Ota yoʻlni tayyorlaydi
Tuya junidan kiyim kiygan Yahyo suvga choʻmish uchun kelayotgan olomonga Ibrohim naslidan boʻlish hech kimni qutqarmasligini aytadi. Soʻng Iso ham suvga choʻmishni soʻraydi, Yahyo esa buning aksincha boʻlishi kerak deb eʼtiroz bildiradi. U rozi boʻladi va Otasining ovozi sevikli Oʻgʻlini Oʻziniki deb eʼlon qiladi.
3 1Oʻsha kunlari choʻmdiruvchi Yahyo kelib, Yahudiya choʻlida vaʼz aytar edi: 2“Tavba qilinglar, chunki Otamizning Shohligi yaqinlashib qoldi.” 3Bu kishi haqida Ishayo paygʻambar shunday degan edi: “Choʻlda bir ovoz nido qilmoqda: Egamizning yoʻlini tayyorlanglar, Uning soʻqmoqlarini toʻgʻri qilinglar.”
4Yahyoning kiyimi tuya junidan edi, beliga charm kamar bogʻlagan edi; yegani chigirtka va yovvoyi asal edi. 5Shunda Quddus aholisi, butun Yahudiya va Iordan atrofidagi butun oʻlka xalqi uning oldiga chiqa boshladi, 6ular gunohlarini iqror qilib, Iordan daryosida Yahyodan choʻmdirildilar.
7Koʻplab farziylar va sadduqiylar choʻmdirilish uchun kelayotganini koʻrib, u ularga dedi: “Ey ilon zotlari! Yaqinlashib kelayotgan gʻazabdan qochish kerakligini sizlarga kim aytdi? 8Shunday ekan, tavbaga loyiq meva beringlar. 9Oʻz koʻnglingizda «Ibrohim bizning otamiz» deb oʻylab yurmanglar, chunki men sizlarga aytaman: Otamiz mana shu toshlardan ham Ibrohimga farzandlar yarata oladi. 10Bolta allaqachon daraxtlarning ildiziga qoʻyilgan. Shuning uchun yaxshi meva bermaydigan har bir daraxt kesilib, olovga tashlanadi.
11“Men sizlarni tavba uchun suvda choʻmdiraman. Lekin mendan keyin Keluvchi mendan kuchliroqdir — men Uning choriqlarini koʻtarishga ham loyiq emasman. U sizlarni Muqaddas Ruh va olovda choʻmdiradi. 12Yaba Uning qoʻlida; U Oʻz xirmonini tozalaydi, bugʻdoyini omborga yigʻadi, somonni esa hech oʻchmaydigan olovda yoqib yuboradi.” a a v12 Yaba yanchilgan donni havoga sochish uchun ishlatilgan; ogʻirroq bugʻdoy yerga qaytib tushgan, yengil somon esa shamolda uchib ketgan.
Ota Oʻz Oʻgʻlini qarshi oladi
13Shunda Iso Yahyodan choʻmdirilish uchun Jaliladan Iordanga, Yahyoning oldiga keldi. 14Lekin Yahyo Uni toʻxtatmoqchi boʻlib dedi: “Men Sizdan choʻmdirilishim kerak edi, Siz boʻlsangiz mening oldimga kelyapsizmi?”
15Iso unga javob berdi: “Hozircha shunday boʻlaqolsin, chunki biz butun solihlikni shu tarzda bajo keltirishimiz kerak.” Shunda Yahyo rozi boʻldi.
16Iso choʻmdirilgach, darhol suvdan chiqdi. Shu zahoti osmon Unga ochildi; U Otamizning Ruhi kaptar kabi pastga tushib, Oʻzining ustiga qoʻnayotganini koʻrdi.
17Shunda osmondan bir ovoz keldi: “Bu Mening sevikli Oʻgʻlimdir; Men Undan mamnunman.”