Avāna Shongfa Ngarānmi
Ut sahā kachon ngavai Johnna ra̱hikkhui khavai kharā yaruili Abrahamwui naongarā sākhavai china khipākha ngatangmanmara da hānga. Chiwui thili Jishuna ra̱hikkhui khavai poi, kala Johnna 'Ina nawui eina ra̱hikkhui khikha lei' da salui. Ana mayāmihaowa, kala awui Avāwui akhonna awui leikashiva̱ Naomayara da hoa.
3 1Chi atamli Ra̱hikme Johnna kharāda, Judeawui lamhāngli pao hāshoka, 2"Ningngateilu, kaja ithumwui Avā wungram nganailakhaira." 3Isaiah marānna hithada hānghaikasā mi chi hina: "Lamhāngli kavaoa akhon akha: Prohowui shongfa ngarānlu, awui apong ngarong ngasaklu."
4Johnna ut sahā kachon ngavaida, awui kashānli sāhui shānneira̱ neiya; awui kashakazā chi khaoh eina ram khuira̱na. 5Chieina Jerusalem, Judea saikora, kala Jordan kuikhamareili khalei apam saikorana awuili shokvai, 6kala athumwui morei hāngphatta, Jordan kongli ana athumli ra̱hikmi.
7Ra̱hikmi khavai Phariseebing eina Sadduceebing kachungkha kharā chi theilaga, ana athumli hānga, "He, phara̱wui naongarābing! Malungkhavāt kharā chi eina yāmkhavai, khipāna nathumli hāngkhala? 8Chithada sāda, ningngateikhui vang kānnā athei theilu. 9Nathum khalattali, 'Abraham ithumwui avāna' da matui khavai maphaningalu; kaja ina nathumli hāngna: ithumwui Avāna hi lungguibing eina Abrahamwui vang naongarā pharāshok ngasakshapa. 10Thingngayungli arui tangda ngahā parhaida lei; chieina thingrong kachiva̱ khamathā athei makhamathei chi ta̱teklaga meilungli horsanghaora.
11"Ina nathumli ningngateikhui vang tara̱ eina ra̱hikmi; kha iwui thili rāki a chi ili reikhameina; iya awui pheihop khuiphungda matik machāmana. Ana nathumli Manglā Kathara kala Mei eina ra̱hikmira. 12Awui yāmkok chi awui pāngli lei; ana awui lanpum tharngasakra, awui mā chi chumli hātkhuira, kha ahikbing chi masāshimitkapai meilungli chithothaora." a a v12 Yāmkok chi kapanga mā chi phanshong horsangkhavai sāhaina; arik kaje mā chi ngaleili latung pihaida, arik makaje māhik chi masina phankathuihaora.
Avāna Awui Naomayarali Khuikasangmi
13Chieina Johnna ali ra̱hikmi khavai Jishuna Galileewui eina Jordanli Johnwuili rai. 14Kha Johnna ali khāmhai khavai salui: "Ina nawui eina ra̱hikmi khikha lei, kha nana iwuili kharāla?"
15Jishuna ali ngahānkai, "Rida mayāmilu, kaja hithada ithumna khamashung khangarong saikora ungshung ngasakphalungra." Chieina Johnna ali mayāmihaowa.
16Jishuli ra̱hikmi kahaiwui thili, ana chichangli tara̱wui eina shokvai; kala yanglu, awuili kazingram shohaowa; kala ana ithumwui Avāwui Manglā nāsha̱ thāda ratāda awuitungli nganing chi thei.
17Chieina kazingramwui eina akhon akhana hānga, "Hi iwui Naomayara, iwui leikashiva̱na; awuili ina ringphālaka."
