Poo sho kerede thiyo

John, utma khü be, dzülu püto vori thüma krode Abraham za zo zi tho mi külamo poti. Süsa Jisu sheri dzülu pü keto nü, mu Johne süo bideko mo thita zi müprüh. Pue süo prüvesü, mu pü Po zae a kümüza Nuo zo poti.

Ha Po verse hilü po ba 17

Kezhü 3.

Süsace John mi dzülu khaküsüo vori die, Judea nhalü zhopo thi mi metha, “Neko thelü redeyite, kekrelamori ha Po kede kemenoce ta zo.” Hiohi Isaiah sadzüküseo popü thüma zo, po die: “Mipü nhalü sedie, Niepoo sho kerede yite, Pu shoko thi kemeziyite.”

John hi Utma khü be, pu che thigi shepha phayi; pu mhati hi kopre mu mükhidzü zo. Süsa Jerusalem mu Judea cejü mütü mu Jordan rükhü kejovakeyi tavo pü lü vorita, mu uko u kephoma phrasü die, Jordan rü lü pü po dzülu püta.

Phariseeko mu Sadduceeko krodepü dzülu püto vori püko ngode, pü ukoce poti, “Neko nyhibvü shühyeko! Sopü lekhu vori kezü neko po tayino posü de ta vorizü sheri? Süla thelü redeyi kütina use vezhü yite. Neko dolü, ‘Abraham hako apu zo,’ zisü de presa tahite; kekrelamori I neko ce posüto, ha Poe kütsü hiko celü Abraham po nuko phu süyi ku zo. Tsühi sheri merü süboko phelümezülü khapü ve; side use kevezhüyi kemo sübo kehopüsheri dathü die melü süvato.

“Ie thelü redeyi ketola dzü lü neko dzülu püta, vele a ceri vori küzüo a ceri kuku zo—Ipü pheku khipü yi kesümi mo. Pue Kemesa Rüpü mu melü lü neko dzülu püsüto. Pübelü hahüri ba; Pue tehako hü she süto, Pu süko alha celü kengu yito, vele kha mhütaküho melü sibüko süva süto.” ^a

Poo Pu Nuo zühyiyo

Süsa Jisu Galilee celü, pü po dzülu pü prüyi ketola, Jordan lü John lü vorita. Vele John-e Pu khayi tole süta, “I No celü dzülu pü prüyi ngo zo, eli No a lü vori zü me?”

Jisu puce poti, “Tha thezho te, kekrelamori hizi hako kemezi metü thitso süyi kütina.” Süsa John-e Pu thezho ta.

Jisu dzülu pü prüta sa, pü dzü lü ta prari mütha, mu yhie tüyo Pu lü rüko küsü; Pue ha Po Rüpü mükhro bi die kiri vori, Pu yo bayita ngo.

Süsa tüyo celü mhakhü vori, po die, “Hiohi a Nuo, a khrüo zo; I Pu ngo anü shu zo.”