Pitri laga Putro Porikha Diya Jon Logot Milise
Chalis din pichete bhuk lagi kene, Jisu kiba praman kora bodla te porikha kora jon ke tin bar Tar Pitri laga kotha pora jowab dise. Pichete Tai Capernaum te thakise, machli dhora manuh khan ke matise jun khan turonte jaal chari dise, aru sob phale pora bhir ahhise, kun bhi bhal koribo na para sob manuh ke loi kene.
4 1Tetiya Pobitro Atma pora Jisu ke saitan pora porikha kora hobole jongol te loi jaise. 2Aru Tar pora chalis din aru chalis rati upaas thaki kene, Tar bhuk lagise. 3Porikha diya jon ahhi kene koise, “Jodi Tumi Isor laga Putro ase, tene hole eitu pathor khan ke roti hobole kobi.”
4Kintu Tar pora jawab di koise, “Likha ase, ‘Manuh khan khali roti pora jinda nathake, kintu amar Pitri laga mukh pora ula sob kotha pora.’”
5Tetiya saitan pora Tar ke pobitro sheher te loi jaise, aru mondir laga sob pora uncha jaga te Tar ke khara korise, 6aru Tar ke koise, “Jodi Tumi Isor laga Putro ase, tene hole nijor ke niche phelai dibi, kilemane Shastro te likha ase, ‘Tar laga sorgoduth khan ke Tumar nimite hukum dibo, aru tarkhan pora Tumar ke hath te uthai lobo, titia Tumar bhori pathor te na-lagibo.’”
7Jisu pora Tar ke koise, “Aru bhi likha ase, ‘Tumi Tumar Pitri ke porikha nakoribi.’”
8Aru saitan pora Tar ke ekta bisi uncha pahar te loi jaise, aru prithibi laga sob rajyo aru tarkhan laga mohima Tar ke dikhaise. 9Tai pora Tar ke koise, “Jodi Tumi niche jhuki kene moi ke aradhana koribi, tene hole eitu sob moi Tumar ke dibo.”
10Tetiya Jisu pora Tar ke koise, “Jabi, Saitan! Kilemane Shastro te likha ase, ‘Tumar Pitri ke aradhana koribi, aru khali Tar he sewa koribi.’”
11Tetiya saitan pora Tar ke chari dise, aru achanak sorgoduth khan ahhi kene Tar ke sai dise.
Galilee te Puhor Ulaise
12Etiya John ke bandhi rakhise koi kene huni kene, Tai Galilee te jai jaise. 13Tai pora Nazareth chari kene, Zebulun aru Naphtali laga desh te, samundar kinar te thaka Capernaum te thakise, 14titia bhabobadi Isaiah pora kowa kotha tu purah hobole nimite: 15“Zebulun laga desh aru Naphtali laga desh, samundar laga rasta, Jordan laga paar te, Porjati khan laga Galilee, 16andhera te thaka manuh khan ekta dangor puhor dikhise, aru mrityu laga desh aru chaya te thaka khan nimite, tarkhan uporte puhor ulaise.”
17Hei homoi pora Jisu prachar koribole shuru korise, aru koise, “Mon ghura bi, kilemane amar Pitri laga rajyo usor te ase.”
Jisu pora Tar prothom chella khan ke matise
18Galilee Samundar kinar te berai thaka homoi te, Tai pora duijon bhai ke dikhise, Peter mata Simon aru tar bhai Andrew, samundar te jaal phelai thaka—tarkhan maas dhora manuh thakise.
19Aru Tai pora tarkhan ke koise, “Moi laga pichete ahhibi, aru Moi tumikhan ke manuh dhora manuh bonai dibo.”
20Joldi tarkhan nijor jaal chari kene Tar laga pichete jaise. 21Ta pora aru age jai kene, Tai pora aru duijon bhai ke dikhise—Zebedee laga chokra James aru tar bhai John—tarkhan laga pitri Zebedee logot naw te, jaal bhal kori thaka, aru tarkhan ke matise. 22Joldi tarkhan naw aru nijor pitri ke chari kene Tar laga pichete jaise.
Pitri pora Tar Putro dwara bhal korise
23Tai pora pura Galilee te berai, tarkhan laga prathana ghor khan te sikhai, rajyo laga susamachar prachar kori, aru manuh khan majot te sob bemar aru dukh bhal kori thakise. 24Tar laga khobor pura Syria te punchi jaise. Tarkhan pora bemar thaka sob manuh ke Tar logot anise—alag alag bemar aru dukh pora dhora, bhoot pora dukh paa, mirgi bemar, aru shorir chalai nuwara—aru Tai pora tarkhan ke bhal kori dise. 25Dangor bhir khan Galilee, Decapolis, Jerusalem, Judea, aru Jordan laga paar pora Tar laga pichete jaise. a a v25 Decapolis tu Galilee Samundar laga purab aru dakshin-purab te thaka dos-ta sheher laga ekta jhuND thakise, jun khan bisi bhag Porjati khan laga thakise.