പിതാവ് വഴി ഒരുക്കുന്നു

ഒട്ടകരോമംകൊണ്ടുള്ള ഉടുപ്പു ധരിച്ച യോഹന്നാൻ, സ്നാനത്തിനായി വരുന്ന പുരുഷാരത്തോട് അബ്രാഹാമിന്റെ സന്തതിയായിരിക്കുന്നത് ആരെയും രക്ഷിക്കുന്നില്ല എന്നു പറയുന്നു. പിന്നെ യേശുവും സ്നാനം ഏൽക്കുവാൻ ചോദിക്കുന്നു, അതു മറിച്ചാണു വേണ്ടത് എന്നു യോഹന്നാൻ എതിർക്കുന്നു. അവൻ സമ്മതിക്കുന്നു, അവന്റെ പിതാവിന്റെ ശബ്ദം തന്റെ പ്രിയപുത്രനെ തന്റേതെന്നു പ്രഖ്യാപിക്കുന്നു.

അധ്യായം 3.

ആ നാളുകളിൽ സ്നാപകയോഹന്നാൻ വന്ന്, യെഹൂദ്യ മരുഭൂമിയിൽ പ്രസംഗിച്ചു, “മാനസാന്തരപ്പെടുവിൻ, നമ്മുടെ പിതാവിന്റെ രാജ്യം സമീപിച്ചിരിക്കുന്നു.” യെശയ്യാ പ്രവാചകൻ അരുളിച്ചെയ്ത വ്യക്തി ഇദ്ദേഹംതന്നെ: “മരുഭൂമിയിൽ വിളിച്ചുപറയുന്ന ഒരുവന്റെ ശബ്ദം: കർത്താവിന്റെ വഴി ഒരുക്കുവിൻ, അവിടുത്തെ പാതകൾ നേരേയാക്കുവിൻ.”

യോഹന്നാൻ ഒട്ടകരോമംകൊണ്ടുള്ള വസ്ത്രം ധരിച്ചിരുന്നു, അരയിൽ ഒരു തോൽവാറും ഉണ്ടായിരുന്നു; വെട്ടുക്കിളിയും കാട്ടുതേനും ആയിരുന്നു അവന്റെ ആഹാരം. അപ്പോൾ യെരൂശലേമും യെഹൂദ്യ മുഴുവനും യോർദാനു ചുറ്റുമുള്ള പ്രദേശമൊക്കെയും അവന്റെ അടുക്കൽ വന്നു, തങ്ങളുടെ പാപങ്ങൾ ഏറ്റുപറഞ്ഞ് യോർദാൻ നദിയിൽ അവനാൽ സ്നാനമേറ്റു.

പരീശന്മാരും സദൂക്യരും അനേകർ സ്നാനത്തിനായി വരുന്നതു കണ്ടിട്ട് അവൻ അവരോടു പറഞ്ഞു: “അണലിസന്തതികളേ! വരുവാനിരിക്കുന്ന കോപത്തിൽനിന്ന് ഓടിയൊളിക്കാൻ നിങ്ങൾക്കു മുന്നറിയിപ്പു നല്കിയത് ആരാണ്? ആകയാൽ മാനസാന്തരത്തിനു യോഗ്യമായ ഫലം പുറപ്പെടുവിക്കുവിൻ. ‘അബ്രാഹാം ഞങ്ങളുടെ പിതാവാകുന്നു’ എന്നു നിങ്ങളുടെ ഉള്ളിൽ പറയാമെന്നു നിരൂപിക്കരുത്; ഞാൻ നിങ്ങളോടു പറയുന്നു: ഈ കല്ലുകളിൽനിന്ന് അബ്രാഹാമിനു മക്കളെ ഉളവാക്കുവാൻ നമ്മുടെ പിതാവിനു കഴിയും. ഇപ്പോൾതന്നെ വൃക്ഷങ്ങളുടെ ചുവട്ടിൽ കോടാലി വെച്ചിരിക്കുന്നു; നല്ല ഫലം കായ്ക്കാത്ത ഏതു വൃക്ഷവും വെട്ടി തീയിൽ ഇട്ടുകളയുന്നു.

“ഞാൻ നിങ്ങളെ മാനസാന്തരത്തിനായി വെള്ളംകൊണ്ടു സ്നാനം കഴിപ്പിക്കുന്നു; എന്നാൽ എന്റെ പിന്നാലെ വരുന്ന അവിടുന്ന് എന്നെക്കാൾ ശക്തനാകുന്നു—അവിടുത്തെ ചെരിപ്പു ചുമക്കുവാൻ ഞാൻ യോഗ്യനല്ല. അവിടുന്ന് നിങ്ങളെ പരിശുദ്ധാത്മാവുകൊണ്ടും തീകൊണ്ടും സ്നാനം കഴിപ്പിക്കും. അവിടുത്തെ വീശുമുറം അവിടുത്തെ കയ്യിൽ ഉണ്ട്; അവിടുന്ന് തന്റെ കളം മുറ്റും വെടിപ്പാക്കി തന്റെ കോതമ്പു കളപ്പുരയിൽ കൂട്ടിവെക്കും, എന്നാൽ പതിർ കെടാത്ത തീകൊണ്ടു ചുട്ടുകളയും.” ^a

പിതാവ് തന്റെ പുത്രനെ സ്വീകരിക്കുന്നു

അപ്പോൾ യേശു യോഹന്നാനാൽ സ്നാനമേൽക്കുവാൻ ഗലീലയിൽനിന്ന് യോർദാനിൽ അവന്റെ അടുക്കൽ വന്നു. എന്നാൽ യോഹന്നാൻ അവനെ തടുക്കുവാൻ ശ്രമിച്ചു: “എനിക്ക് അങ്ങയാൽ സ്നാനം ഏൽക്കേണ്ടിയിരിക്കുന്നു; എന്നിട്ടും അങ്ങ് എന്റെ അടുക്കൽ വരുന്നുവോ?”

യേശു അവനോടു മറുപടി പറഞ്ഞു: “ഇപ്പോൾ അനുവദിക്കുക; ഇങ്ങനെ സകല നീതിയും നിവർത്തിക്കേണ്ടത് നമുക്ക് ഉചിതമാകുന്നു.” അപ്പോൾ യോഹന്നാൻ അവനെ അനുവദിച്ചു.

യേശു സ്നാനമേറ്റശേഷം ഉടനെ വെള്ളത്തിൽനിന്നു കയറി, പെട്ടെന്ന് ആകാശം അവിടുത്തേക്കു തുറന്നു; നമ്മുടെ പിതാവിന്റെ ആത്മാവ് ഒരു പ്രാവിനെപ്പോലെ ഇറങ്ങി അവിടുത്തെമേൽ വന്നിരിക്കുന്നതു അവിടുന്ന് കണ്ടു.

അപ്പോൾ സ്വർഗത്തിൽനിന്ന് ഒരു ശബ്ദം ഇപ്രകാരം അരുളിച്ചെയ്തു: “ഇവൻ എന്റെ പുത്രൻ, ഞാൻ സ്നേഹിക്കുന്നവൻ; ഇവനിൽ ഞാൻ പ്രസാദിക്കുന്നു.”