Hiak swak thang rwe
Chongdip

Pa na Lampui Daanne

Ut mun om chanu pwan twangnu John na, baptize to thang lang hungnu mi khang khou, Abraham om kik taat gana tudannu ding le kan thang make diga rinne. Haba nung bi Jisu na le baptize to thang lang ngaiye, atiga John na haga inkuga tonu ding gaye diga katak rwe. Maanna ha ding daan thangluga, Baom Pa om khwanna Baom kriangnu Sa Kapaisa ding chak thang nge.

Ani Pa na chongkhak heiya bi kabia nge 17

Bung 3.

Haba kaan bi baptize to thangnu John na hungluga Judea ramhaang bi sacham kasam ngaake, “Sung lero, balangbe ani Pa om krwang talei hung naat rwe.” Heiya thiamting Isaiah na rin thang damnu maan gaye, rinne: “Ramhaang bi pao ongnu khwan khatna rinne, Pukraangba lampui ga daanno; Balampui bing ga to bazeyo.”

John na ut mun bina chanu pwan twang ngaake khatle bakong bi zan mun om kongkhaak khaake ngaake; baom thaisaak ga takhao khatle nilai lak om khwei tui gaye. Habei ga Jerusalem khatle Judea taram nun khatle Jordan tuiqwa kim bi amqwatnu taram bing bina mi nun bakim bi hung rwe, khatle banina bani om noh rin indaoluga Jordan tuiqwa bi maanna bani ding baptize to thang rwe.

Pharisee rwan le Sadducee rwan taswang baptize to lang hungnu John na muluga, bani khou rinne, “He barun kik taat rwan ga! Hung dingnu balung pwan bina pak dwak lang nani khou tuna rin basi thanggabo? Atibriakpina, sung lenu ding khopnu kasanu kraa kraawo. Nani sung bi, ‘Abraham ga ani pa gaye,’ diga rin lang mako, balangbe Eina nani khou rinnuwe: ani Pa na hei lung bing khouna Abraham om sa rwan pon thang ngamme. Atun le thingkung ri bing bi rei bachu thangluga ongme, atibriakpina kasanu kraa kraa maknu thingkung bing ding pun satluga mei bi bazwan thang nge.

“Eina sung lenu lang nani ding tui bi baptize to thang nge, atiyeda ama anung la hungnu Maan ga ama ngam liannuwe—Baom sandal phun lang hakna ei khop make. Maanna nani ding Katha Bathiangnu le mei le bi baptize to thanglune. Bakut pi Baom zam amme; Maanna Baom loulaak riak ding to bathiang thangluga, gehu ding Baom inta khou khom thanglune, atiyeda baraang ding gana mit latlanu mei bina karo thanglune.” a a v12 Zam ga kadimnu saang ka basaang la kalat thou lang to ngaake; baritnu gehu ga talei bi han tan rwe, atiyeda baiaangnu baraang ga huina phao dam rwe.

Pa na Basa Kapaisa Loukhut Thangne

Habei ga Jisu na, John na baptize to thang lang, Galilee lana Jordan tuiqwa bi John kim bi hung ngaake. Atiyeda John na Bating khaam lang to ngaake, “Ei Nakhouna baptize to thang lang khopnuwe, atiyeda Nang akim bi hungnubo?”

Jisu na bakhou katake, “Atun za thang ngo, balangbe hadanga anina ririak senu nun pi hung tang thang ding gaye.” Atiga John na Bating za thang rwe.

Jisu baptize to thang bina, Maan daakka tui bina kahan rwe, atiga thei mak daakka tambaan Maan lang inkhaan lat swake; ani Pa om Katha banphi danga Balu chung bi tatwangnu amnu Maanna mu rwe.

Habei ga tambaan lana tanu khwan khatna rinne, “Heiba Eina kriangnu Asa Kapaisa gaye; Ei Balu chung bi pem tak rwe.”