Nna Na-akwado Ụzọ ahụ

Jọn, onye yi uwe ajị kamel, gwara igwe mmadụ na-abịa ka e mee ha baptizim na ịbụ ụmụ Ebraham adịghị azọpụta onye ọbụla. Mgbe ahụ Jisọs rịọkwara ka e mee ya baptizim, Jọn wee jụ, sị na ọ kwesịrị ịbụ nʼụzọ nke ọzọ. O kwere, olu Nna ya wee kpọọ ya Ọkpara ya a hụrụ nʼanya.

Isi 3.

Nʼụbọchị ndị ahụ, Jọn Omee Baptizim bịara, na-ekwusa nʼọzara Judia, “Chegharịanụ, nʼihi na alaeze Nna anyị abịaruola nso.” Onye a bụ onye ahụ Aịzaya onye amụma kwuru okwu banyere ya, sị: “Olu onye na-eti mkpu nʼọzara: Kwadoonụ ụzọ Onyenwe anyị, meenụ ka okporo ụzọ ya guzie.”

Jọn yi uwe e ji ajị kamel mee, keekwa eriri akpụkpọ anụ nʼukwu ya; nri ya bụ igurube na mmanụ aṅụ ọhịa. Mgbe ahụ, ndị Jerusalem, na Judia niile, na mpaghara niile gbara Jọdan gburugburu, pụrụ bịakwute ya, ọ mekwara ha baptizim nʼosimiri Jọdan, ha na-ekwupụta mmehie ha.

Mgbe ọ hụrụ ọtụtụ ndị Farisii na ndị Sadusii ka ha na-abịa ka e mee ha baptizim, ọ gwara ha sị, “Unu ụmụ agwọ ajụala! Onye dọrọ unu aka na ntị ka unu gbanarị ọnụma ahụ na-abịa? Ya mere, mịanụ mkpụrụ kwesịrị nchegharị. Unu echekwala na unu ga-asị nʼime onwe unu, ‘Ebraham bụ nna anyị,’ nʼihi na ana m agwa unu: Nna anyị pụrụ isite na nkume ndị a mepụtara Ebraham ụmụ. Ugbu a, e debelarị anyụike na mgbọrọgwụ osisi ndị ahụ; ya mere, osisi ọbụla nke na-adịghị amị ezi mkpụrụ ka a na-egbutu ma tụba nʼime ọkụ.

“Ana m eme unu baptizim na mmiri maka nchegharị, ma onye ahụ na-abịa nʼazụ m dị ike karịa m—erughị m eru ibu akpụkpọụkwụ ya. Ọ ga-eme unu baptizim na Mmụọ Nsọ na ọkụ. Ngwa ịfụcha ọka dị ya nʼaka; ọ ga-ehichapụ ebe ọ na-azọcha ọka ya, chịkọta ọka wiiti ya nʼime ọba, ma were ọkụ na-apụghị imenyụ emenyụ kpọọ igbugbo ọka ahụ.” ^a

Nna Na-anabata Ọkpara Ya

Mgbe ahụ, Jisọs sitere na Galili bịaruo nʼosimiri Jọdan ịchọ Jọn, ka o mee ya baptizim. Ma Jọn gbalịrị igbochi ya, sị, “Ọ bụ m kwesịrị ka i mee m baptizim, ma gịnị mere i ji bịakwute m?”

Jisọs zara ya sị, “Kwere ka ọ dị otu a ugbu a, nʼihi na ọ bụ otu a ka anyị ga-esi mezue ezi omume niile.” Ya mere, Jọn kwere ya.

Mgbe e mesịrị Jisọs baptizim, o sitere nʼime mmiri rịgopụta ozugbo, na mberede, eluigwe meghere nye ya; ọ hụrụ Mmụọ nke Nna anyị ka ọ na-arịdata dịka nduru ma bekwasị nʼahụ ya.

Mgbe ahụ, otu olu si nʼeluigwe kwuru, sị, “Onye a bụ Ọkpara m, onye m hụrụ nʼanya; ihe ya na-atọ m ụtọ.”