மத்தேயு 3

3 ¹அந்நாட்களில் யோவான்ஸ்நானன் வந்து, யூதேயாவின் வனாந்தரத்தில் பிரசங்கம் செய்து, ²“மனந்திரும்புங்கள், ஏனெனில் எங்கள் பிதாவின் ராஜ்யம் சமீபித்திருக்கிறது” என்றான். ³ஏசாயா தீர்க்கதரிசி குறித்துச் சொன்னவன் இவனே: “வனாந்தரத்தில் கூப்பிடுகிறவனுடைய சத்தம்: கர்த்தருக்கு வழியை ஆயத்தப்படுத்துங்கள், அவருடைய பாதைகளைச் செவ்வைப்படுத்துங்கள்.”

⁴யோவான் ஒட்டகமயிர் ஆடையை உடுத்தி, தன் அரையில் தோல்கச்சையைக் கட்டியிருந்தான்; வெட்டுக்கிளியும் காட்டுத்தேனும் அவனுடைய உணவாயிருந்தது. ⁵அப்பொழுது எருசலேமும், யூதேயா முழுவதும், யோர்தானைச் சுற்றியுள்ள சகல நாடும் அவனிடத்தில் புறப்பட்டு வந்து, ⁶தங்கள் பாவங்களை அறிக்கையிட்டு, யோர்தான் நதியில் அவனால் ஞானஸ்நானம் பெற்றார்கள்.

⁷அநேக பரிசேயரும் சதுசேயரும் ஞானஸ்நானம் பெறுவதற்கு வருகிறதை அவன் கண்டு, அவர்களை நோக்கி: “விரியன்பாம்புக் குட்டிகளே! வரப்போகிற கோபத்திற்குத் தப்பியோட உங்களுக்கு எச்சரித்தவன் யார்? ⁸ஆகையால் மனந்திரும்புதலுக்கு ஏற்ற கனிகளைக் கொடுங்கள். ⁹‘ஆபிரகாம் எங்கள் தகப்பன்’ என்று உங்களுக்குள்ளே சொல்லிக்கொள்ளலாம் என்று நினைக்காதேயுங்கள்; ஏனெனில் நான் உங்களுக்குச் சொல்லுகிறேன்: இந்தக் கல்லுகளிலிருந்து ஆபிரகாமுக்குப் பிள்ளைகளை உண்டாக்க எங்கள் பிதாவால் கூடும். ¹⁰இப்பொழுதே கோடரி மரங்களின் வேரில் வைக்கப்பட்டிருக்கிறது; ஆகையால் நல்ல கனிகொடாத எந்த மரமும் வெட்டப்பட்டு அக்கினியில் போடப்படும்.

¹¹“மனந்திரும்புதலுக்கென்று நான் உங்களைத் தண்ணீரினால் ஞானஸ்நானம் கொடுக்கிறேன்; ஆனால் எனக்குப்பின் வருகிறவர் என்னிலும் வல்லவர்; அவருடைய பாதரட்சைகளைச் சுமக்கிறதற்கு நான் பாத்திரன் அல்ல. அவர் உங்களைப் பரிசுத்த ஆவியினாலும் அக்கினியினாலும் ஞானஸ்நானம் கொடுப்பார். ¹²சுளகு அவருடைய கையில் இருக்கிறது; அவர் தம்முடைய களத்தை நன்றாய் விளக்கி, தம்முடைய கோதுமையைக் களஞ்சியத்தில் சேர்ப்பார்; பதரையோ அணையாத அக்கினியினால் சுட்டெரிப்பார்.” ^a a v12 சுளகு போரடித்த தானியத்தைக் காற்றில் தூற்றப் பயன்பட்டது; கனமான கோதுமை தரையில் திரும்பி விழுந்தது, இலேசான பதர் காற்றில் பறந்துபோனது.

பிதாவானவர் தம்முடைய குமாரனை வரவேற்கிறார்

¹³அப்பொழுது இயேசு யோவானால் ஞானஸ்நானம் பெறுவதற்கு, கலிலேயாவிலிருந்து யோர்தான் நதிக்கு அவனிடத்தில் வந்தார். ¹⁴யோவான் அவரைத் தடுத்து: “நான் உம்மால் ஞானஸ்நானம் பெறவேண்டியதாயிருக்க, நீர் என்னிடத்தில் வருகிறீரோ?” என்றான்.

¹⁵இயேசு அவனுக்குப் பிரதியுத்தரமாக: “இப்பொழுது இடங்கொடு; இப்படி எல்லா நீதியையும் நிறைவேற்றுவது நமக்கு ஏற்றதாயிருக்கிறது” என்றார். அப்பொழுது யோவான் அவருக்கு இடங்கொடுத்தான்.

¹⁶இயேசு ஞானஸ்நானம் பெற்றபின்பு, உடனே தண்ணீரிலிருந்து கரையேறினார்; இதோ, வானம் அவருக்குத் திறக்கப்பட்டது; எங்கள் பிதாவின் ஆவி புறாவைப்போல் இறங்கி, தம்மேல் வந்தமர்கிறதைக் கண்டார்.

¹⁷அப்பொழுது: “இவர் என்னுடைய குமாரன், நான் நேசிக்கிறவர்; இவரில் பிரியமாயிருக்கிறேன்” என்று வானத்திலிருந்து ஒரு சத்தம் உண்டாயிற்று.