ማቴዎስ 3

3 ¹በዚያን ዘመን መጥምቁ ዮሐንስ በይሁዳ ምድረ በዳ እየሰበከ መጣ፤ ²“ንስሓ ግቡ፤ የአባታችን መንግሥት ቀርቦአልና” አለ። ³ነቢዩ ኢሳይያስ፣ “በምድረ በዳ የሚጮኽ ሰው ድምፅ፦ የጌታን መንገድ አዘጋጁ፤ ጎዳናውንም አቅኑ” ብሎ የተናገረለት ይህ ነው።

⁴ዮሐንስም የግመል ጠጉር ልብስ ለብሶ፣ በወገቡ ላይ የቈዳ መቀነት ታጥቆ ነበር፤ ምግቡም አንበጣና የበረሓ ማር ነበር። ⁵በዚያን ጊዜም ኢየሩሳሌም፣ ይሁዳ ሁሉ የዮርዳኖስም ዙሪያ ሁሉ ወደ እርሱ ይወጡ ነበር፤ ⁶ኀጢአታቸውንም እየተናዘዙ በዮርዳኖስ ወንዝ ከእርሱ ተጠመቁ።

⁷ከፈሪሳውያንና ከሰዱቃውያን ብዙዎች ለመጠመቅ ሲመጡ አይቶ፣ እንዲህ አላቸው፤ “እናንተ የእፉኝት ልጆች! ከሚመጣው ቍጣ እንድትሸሹ ማን አስጠነቀቃችሁ? ⁸እንግዲህ ለንስሓ የሚገባ ፍሬ አፍሩ። ⁹‘አብርሃም አባታችን ነው’ ብላችሁ በልባችሁ ለማለት አታስቡ፤ እላችኋለሁና፦ አባታችን ከእነዚህ ድንጋዮች ለአብርሃም ልጆችን ሊያስነሣ ይችላል። ¹⁰አሁንም ምሳር በዛፎች ሥር ተቀምጦአል፤ ስለዚህ መልካም ፍሬ የማያፈራ ዛፍ ሁሉ ተቈርጦ ወደ እሳት ይጣላል።

¹¹“እኔ ለንስሓ በውሃ አጠምቃችኋለሁ፤ ነገር ግን ከእኔ በኋላ የሚመጣው ከእኔ ይልቅ ይበረታል፤ የእርሱን ጫማ ለመሸከም እንኳ አይገባኝም። እርሱ በመንፈስ ቅዱስና በእሳት ያጠምቃችኋል። ¹²መንሹም በእጁ ነው፤ አውድማውንም ፈጽሞ ያጠራል፤ ስንዴውንም ወደ ጎተራ ይሰበስባል፤ ገለባውን ግን በማይጠፋ እሳት ያቃጥላል።” ^a a v12 መንሹ የተወቃውን እህል ወደ ላይ ለማናፈስ ያገለግል ነበር፤ ከባዱ ስንዴ ወደ መሬት ይመለስ ነበር፤ ቀላሉ ገለባ ግን በነፋስ ይበተን ነበር።

አባታችን ልጁን ይቀበላል

¹³በዚያን ጊዜ ኢየሱስ ከእርሱ ለመጠመቅ ከገሊላ ወደ ዮርዳኖስ ወደ ዮሐንስ መጣ። ¹⁴ዮሐንስ ግን ሊከለክለው ሞክሮ፣ “እኔ ከአንተ ልጠመቅ ያስፈልገኛል፤ አንተ ወደ እኔ ትመጣለህን?” አለ።

¹⁵ኢየሱስም መልሶ፣ “አሁን ፍቀድልኝ፤ ጽድቅን ሁሉ መፈጸም የሚገባን እንዲህ ነውና” አለው። ያን ጊዜ ዮሐንስ ፈቀደለት።

¹⁶ኢየሱስም ከተጠመቀ በኋላ፣ ወዲያውኑ ከውሃው ወጣ፤ ድንገትም ሰማያት ተከፈቱለት፤ የአባታችንም መንፈስ እንደ ርግብ ወርዶ በእርሱ ላይ ሲያርፍ አየ።

¹⁷ከሰማይም ድምፅ፣ “ይህ የምወደው ልጄ ነው፤ በእርሱ ደስ ይለኛል” አለ።