Rama Nyadiakeun Jalan
Yohanes, maké baju bulu onta, nyarios ka balaréa nu datang rék dibaptis yén turunan Ibrahim moal nyalametkeun saha-saha. Tuluy Yesus ogé ménta dibaptis, sarta Yohanes ngabantah yén kuduna sabalikna. Anjeunna ngidinan, sarta sora Rama-Na ngaku Putra-Na anu dipikanyaah.
3 1Dina mangsa harita, sumping Yahya Jurubaptis, ngawawarkeun di gurun keusik Yudea, 2“Kudu tarobat, sabab Karajaan Rama urang geus deukeut.” 3Yahya teh jalma anu geus diramalkeun ku Nabi Yesaya, saurna: “Aya sora anu gegeroan di gurun keusik: Sadiakeun jalan pikeun Gusti, luruskeun jalan-Na.”
4Yahya nganggo anggoan tina bulu onta sareng beubeur kulit dina cangkengna; tuangeunana simeut jeung madu leuweung. 5Tuluy urang Yerusalem, sakuliah Yudea, jeung sakuliah wewengkon sabudeureun Walungan Yordan daratang ka anjeunna, 6tuluy dibaptis ku anjeunna di Walungan Yordan, bari ngaku dosa-dosana.
7Barang ningali loba urang Parisi jeung Saduki anu daratang rek dibaptis, anjeunna nyarios ka maranehna, “Eh turunan oray matih! Saha anu ngelingan maraneh sangkan kabur tina bebendu anu bakal datang? 8Ku sabab kitu, sing buahan ku lampah anu luyu jeung tarobat. 9Ulah rek ngomong dina hate, ‘Abraham teh karuhun urang,’ sabab ceuk kaula ka maraneh: Rama urang iasa ngayugakeun anak keur Abraham tina ieu batu-batu. 10Kampak geus aya dina akar tatangkalan, nepi ka saban tangkal anu teu ngaluarkeun buah nu hade bakal ditegor tuluy dialungkeun kana seuneu.
11“Kaula mah ngabaptis maraneh ku cai pikeun tarobat, tapi anu bakal sumping sanggeus kaula leuwih kawasa batan kaula—kaula teu pantes mangku tarumpah-Na. Anjeunna anu bakal ngabaptis maraneh ku Roh Suci jeung seuneu. 12Garpu panampi-Na aya dina panangana-Na, sarta Anjeunna bakal ngaberesihan tempat pangirikana-Na, ngumpulkeun gandum-Na ka jero leumbung, tapi huut-huutna bakal diduruk ku seuneu anu moal pareum-pareum.” a a v12 Garpu panampi dipake pikeun ngawang-ngawang gandum anu geus diirik ka awang-awang; gandum anu leuwih beurat ragrag deui ka taneuh, ari huut anu hampang kabawa angin.
Rama Nampi Putra-Na
13Tuluy Yesus sumping ti Galilea ka Walungan Yordan, nepangan Yahya, seja dibaptis ku anjeunna. 14Tapi Yahya nyoba nyegah, “Abdi anu kedah dibaptis ku Anjeun, dupi Anjeun kalah sumping ka abdi?”
15Waler Yesus ka anjeunna, “Antep bae ayeuna, sabab ku jalan kieu urang kudu nyumponan sagala kabeneran.” Yahya tuluy ngantep.
16Sanggeus dibaptis, Yesus harita keneh unggah ti jero cai, sarta ujug-ujug langit muka pikeun Anjeunna; Anjeunna ningali Roh Rama urang lungsur siga japati tuluy eunteup ka Anjeunna.
17Tuluy aya sora ti sawarga, ngandika, “Ieu teh Putra Kami anu dipikaasih; Kami kacida sukana ka Anjeunna.”