Baba Asakhunganya Njira
Juwau, wakubvala mapswa a ngamiya, apanga mwinji wakubwera toera kubatizwa kuti kubalwa na Abrahamu nkhabe kupulumusa munthu. Buluka Yezu aphemba kubatizwa pyace, ndipo Juwau atsutsa kuti pikhafunika kucitwa mwakusiyana. Iye atawira, ndipo fala ya Baba wace isacemera Mwana wace wakufunika.
3 1Mu ntsiku zenezire, Juwau M'batizi abwera, mbamwaza mphangwa n'thando mwa Yudeya, 2“Tcunyukani, thangwi Umambo wa Baba wathu wafika cifupi.” 3Uyu ndi ule adalongwa na mprofeta Izaiya, mbalonga tenepa: “Fala inakhuwa n'thando: Khunganyani njira ya Mbuya, lungamisani miseu yace.”
4Juwau akhabvala nguwo yakucitwa na mapswa a ngamiya, na nsinga wa cikumba n'ciuno mwace; cakudya cace cikhali dzombe na uci wa n'thando. 5Na tenepo, anthu a ku Yerusalema na a Yudeya yonsene na a cisa consene ca n'khundu mwa Yordani, abuluka mbaenda kuna iye, 6mbabatizwa na iye n'mkulo wa Yordani, mbabvuma madawo awo.
7Pidaona iye Afarisi azinji na Asaduki mbakhabwera toera kubatizwa, aapanga tenepa: “Imwe ana a nyoka! Mbani adakucenjezani toera kuthawa ukali unabwera? 8Na tenepo, balani misapo yakuthema kutcunyuka. 9Lekani kunyerezera toera kulonga ekhanu: ‘Abalahamu ndi baba wathu,’ thangwi ndisakupangani: Baba wathu anakwanisa kumusira Abalahamu ana kubulukira m'miyala iyi. 10Sanja iri kale pa midzi ya miti; natenepa, muti onsene wakukhonda bala misapo yadidi usagwandwa mbuponywa pa moto.
11“Ine ndisakubatizani na madzi toera kutcunyuka, mbwenye ule anabwera nduli mwanga ndi wamphambvu kuposa Ine—Ine nkhabe kuthema kunyamula nkhwakwa zace. Iye anakubatizani na Nzimu Wakucena na moto. 12Cakupepetera cace ciri m'manja mwace; iye anaceneseratu paace pakupunthira, mbagumanya tirigu wace n'nkhokwe, mbwenye anapisa makoko na moto wakukhonda kudzima.” a a v12 Cakupepetera cikhaphatisirwa toera kuposa m'mwamba tirigu wakupunthika; tirigu wakulemera ukhagwa pontho pantsi, mbwenye makoko akupepuka akhamwazwa na mphepo.
Baba Asatambira Mwana Wace
13Na tenepo, Yezu abuluka ku Galileya mbaenda ku Yordani kuna Juwau, toera kubatizwa na iye. 14Mbwenye Juwau akhan'khondesa, mbalonga tenepa: “Ine ndisafunika kubatizwa na Imwe, mbwenye Imwe musabwera kuna ine?”
15Yezu antawira tenepa: “Tawirisa cincino, thangwi tenepa ndi munafunika ife kukwanirisa kulungama konsene.” Na tenepo, Juwau antawirisa.
16Pakumala kubatizwa Yezu, abuluka mwakucimbiza m'madzi, penepo pene kudzulu kwafunguka kuna iye; aona Nzimu wa Baba wathu mbakhatcita ninga nkhangaiwa, mbakhala pa iye.
17Na tenepo, fala ibuluka kudzulu, mbilonga tenepa: “Uyu ndi Mwana wanga, ule anafuniwa na Ine; Ine ndisakomerwa na iye.”
