Matiu 4

4 ¹Nígbà náà ni Ẹ̀mí Mímọ́ darí Jesu lọ sí aginjù, kí èṣù bàa lè dán an wò. ²Lẹ́yìn tí ó sì gbààwẹ̀ fún ogójì ọ̀sán àti ogójì òru, ebi sì ń pa á. ³Olùdánwò náà sì tọ̀ ọ́ wá, ó wí pé, “Bí ìwọ bá jẹ́ Ọmọ Ọlọ́run, sọ fún àwọn òkúta wọ̀nyí kí wọ́n di oúnjẹ.”

⁴Ṣùgbọ́n ó dáhùn pé, “A ti kọ ọ́ pé, ‘Kì í ṣe oúnjẹ nìkan ni ènìyàn fi ń wà láàyè, bí kò ṣe gbogbo ọ̀rọ̀ tí ó ti ẹnu Baba wa jáde.’”

⁵Nígbà náà ni èṣù mú un lọ sí ìlú mímọ́ náà, ó sì mú un dúró sí orí ṣóńṣó tẹ́mpìlì, ⁶ó sì wí fún un pé, “Bí ìwọ bá jẹ́ Ọmọ Ọlọ́run, bẹ́ ara rẹ sísàlẹ̀, nítorí Ìwé Mímọ́ wí pé, ‘Yóò pàṣẹ fún àwọn angẹli rẹ̀ nípa rẹ, wọn yóò sì gbé ọ sí ọwọ́ wọn, kí ìwọ má bàa fi ẹsẹ̀ rẹ kọ òkúta.’”

⁷Jesu wí fún un pé, “A tún kọ ọ́ pé, ‘Ìwọ kò gbọdọ̀ dán Baba rẹ wò.’”

⁸Èṣù tún mú un lọ sí orí òkè gíga púpọ̀ kan, ó sì fi gbogbo ìjọba ayé àti ògo wọn hàn án. ⁹Ó wí fún un pé, “Gbogbo ìwọ̀nyí ni èmi yóò fi fún ọ, bí ìwọ bá wólẹ̀, tí o sì foríbalẹ̀ fún mi.”

¹⁰Nígbà náà ni Jesu wí fún un pé, “Kúrò lọ́dọ̀ mi, Satani! Nítorí Ìwé Mímọ́ wí pé, ‘Foríbalẹ̀ fún Baba rẹ, kí o sì máa sìn òun nìkan.’”

¹¹Nígbà náà ni èṣù fi í sílẹ̀, lójijì sì ni àwọn angẹli dé, tí wọ́n sì ń ṣe ìránṣẹ́ fún un.

Ìmọ́lẹ̀ Là ní Galili

¹²Nígbà tí Jesu sì gbọ́ pé a ti fi Johanu sẹ́wọ̀n, ó padà lọ sí Galili. ¹³Ó fi Nasareti sílẹ̀, ó sì lọ gbé ní Kapernaumu, létí òkun, ní agbègbè Sebuluni àti Naftali, ¹⁴kí ọ̀rọ̀ tí a ti sọ láti ọwọ́ wòlíì Isaiah lè ṣẹ: ¹⁵“Ilẹ̀ Sebuluni àti ilẹ̀ Naftali, ọ̀nà òkun, ní ìkọjá Jordani, Galili ti àwọn Kèfèrí, ¹⁶àwọn ènìyàn tí ń gbé nínú òkùnkùn ti rí ìmọ́lẹ̀ ńlá, àti fún àwọn tí ń gbé ní agbègbè àti òjìji ikú, ìmọ́lẹ̀ ti là sí wọn lára.”

¹⁷Láti ìgbà náà lọ ni Jesu bẹ̀rẹ̀ sí í wàásù, ó ń wí pé, “Ẹ ronú pìwàdà, nítorí ìjọba Baba wa ti súnmọ́ tòsí.”

Jesu Pe Àwọn Ọmọ-ẹ̀hìn Rẹ̀ Àkọ́kọ́

¹⁸Bí ó ti ń rìn létí Òkun Galili, ó rí àwọn arákùnrin méjì, Simoni tí a ń pè ní Peteru àti Anderu arákùnrin rẹ̀, tí wọ́n ń sọ àwọ̀n sínú òkun—nítorí apẹja ni wọ́n.

¹⁹Ó sì wí fún wọn pé, “Ẹ máa tẹ̀lé mi, èmi yóò sì sọ yín di apẹja ènìyàn.”

²⁰Lójúkan náà, wọ́n fi àwọn àwọ̀n wọn sílẹ̀, wọ́n sì tẹ̀lé e. ²¹Bí ó ti ń lọ síwájú, ó rí àwọn arákùnrin méjì mìíràn—Jakọbu ọmọ Sebede àti Johanu arákùnrin rẹ̀—nínú ọkọ̀ ojú omi pẹ̀lú Sebede baba wọn, tí wọ́n ń tún àwọn àwọ̀n wọn ṣe, ó sì pè wọ́n. ²²Lójúkan náà, wọ́n fi ọkọ̀ ojú omi náà àti baba wọn sílẹ̀, wọ́n sì tẹ̀lé e.

Baba Mú Ìwòsàn Wá Nípasẹ̀ Ọmọ Rẹ̀

²³Ó rìn ká gbogbo Galili, ó ń kọ́ni ní àwọn Sinagọgu wọn, ó ń wàásù ìhìnrere ìjọba, ó sì ń wo gbogbo ààrùn àti àìsàn tí ó wà láàrin àwọn ènìyàn sàn. ²⁴Òkìkí rẹ̀ sì tàn ká gbogbo Siria. Wọ́n sì gbé gbogbo àwọn aláìsàn tọ̀ ọ́ wá—àwọn tí onírúurú ààrùn àti ìrora ń ṣe, àwọn tí ẹ̀mí èṣù ń dá lóró, àwọn wárápá, àti àwọn arọ—ó sì wò wọ́n sàn. ²⁵Ọ̀pọ̀ ìjọ ènìyàn sì tẹ̀lé e láti Galili, Dekapoli, Jerusalemu, Judea, àti láti ìkọjá Jordani. ^a a v25 Dekapoli jẹ́ àkójọpọ̀ ìlú mẹ́wàá tí ọ̀pọ̀ nínú wọn jẹ́ ti àwọn Kèfèrí, ní ìhà ìlà-oòrùn àti gúúsù ìlà-oòrùn Òkun Galili.