Pitri pora Rasta Taiyar Kori Ase
Uth laga chuli kapra pindhi kene John baptisma nimite ahha bhir ke koise Abraham laga bongsho hoile bhi kunke bachai nadiye. Aru Jisu bhi baptisma lobole mangise, aru John koise etu ulta hobo lage. Tai mani loise, aru Tar Pitri laga awaz pora Tar morom laga Putro ke nijor koi kene koise.
3 1Hei dinkhan te, Baptizma diya Yohan tu ahhi kene, Judea laga jongol te prachar korise, 2“Mon ghura bi, kilemane amar Pitri laga rajyo tu usor te ahhi jaise.” 3Eitu he Isaiah bhabobadi pora kowa manuh ase, jun koise: “Jongol te jor pora mati thaka ekta awaj: Prabhu laga rasta taiyar koribi, Tar laga rasta khan sidha koribi.”
4Yohan tu untor chuli laga kapra pindhise, aru tar komor te chamra laga peti bandhi thakise; tar khana tu phoring aru jongoli mou thakise. 5Tetiya Jerusalem aru sob Judea aru Jordan laga usor laga sob jagah pora manuh khan tar logot te ulai ahhise, 6aru tarkhan laga paap shikar kori kene, Jordan nadi te tar pora baptizma loise.
7Bisi Pharisee aru Sadducee khan baptizma lobole ahhi thaka dekhi kene, tar pora tarkhan ke koise, “Tumikhan bikhuwa saph khan laga bacha khan! Ahhi thaka khong pora polabole tumikhan ke kun pora hoshiar korise? 8Titia hoile, mon ghura laga layak phol dhoribi. 9‘Abraham amar baba ase,’ koi kene tumikhan nijor bhitor te bhabona nakoribi, kilemane moi tumikhan ke koi ase: amar Pitri pora ei pathor khan pora Abraham nimite bacha khan uthabo pare. 10Kurhali tu etiya pora gos khan laga jor te rakhi ase, karne bhal phol nadhora sob gos tu kati kene jui te phelai dibo.
11“Moi tumikhan ke mon ghura nimite pani pora baptizma di ase, kintu moi laga pichete ahhi thaka ekjon tu moi pora bhi takatwala ase—Moi Tar laga chapal bhi bukhi bole layak nohoi. Tar pora tumikhan ke Pobitro Atma aru jui pora baptizma dibo. 12Tar laga dhaan uraowa kata tu Tar hath te ase; Tar khola jagah tu sapha koribo, Tar ghehu tu bhoral te joma koribo, kintu bhus khan kitia bhi nabhuja jui pora julai dibo.” a a v12 Dhaan uraowa kata tu mara dhaan ke hawa te phelai dibole kaam kora thakise; bhari ghehu tu matite giri jaise, kintu halka bhus tu hawa te uri jaise.
Pitri pora Tar Putro ke Grohon Kore
13Tetiya Jisu tu tar pora baptizma lobole, Galilee pora Jordan te Yohan logot te ahhise. 14Kintu Yohan pora Tar ke rukhabole korise, koise, “Moi apuni pora baptizma lobole lage, kintu apuni moi logot te ahhi ase?”
15Jisu pora tar ke jawab dise, “Etiya hobole dibi, kilemane eneka pora amikhan sob dharmikota purah koribo lage.” Titia Yohan pora Tar ke hobole dise.
16Jisu baptizma loa pichete, Tar ke joldi pani pora uthi ahhise, aru achanak pora sorgo tu Tar nimite khuli jaise; Tar pora amar Pitri laga Atma tu ekta kobutor nisina namikena Tar uporte bohi thaka dekhise.
17Tetiya sorgo pora ekta awaj koise, “Eitu Moi laga Putro ase, junke Moi morom kore; Moi Tar logote khushi ase.”