ୍ଡିତମାନଙ୍କୁ ଡକାଇ, ତାରା କେଉଁ ସମୟରେ ଦେଖାଯାଇଥିଲା, ତାହା ସେମାନଙ୍କଠାରୁ ସୂକ୍ଷ୍ମ ରୂପେ ଜାଣିଲେ। ପୁଣି ସେ ସେମାନଙ୍କୁ ବେଥଲିହିମକୁ ପଠାଇ କହିଲେ, “ତୁମ୍ଭେମାନେ ଯାଇ ସେହି ଶିଶୁଙ୍କ ବିଷୟ ଯତ୍ନରେ ଅନୁସନ୍ଧାନ କର। ଯେତେବେଳେ ତାହାଙ୍କୁ ପାଇବ, ସେତେବେଳେ ଫେରିଆସି ମୋତେ ଜଣାଅ, ଯେପରି ମୁଁ ମଧ୍ୟ ଯାଇ ତାହାଙ୍କୁ ପ୍ରଣାମ କରିବି।”

ସେମାନେ ରାଜାଙ୍କ କଥା ଶୁଣି ବାହାରିଗଲେ; ଆଉ ପୂର୍ବଦେଶରେ ଯେଉଁ ତାରା ସେମାନେ ଦେଖିଥିଲେ, ତାହା ସେମାନଙ୍କ ଆଗେ ଆଗେ ଚାଲି, ଯେଉଁଠାରେ ଶିଶୁ ଥିଲେ, ସେହି ସ୍ଥାନ ଉପରେ ଯାଇ ଅଟକିଲା। ସେମାନେ ସେହି ତାରା ଦେଖି ଅତ୍ୟନ୍ତ ଆନନ୍ଦରେ ଆନନ୍ଦିତ ହେଲେ। ସେମାନେ ଗୃହ ମଧ୍ୟକୁ ଯାଇ ଶିଶୁଙ୍କୁ ତାହାଙ୍କ ମାତା ମରିୟମଙ୍କ ସହିତ ଦେଖି, ତଳେ ପଡ଼ି ତାହାଙ୍କୁ ପ୍ରଣାମ କଲେ। ପୁଣି ଆପଣାମାନଙ୍କ ଧନପେଡ଼ି ଫିଟାଇ ତାହାଙ୍କୁ ସୁନା, କୁନ୍ଦୁରୁ ଓ ଗନ୍ଧରସ ଭେଟି ସ୍ଵରୂପେ ଦେଲେ। ପୁଣି ହେରୋଦଙ୍କ ନିକଟକୁ ଫେରି ନ ଯିବା ନିମନ୍ତେ ସ୍ଵପ୍ନରେ ଚେତନା ପାଇ, ସେମାନେ ଅନ୍ୟ ବାଟ ଦେଇ ଆପଣାମାନଙ୍କ ଦେଶକୁ ପ୍ରସ୍ଥାନ କଲେ।

ପିତା ଆପଣା ପୁତ୍ରଙ୍କୁ ଆଶ୍ରୟ ଦିଅନ୍ତି

ସେମାନେ ପ୍ରସ୍ଥାନ କଲା ପରେ, ଆମ୍ଭମାନଙ୍କ ପିତାଙ୍କ ଜଣେ ଦୂତ ସ୍ଵପ୍ନରେ ଯୋଷେଫଙ୍କୁ ଦର୍ଶନ ଦେଇ କହିଲେ, “ଉଠ, ଶିଶୁ ଓ ତାହାଙ୍କ ମାତାଙ୍କୁ ନେଇ ମିସରକୁ ପଳାଇଯାଅ, ପୁଣି ମୁଁ ତୁମ୍ଭକୁ ନ କହିବା ପର୍ଯ୍ୟନ୍ତ ସେଠାରେ ରୁହ; କାରଣ ହେରୋଦ ଶିଶୁଙ୍କୁ ବଧ କରିବା ନିମନ୍ତେ ତାହାଙ୍କୁ ଅନ୍ଵେଷଣ କରିବାକୁ ଉଦ୍ୟତ ହେଉଅଛନ୍ତି।”

ସେଥିରେ ସେ ଉଠି ରାତ୍ରିରେ ଶିଶୁ ଓ ତାହାଙ୍କ ମାତାଙ୍କୁ ନେଇ ମିସରକୁ ପ୍ରସ୍ଥାନ କଲେ,

ପୁଣି ହେରୋଦଙ୍କ ମୃତ୍ୟୁ ପର୍ଯ୍ୟନ୍ତ ସେଠାରେ ରହିଲେ, ଯେପରି ଭାବବାଦୀଙ୍କ ଦ୍ଵାରା ଆମ୍ଭମାନଙ୍କ ପିତା ଯାହା କହିଥିଲେ, ତାହା ସଫଳ ହୁଏ, “ଆମ୍ଭେ ଆପଣା ପୁତ୍ରଙ୍କୁ ମିସରରୁ ଡାକିଲୁ।” ^a

ସେତେବେଳେ ହେରୋଦ ପଣ୍ଡିତମାନଙ୍କ ଦ୍ଵାରା ପ୍ରବଞ୍ଚିତ ହୋଇଅଛନ୍ତି ବୋଲି ଦେଖି ଅତ୍ୟନ୍ତ କ୍ରୁଦ୍ଧ ହେଲେ, ପୁଣି ପଣ୍ଡିତମାନଙ୍କଠାରୁ ଯେଉଁ ସମୟ ଜାଣିଥିଲେ, ତଦନୁସାରେ ବେଥଲିହିମ ଓ ତହିଁର ସମସ୍ତ ଅଞ୍ଚଳରେ ଥିବା ଦୁଇ ବର୍ଷ ଓ ତହିଁରୁ କମ୍ ବୟସ୍କ ସମସ୍ତ ବାଳକଙ୍କୁ ବଧ କରିବା ନିମନ୍ତେ ଲୋକ ପଠାଇଲେ। ସେତେବେଳେ ଯିରିମିୟ ଭାବବାଦୀଙ୍କ ଦ୍ଵାରା ଯାହା କୁହାଯାଇଥିଲା, ତାହା ସଫଳ ହେଲା: “ରାମାରେ ଏକ ସ୍ଵର ଶୁଣାଗଲା, ରୋଦନ ଓ ମହାବିଳାପ, ରାହେଲ ଆପଣା ସନ୍ତାନମାନଙ୍କ ନିମନ୍ତେ ରୋଦନ କରୁଅଛି; ସେ ସାନ୍ତ୍ଵନା ପାଇବାକୁ ଅସମ୍ମତ ହେଲା, କାରଣ ସେମାନେ ଆଉ ନାହାନ୍ତି।”

ପିତା ତାହାଙ୍କୁ ଗୃହକୁ ଡାକନ୍ତି

କିନ୍ତୁ ହେରୋଦଙ୍କ ମୃତ୍ୟୁ ହେଲା ପରେ, ମିସରରେ ଆମ୍ଭମାନଙ୍କ ପିତାଙ୍କ ଜଣେ ଦୂତ ଯୋଷେଫଙ୍କୁ ସ୍ଵପ୍ନରେ ଦର୍ଶନ ଦେଲେ, ପୁଣି କହିଲେ, “ଉଠ, ଶିଶୁ ଓ ତାହାଙ୍କ ମାତାଙ୍କୁ ନେଇ ଇସ୍ରାଏଲ ଦେଶକୁ ଯାଅ, କାରଣ ଯେଉଁମାନେ ଶିଶୁଙ୍କ ପ୍ରାଣ ନେବାକୁ ଚେଷ୍ଟା କରୁଥିଲେ, ସେମାନେ ମରିଅଛନ୍ତି।”

ସେଥିରେ ସେ ଉଠି ଶିଶୁ ଓ ତାହାଙ୍କ ମାତାଙ୍କୁ ନେଇ ଇସ୍ରାଏଲ ଦେଶକୁ ଗଲେ। କିନ୍ତୁ ଆର୍ଖେଲାୟ ଆପଣା ପିତା ହେରୋଦଙ୍କ ପଦରେ ଯିହୂଦା ପ୍ରଦେଶରେ ରାଜତ୍ଵ କରୁଅଛନ୍ତି ବୋଲି ଶୁଣି, ସେ ସେଠାକୁ ଯିବାକୁ ଭୟ କଲେ; ପୁଣି ସ୍ଵପ୍ନରେ ଚେତନା ପାଇ, ସେ ଗାଲିଲୀ ଅଞ୍ଚଳକୁ ପ୍ରସ୍ଥାନ କଲେ। ପୁଣି ସେ ଯାଇ ନାଜରିତ ନାମକ ନଗରରେ ବାସ କଲେ, ଯେପରି ଭାବବାଦୀମାନଙ୍କ ବାକ୍ୟ ସଫଳ ହୁଏ, “ସେ ନାଜରିତୀୟ ବୋଲି ଖ୍ୟାତ ହେବେ।”