Ithe Nĩ Ahaarĩria Njĩra
Johana, ehumbĩte nguo ya guoya wa ngamĩĩra, akĩĩra ikundi iria ciokaga kũbatithio atĩ gũciarwo kũrĩ Iburahimu gũtihonokagia mũndũ. Jesũ o nake akĩhooya abatithio, nake Johana agĩkararia, akiuga atĩ no nginya gũtuĩke ũngĩ. Agĩcooka agĩĩtĩkĩra, naguo mũgambo wa Ithe wake ũkĩmwĩta Mũũriũ wake mwende.
3 1Matukũinĩ macio, nĩ gwokire Johana Mũbatithania, akĩhunjagia werũinĩ wa Judea, 2“Mwĩrire, amu ũthamaki wa Ithe witũ nĩũkuhĩrĩirie.” 3Ũyũ nĩ we ũrĩa mũnabii Isaia aaririe ũhoro wake, akiuga atĩrĩ: “Nĩ mũgambo wa mũndũ ũkĩanĩrĩra werũinĩ: Haarĩriai njĩra ya Mwathani, rũngaariai njĩra ciake.”
4Nake Johana eehumbĩte nguo cia guoya wa ngamĩĩra, na mũcibi wa rũũa njoheroinĩ yake; irio ciake ciarĩ ngigĩ na ũũkĩ wa gĩthaka. 5Hĩndĩ ĩyo andũ a Jerusalemu, na a Judea guothe, na a bũrũri wothe ũrĩa warĩ hakuhĩ na Jorodani, makiumĩra magĩũka kũrĩ we, 6nao makĩbatithio nĩwe thĩinĩ wa Rũũĩ rwa Jorodani, makĩumbũraga mehia mao.
7Rĩrĩa oonire Afarisai na Asadukai aingĩ magĩũka kũbatithio, akĩmeera atĩrĩ, “Inyuĩ rũciaro rwa nduĩra! Nũũ ũmũtaarĩte atĩ mũũrĩre marakara marĩa marooka? 8Nĩ ũndũ ũcio ciarai maciaro maagĩrĩire kwĩrira. 9Na mũtikeĩĩre na ngoro cianyu atĩrĩ, ‘Iburahimu nĩ we ithe witũ,’ amu nĩngũmwĩra atĩ: Ithe witũ no ahote kũrutĩra Iburahimu ciana kuuma mahigainĩ maya. 10Narĩo ithanwa rĩigĩtwo o rĩrĩ mĩriinĩ ya mĩtĩ; nĩ ũndũ ũcio mũtĩ o wothe ũrĩa ũtaciaraga maciaro mega nĩ gũtemwo ũtemagwo ũgaikio mwakiinĩ.
11“Niĩ ndĩmũbatithagia na maaĩ nĩ ũndũ wa kwĩrira, no ũrĩa ũgũũka thuutha wakwa nĩ mũhĩĩyu kũngĩra niĩ—niĩ ndiagĩrĩire o na gũkuua iraatũ ciake. We nĩ akaamũbatithia na Roho Mũtheru na mwaki. 12Gĩcũnjĩ gĩake gĩa kũhuha ngano kĩrĩ guokoinĩ gwake; nake nĩ akaatheria kĩhuhĩro gĩake, acookanĩrĩrie ngano yake ikũmbĩinĩ, no acine mahuti na mwaki ũrĩa ũtangĩhora.” a a v12 Gĩcũnjĩ gĩa kũhuha ngano kĩahũthagĩrwo gũikia ngano ĩrĩa ĩhũũrĩtwo rĩerainĩ; naguo ngano ĩrĩa mĩritũ ĩgacookagĩrĩra thĩ, namo mahuti mahũthũ makaahurutwo nĩ rũhuho magathiĩ.
Ithe Nĩ Aamũkĩra Mũũriũ Wake
13Hĩndĩ ĩyo Jesũ akiuma Galili agĩũka Jorodani kũrĩ Johana, nĩguo abatithio nĩwe. 14No Johana akĩgeria kũmũgiria, akĩmwĩra atĩrĩ, “Nĩ niĩ njagĩrĩire kũbatithio nĩwe, na rĩu wee nĩ ũgũũka kũrĩ niĩ?”
15Nake Jesũ akĩmũcookeria atĩrĩ, “Reke gũtuĩke ũguo rĩu, amu ũguo nĩguo twagĩrĩirwo nĩ kũhingia ũthingu wothe.” Nake Johana akĩmwĩtĩkĩria.
16Na rĩrĩa Jesũ aarĩkia kũbatithio, o rĩmwe akĩũmĩra maaĩinĩ; na rĩrĩ, igũrũ rĩkĩhingũka harĩ we, akĩona Roho wa Ithe witũ agĩikũrũka ta ndutura, agĩikara igũrũ rĩake.
17Na rĩrĩ, mũgambo ũkiuma igũrũ ũkiuga atĩrĩ, “Ũyũ nĩ we Mũũriũ wakwa, ũrĩa nyendete; na nĩngenagio nĩwe.”