Mateo 3

3 ¹Niadtong mga adlawa miabot si Juan nga Magbabawtismo, nga nagwali didto sa kamingawan sa Judea, ²“Paghinulsol kamo, kay ang gingharian sa atong Amahan haduol na.” ³Mao kini siya ang gihisgotan ni propeta Isaias, nga nag-ingon: “Usa ka tingog nga nagsinggit didto sa kamingawan: Andama ninyo ang dalan sa Ginoo, tul-ira ninyo ang iyang mga agianan.”

⁴Si Juan nagsul-ob ug bisti nga balhibo sa kamelyo, nga may bakos nga panit sa iyang hawak; ang iyang pagkaon dulon ug ihalas nga dugos. ⁵Unya ang mga taga-Jerusalem ug ang tibuok Judea ug ang tibuok kayutaan palibot sa Jordan nangadto kaniya, ⁶ug sila gibawtismohan niya didto sa Suba sa Jordan, nga nagsugid sa ilang mga sala.

⁷Sa pagkakita niya sa daghang mga Pariseo ug mga Saduseo nga nangadto aron pagpabawtismo, miingon siya kanila, “Kamong mga kaliwat sa mga bitin! Kinsay nagpasidaan kaninyo sa pagkalagiw gikan sa umaabot nga kapungot? ⁸Pamunga kamo, nan, ug angay sa paghinulsol. ⁹Ayaw kamo pagdahom nga makaingon sa inyong kaugalingon, ‘Si Abraham mao ang among amahan,’ kay sultihan ko kamo: ang atong Amahan makahimo sa pagpatungha ug mga anak alang kang Abraham gikan niining mga bato. ¹⁰Ang atsa anaa na sa gamot sa mga kahoy, busa ang matag kahoy nga dili mamunga ug maayong bunga pagaputlon ug ilabay ngadto sa kalayo.

¹¹“Gibawtismohan ko kamo sa tubig alang sa paghinulsol, apan ang moabot sunod kanako mas gamhanan kay kanako—dili ako takos sa pagdala sa iyang mga sandalyas. Siya mobawtismo kaninyo sa Espiritu Santo ug sa kalayo. ¹²Ang iyang pangkahig anaa sa iyang kamot; iyang hinloan ang iyang giokanan, tigumon ang iyang trigo ngadto sa kamalig, apan sunogon ang mga tahop sa kalayo nga dili gayod mapalong.” ^a a v12 Ang pangkahig gigamit sa paglabay sa giok nga lugas ngadto sa hangin; ang mas bug-at nga trigo mahulog balik sa yuta samtang ang gaan nga tahop gipalid sa hangin.

Giabiabi sa Amahan ang iyang Anak

¹³Unya miabot si Jesus gikan sa Galilea ngadto sa Jordan kang Juan, aron pagpabawtismo kaniya. ¹⁴Apan gisulayan ni Juan sa pagpugong kaniya: “Ako ang nagkinahanglan nga bawtismohan nimo, apan ikaw pa ang mianhi kanako?”

¹⁵Mitubag si Jesus kaniya, “Tugoti kini karon, kay mao kini ang paagi nga kinahanglan natong tumanon ang tanang pagkamatarong.” Busa gitugotan siya ni Juan.

¹⁶Human mabawtismohi si Jesus, mihaw-as dayon siya gikan sa tubig, ug sa kalit naabli kaniya ang mga langit; nakita niya ang Espiritu sa atong Amahan nga mikunsad sama sa salampati ug mitugdon kaniya.

¹⁷Unya may tingog gikan sa langit nga miingon, “Kini mao ang akong Anak, ang akong hinigugma; nahimuot ako kaniya.”