ማቴዎስ 4 FHB Father's Heart Bible™

4 ¹ሽዑ መንፈስ ቅዱስ ንኢየሱስ፥ ብድያብሎስ ምእንቲ ኽፍተን፥ ናብ በረኻ መርሖ። ²ኣርብዓ መዓልትን ኣርብዓ ለይትን ምስ ፆመ ድማ፥ ጠመየ። ³እቲ ፈታኒ ኸዓ መፂኡ፥ “ወዲ እግዚኣብሄር እንተ ኾይንካ፥ እዞም ኣእማን እዚኣቶም እንጀራ ኽኾኑ በሎም” በሎ።

⁴ንሱ ግና “‘ሰብ ካብ ኣፍ ኣቦና ብዝወፅእ ኵሉ ቓል ደኣ እምበር፥ ብእንጀራ ጥራሕ ኣይነብርን እዩ’ ተብሂሉ ተፅሒፉ ኣሎ” ኢሉ መለሰሉ።

⁵ሽዑ እቲ ድያብሎስ ናብታ ቅድስቲ ኸተማ ወሰዶ፥ ኣብ ልዕሊ እቲ ዝለዓለ ኵርናዕ ቤተ መቕደስ ደው ኣበሎ፤ ⁶ከምዙይ ድማ በሎ፦ “ወዲ እግዚኣብሄር እንተ ኾይንካ፥ ‘ብዛዕባኻ ንመላእኽቱ ክእዝዝ እዩ፤ ንሳቶም ከዓ ኣእጋርካ ኣብ እምኒ ምእንቲ ኸይትዕንቀፍ፥ ብኣእዳዎም ክሃንፁኻ እዮም’ ተብሂሉ ተፅሒፉ ኣሎ እሞ፥ ንርእስኻ ናብ ታሕቲ ደርብያ።”

⁷ኢየሱስ ድማ “መሊሱ ‘ንኣቦኻ ኣይትፈታተኖ’ ተብሂሉ ተፅሒፉ ኣሎ” በሎ።

⁸እቲ ድያብሎስ መሊሱ ናብ ኣዝዩ ነዊሕ እምባ ወሰዶ፥ ኵሉ መንግስታት ዓለምን ክብሮምን ድማ ኣርኣዮ። ⁹“ፍግም ኢልካ እንተ ሰገድካለይ፥ እዝ ዅሉ ክህበካ እየ” ድማ በሎ።

¹⁰ሽዑ ኢየሱስ “ኦ ሰይጣን፥ ካባይ ርሓቕ! ‘ንኣቦኻ ስገድ፥ ንእኡ በይኑ ኸዓ ኣምልኽ’ ተብሂሉ ተፅሒፉ ኣሎ እሞ” በሎ።

¹¹ሽዑ እቲ ድያብሎስ ሓደጎ፤ እንሆ ኸዓ መላእኽቲ መፂኦም ኣገልገልዎ።

ብርሃን ኣብ ገሊላ ይበርህ

¹²ዮሃንስ ከም ዝተኣስረ ምስ ሰምዐ ድማ፥ ናብ ገሊላ ኣግለሰ። ¹³ንናዝሬት ሓዲጉ ድማ፥ ኣብ ቅፍርናሆም፥ ኣብ ጥቓ ባሕሪ፥ ኣብ ወሰን ዛብሎንን ንፍታሌምን መፂኡ ተቐመጠ፤ ¹⁴እዙይ ከዓ፥ እቲ ብነቢይ ኢሳይያስ ዝተነግረ ምእንቲ ኽፍፀም ኮነ፦ ¹⁵“ምድሪ ዛብሎንን ምድሪ ንፍታሌምን፥ መንገዲ ባሕሪ፥ ማዕዶ ዮርዳኖስ፥ ገሊላ ናይ ኣህዛብ፥ ¹⁶እቲ ኣብ ፀልማት ዝነብር ህዝቢ ዓብዪ ብርሃን ረአየ፤ ነቶም ኣብ ሃገርን ኣብ ፅላሎት ሞትን ዝነብሩ ድማ፥ ኣብ ልዕሊኣቶም ብርሃን በረሃሎም።”

¹⁷ካብታ ጊዜ እቲኣ ኢየሱስ “መንግስቲ ኣቦና ቀሪባ እያ እሞ፥ ንስሃ እተዉ” እናበለ፥ ክሰብኽ ጀመረ።

ኢየሱስ ንቐዳሞት ደቀ መዛሙርቱ ይፅውዕ

¹⁸ብጥቓ ባሕሪ ገሊላ ኽኸይድ እንተሎ፥ ክልተ ኣሕዋት፥ እቲ ጴጥሮስ ዝተብሃለ ስምኦንን ሓዉ እንድርያስን፥ ኣብ ባሕሪ መርበብ ክድርብዩ ረአዮም፤ ንሳቶም ኣስገርቲ ዓሳ ነበሩ።

¹⁹“ኣስገርቲ ሰብ ክገብረኩምስ ንዑ ተኸተሉኒ” ድማ በሎም።

²⁰ንሳቶም ከዓ መርበቦም ሓዲጎም ሽዑ ንሽዑ ተኸተልዎ። ²¹ካብኡ ናብ ቅድሚት ምስ ቀፀለ ድማ፥ ካልኦት ክልተ ኣሕዋት፥ ንያእቆብ ወዲ ዘብዴዎስን ንሓዉ ዮሃንስን፥ ምስ ኣቦኦም ዘብዴዎስ ኣብ ጃልባ ኮይኖም መርበብ ከተዓራርዩ ረአዮም፤ ፀውዖም ድማ። ²²ንሳቶም ከዓ ነታ ጃልባን ነቦኦምን ሓዲጎም ሽዑ ንሽዑ ተኸተልዎ።

ኣቦ ብወዱ ይፍውስ

²³ኣብ ኣብያተ ፀሎት ኣይሁድ እናመሃረ፥ ወንጌል መንግስቲ እናበሰረ፥ ኣብ ማእኸል እቲ ህዝቢ ኸዓ ንዝኾነ ደዌን ሕማምን እናፈወሰ፥ ኣብ ኵሉ ገሊላ ዞረ። ²⁴ዝናኡ ድማ ናብ ኵሉ ሶርያ ወፀ። ንዅሎም ሕሙማት፥ በብዝተፈላለየ ሕማምን ቃንዛን ዝተትሓዙ፥ ኣጋንንቲ ዝሓደርዎም፥ ዝወድቕዎምን መፃጕዓትን ድማ ናብኡ ኣምፅእዎም፤ ንሱ ኸዓ ኣሕወዮም። ²⁵ብዙሓት ህዝቢ ድማ፥ ካብ ገሊላ፥ ካብ ዓሰርተ ኸተማን ካብ ኢየሩሳሌምን ካብ ይሁዳን ካብ ማዕዶ ዮርዳኖስን ተኸተልዎ። ^a a v25 ዓሰርተ ኸተማ፥ ኣብ ምብራቕን ደቡብ ምብራቕን ባሕሪ ገሊላ ዝርከብ፥ ዝበዝሑ ኣህዛብ ዝነብሩለን ዓሰርተ ኸተማታት ዝሓቘፈ ኣከባቢ ነበረ።