ማቴዎስ 3 FHB Father's Heart Bible™

3 ¹በቲ መዓልቲታት እቲ፥ መጥምቕ ዮሃንስ ኣብ ምድረ በዳ ይሁዳ እናሰበኸን መፀ፥ ²“ንስሃ እተዉ፥ መንግስቲ ኣቦና ቀሪባ እያ እሞ።” ³እዙይ እቲ ነቢይ ኢሳይያስ ዝተዛረበሉ እዩ፥ ከምዙይ ኢሉ፦ “ኣብ ምድረ በዳ ዝእውጅ ድምፂ፦ መንገዲ እግዚኣብሄር ኣዳልዉ፥ ጐደናታቱ ኣቕንዑ።”

⁴ዮሃንስ ከዓ ካብ ፀጕሪ ግመል ዝተሰርሐ ክዳን ተኸዲኑ፥ ኣብ ሕቘኡ ድማ ኣዲም ቅናት ተዓጢቑ ነበረ፤ ምግቡ ድማ ኣንበጣን መዓር ፅዴናን ነበረ። ⁵ሽዑ ኢየሩሳሌምን ኵሉ ይሁዳን ኵሉ እቲ ኸባቢ ዮርዳኖስን ናብኡ ወፁ፥ ⁶ሓጢኣቶም ድማ እናተናዘዙ ኣብ ሩባ ዮርዳኖስ ብእኡ ተጠመቑ።

⁷ብዙሓት ፈሪሳውያንን ሰዱቃውያንን ክጥመቑ ክመፁ ምስ ረአየ፥ ከምዙይ በሎም፦ “ኣቱም ዘርኢ ኣትማን! ካብቲ ዝመፅእ ቍጥዓ ክትሃድሙ መን ኣጠንቀቐኩም? ⁸እምበኣር ንስሃ ዝግባእ ፍረ ኣፍርዩ። ⁹‘ኣብርሃም ኣቦና እዩ’ ኢልኩም ኣብ ልብኹም ኣይትበሉ፤ ኣነ እብለኩም ኣለኹ፥ ኣቦና ካብዞም ኣእማን እዚኣቶም ንኣብርሃም ውሉድ ከተስእ ይኽእል እዩ እሞ። ¹⁰እታ ማሕፀ ድሮ ኣብ ሱር እቶም ኣእዋም ተነቢራ ኣላ፤ ስለዙይ ፅቡቕ ፍረ ዘይፈሪ ኵሉ ኦም ተቘሪፁ ናብ ሓዊ ይድርበ።

¹¹“ኣነ ንንስሃ ብማይ እየ ዘጥምቐኩም፤ ድሕረይ ዝመፅእ ዘሎ ግና፥ ካባይ ዝሕይል እዩ፤ ኣሳእኑ ንምፃር እኳ ኣይበቅዕን እየ። ንሱ ብመንፈስ ቅዱስን ብሓዊን ከጥምቐኩም እዩ። ¹²መኽፈሺኡ ኣብ ኢዱ ኣሎ፤ ዓውዱ ከፅሪ፥ ስርናዩ ናብ ጐተራ ከኣኽብ፥ ብቝቡቝ ግና ብዘይጠፍእ ሓዊ ከንድዶ እዩ።” ^a a v12 መኽፈሺ ነቲ ዝተኸፍሰ እኽሊ ናብ ኣየር ንምድርባይ ይጠቕም ነበረ፤ እቲ ዝኸብድ ስርናይ ናብ ምድሪ ይምለስ፥ እቲ ቀሊል ብቝቡቝ ግና ይንፈስ ነበረ።

ኣቦ ንወዱ ይቕበሎ

¹³ሽዑ ኢየሱስ ብዮሃንስ ክጥመቕ ኢሉ፥ ካብ ገሊላ ናብ ዮርዳኖስ ናብ ዮሃንስ መፀ። ¹⁴ዮሃንስ ግና ክዓግቶ ደለየ እሞ፥ “ኣነ ብኣኻ ክጥመቕ የድልየኒ እናሃለወ፥ ንስኻ ናባይ ትመፅእ?” በሎ።

¹⁵ኢየሱስ ድማ፥ “ኵሉ ፅድቂ ክንፍፅም ከምዙይ ይግባእ እዩ እሞ፥ ሕዚ ሕደገኒ” ኢሉ መለሰሉ። ሽዑ ዮሃንስ ሓደጎ።

¹⁶ኢየሱስ ምስ ተጠመቐ፥ ብኡብኡ ካብ ማይ ደየበ፤ እንሆ ድማ ሰማያት ተኸፍተሉ፤ መንፈስ ኣቦና ድማ ከም ርግቢ ክወርድ፥ ኣብ ልዕሊኡውን ክቕመጥ ረአየ።

¹⁷ሽዑ ድማ ካብ ሰማይ ድምፂ፥ “እዙይ እቲ ዘፍቅሮ ወደይ እዩ፤ ብእኡ ድማ ባህ ይብለኒ” በለ።