Ichobei Kwanda Ooreet
Johana, ne laachei ngoroik che po tambeesik, koleenji tuiyosyek che bwa kobatisanisyei kole, koek lakweetap Abraham ma isaru chii age tugul. Yeityo kosoomei Jeso ko ibatisan agine, ak koetei Johana kole nyolu koek ne oliin age. Kochamji, ak kutitap Kwandanyi koleen ko ineni Weeriinnyi ne chamei.
Ng'alaali Kwandanyo eng' mustari 17
3 1Eng' peetuusyechooto ko nyo Johana Kabatisanindet, koamdooti eng' surkwen ne po Judea, 2koleen, “Osigu, amu kagoriik laitornatetap Kwandanyo.” 3Ineni ne ki mwa agobo ineendet maotyot Isaiah, kole: “Kutitap chii ne ititeni eng' surkwen, koleen: Ochop ooreetap Kiptaiyat, olitiit ortinwekyik.”
4Ki laachei Johana ngoroik che po tambeesik, ak ki oratkei pireneet ne po muito eng' nyigiisennyi; amitwogikyik ko chereng'enyinik ak kumyat ne po timiin. 5Yeityo kobwonji ineendet Jerusalem, ak emet komugul ne po Judea, ak komoswek tugul che neegitee Jordan, 6ak ki ibatisan ineendet icheek eng' aineetap Jordan, kong'aanyei tengekwogikwak.
7Ye kigeer Pharisaik ak Sadukaik che chaang' che bwa kobatisanisyei, koleenji icheek, “Okweek lagogap ereng'ook! Ng'oo ne kaimwa owei nereegek che bwonen? 8Oyai anyun logoek che nyolu siguunet. 9Amemwa eng' mugulelwekwok, ale, ‘Abraham ko kwandanyo,’ amu amwaiwok ale: Imuuchi Kwandanyo koing'eetun lagok che po Abraham kobun koichu. 10Kaga keneegit aiywet eng' rootwetap keetiik; si keet age tugul ne ma yaei logoek che karaaran ko kitilei ak kiwiirchi maat.
11“Abatisanak eng' peek agobo siguunet; ago ineendet ne isubwo ko kiim kosiiro—ma nyoljino aip sandennyi. Ineendet ko ne ibatisanook eng' Kabuuset ne Tiliil kobooto maat. 12Mi eng' eunnyi karnet ne po yugoi; koganyis ole mi rwanyunnyi, ak kotuiyo nganuukyik kaondo, ago kobeel kipchurchuryet eng' maat ne ma getos.” a a v12 Ki kiboisyen karnetap yugoi si kewiir parak kesweek che kaga kirwany; koweek nganuuk che neech ng'wony, ago koip koristo kipchurchuryet ne yomyoom.
Itaachei Kwanda Weeriinnyi
13Yeityo konyo Jeso kobunu Galilaya kwo Jordan ole mi Johana, si koibatisan ineendet. 14Ago kimach Johana komet ineendet, kole, “Amache anee si aibatisanin inyee, ara ibwonuwo inyee?”
15Kowolji Jeso ineendet, kole, “Mete nguno, amu ko uu ni ye kanyool keisulda imanda tugul.” Ki mete anyun Johana ineendet.
16Kingo kaibatisan Jeso, konyo parak kobunu peek choktugul, ak konai koteebeksei kipsengwet agobo ineendet; ak kogeer Kabuusetap Kwandanyo kochoorugei ko uu cheptuget, ak kotebee ineendet.
17Ak kole tuugeet ne kobunu kipsengwet, “Ineni Weeriinnyu ne achame; abaibaitune ineendet.”