Tata Wisi Yidika Nzila
Yowani, muna muledi wa mwika mya kamela, wázimbula kwena milumba-lumba mina myakala kwisa mu mbotika ni kukala mwana wa Bulahami kusi hulula mutu. Amana Yesu wálomba ni kababotika yandi phi, amana Yowani wákaya ni bulungini bwavutuka manima. Yesu wáyambula dyawu, amana ndinga ya Tata wandi yázimbula ni yandi wenina Mwana wandi wa luzolu.
Tata wetu kisi zonza mu vese 17
3 1Muna bilumbu meni bina, Yowani Mubotiki wisa, kakala longa muna nganga ya Yuteya, 2«Sobenu bikalulu byenu, mukuma Kipfumu kya Tata wetu kibati finama.» 3Yandi wenina wuna kázonza mbikudi Yesaya, wuzimbudi: «Ndinga ya mutu wisi kalunga kuna nganga, wuzimbula: Lufweti yidika nzila ya Pfumu, amana mikinda myandi sungikenu.»
4Yowani, muledi wandi wákala wa mwika mya kamela, amana muna mbunda wákása mukaba wa tsibu. Mu madya mandi, yandi kakala dya baphasu yi bwiki bwa mu tseki. 5Amana bisi Yelusalemi yi bisi Yuteya dyosu yi bisi kinzunga kyosu kyatalana yi nzadi Yolutani bálubuka kwena yandi, 6amana bakala babotika kwena yandi muna nzadi Yolutani, yi kufungunaka masumu ma bawu.
7Buna kámona Bafwadisi balawu yi Basadise bakwísa ndangu kababotika, wubazimbwadi: «Mbandu ya masawa! Nati wulukebisi ndangu lutina khabu zina zibati kwisa? 8Buna butenu bibundu bina bifwani yi tsobuka ya bikalulu. 9Lubanzaku mu kuzimbula benu yi benu: “Bulahami wenina tata wetu”, mukuma yiluzimbwadibwa: Tata wetu kalenda buta bana kwena Bulahami tuka mu matadi mama. 10Kisoka bela-bela kyenina mu misodi mya miti; buna miti wosu wuna wisiku buta bibundu bya bukheti bakwángawa, amana balosiwa ku mbawu.»
11«Meni, mbati lubotika mu mamba kikuma kya kusoba bikalulu, kaasi wuna wisi kwisa kuna manima ma meni wenina yi ngolu zilutidi za meni; meni, kutu ndungiku mu kunata tsabatu zandi. Yandi kakwisa lubotika mu Kitembu Kyatoma yi mbawu. 12Muyungulu wandi wenina muna koku kwandi; kasukula homa handi ha kuhengula, kawóngika bule bwandi muna khila yandi, kaasi tswala kayókaza muna mbawu yina yilendi zima ku.» a a v12 Muyungulu wákala musadila mu kuloza ngenza zábulwa ku zulu; bule bwazitu bwávutuka ha tsi, kaasi tswala yapheyi yámwangama kwa tembu.
Tata Wayamba Mwana Wandi
13Amana Yesu wákatuka ku Ngadidi, wisa ku Yolutani kwena Yowani, ndangu Yowani kamubotiki kwena yandi. 14Kaasi Yowani wámeka kumukandikisa: «Meni, mbotika yama kwena ngeyi yifweti tambula; buna ngeyi wisi kwisa kwena meni?»
15Yesu wumuvutwadi: «Yambula bwabu, mukuma bwabu buna tufweti lungisila masonga moosu.» Buna Yowani wamuyambula.
16Kunima dya kubotama kwa Yesu, nswalu wálubuka mu mamba; amana zilu dyákanguka kwena yandi, kámona Kitembu kya Tata wetu, hanga yembi, kukulumuka amana kuzakadila hana thandu ya yandi.
17Amana ndinga yázimbula kuna zilu: «Yandi wenina Mwana wama, watondama; mwena yandi tsini kyesi kyama.»
