ማቴዎስ 4

4 ¹ከዚያም መንፈስ ቅዱስ ኢየሱስን በዲያብሎስ ይፈተን ዘንድ ወደ ምድረ በዳ መራው። ²አርባ ቀንና አርባ ሌሊት ከጦመ በኋላ፣ ተራበ። ³ፈታኙም ቀርቦ፣ “የእግዚአብሔር ልጅ ከሆንህ፣ እነዚህ ድንጋዮች እንጀራ እንዲሆኑ እዘዝ” አለው።

⁴እርሱ ግን መልሶ፣ “‘ሰው በእንጀራ ብቻ ሳይሆን፣ ከአባታችን አፍ በሚወጣ ቃል ሁሉ እንጂ አይኖርም’ ተብሎ ተጽፎአል” አለ።

⁵ከዚያም ዲያብሎስ ወደ ቅድስቲቱ ከተማ ወሰደው፤ በቤተ መቅደሱ ጫፍ ላይ አቆመው፤ ⁶እንዲህም አለው፤ “የእግዚአብሔር ልጅ ከሆንህ፣ ራስህን ወደ ታች ወርውር፤ መጽሐፍ፣ ‘ስለ አንተ መላእክቱን ያዝዛል፤ እግርህም በድንጋይ እንዳይሰናከል በእጆቻቸው ያነሡሃል’ ይላልና።”

⁷ኢየሱስም፣ “‘አባትህን አትፈታተን’ ተብሎ ደግሞ ተጽፎአል” አለው።

⁸ደግሞ ዲያብሎስ እጅግ ወደ ረጅም ተራራ ወሰደው፤ የዓለምን መንግሥታት ሁሉና ክብራቸውን አሳየው። ⁹እንዲህም አለው፤ “ተደፍተህ ብታመልከኝ፣ ይህን ሁሉ እሰጥሃለሁ።”

¹⁰ከዚያም ኢየሱስ፣ “ሂድ፣ ሰይጣን! ‘አባትህን አምልክ፤ እርሱንም ብቻ አገልግል’ ተብሎ ተጽፎአልና” አለው።

¹¹ከዚያም ዲያብሎስ ተወው፤ ወዲያውም መላእክት መጥተው አገለገሉት።

ብርሃኑ በገሊላ ወጣ

¹²ዮሐንስ እንደ ተያዘ በሰማ ጊዜ፣ ወደ ገሊላ ተመለሰ። ¹³ናዝሬትን ትቶ፣ በባሕር አጠገብ በዛብሎንና በንፍታሌም ግዛት ባለችው በቅፍርናሆም ተቀመጠ፤ ¹⁴ይህም በነቢዩ በኢሳይያስ የተነገረው ይፈጸም ዘንድ ሆነ፤ ¹⁵“የዛብሎን ምድርና የንፍታሌም ምድር፣ የባሕር መንገድ፣ ከዮርዳኖስ ማዶ፣ የአሕዛብ ገሊላ፣ ¹⁶በጨለማ የተቀመጠው ሕዝብ ታላቅ ብርሃን አየ፤ በሞት አገርና ጥላ ለተቀመጡትም፣ በእነርሱ ላይ ብርሃን ወጣ።”

¹⁷ከዚያን ጊዜ ጀምሮ ኢየሱስ፣ “ንስሐ ግቡ፤ የአባታችን መንግሥት ቀርባለችና” ብሎ መስበክ ጀመረ።

ኢየሱስ የመጀመሪያ ደቀ መዛሙርቱን ጠራ

¹⁸በገሊላ ባሕር አጠገብ ሲመላለስ፣ ዐሣ አጥማጆች የነበሩትን ጴጥሮስ የተባለውን ስምዖንንና ወንድሙን እንድርያስን፣ ሁለቱን ወንድማማቾች መረባቸውን ወደ ባሕር ሲጥሉ አየ።

¹⁹እርሱም፣ “ተከተሉኝ፤ የሰው አጥማጆች አደርጋችኋለሁ” አላቸው።

²⁰ወዲያውም መረባቸውን ትተው ተከተሉት። ²¹ከዚያም አልፎ ሄዶ፣ ሌሎች ሁለት ወንድማማቾችን፣ የዘብዴዎስን ልጅ ያዕቆብንና ወንድሙን ዮሐንስን፣ ከአባታቸው ከዘብዴዎስ ጋር በጀልባ ሳሉ መረባቸውን ሲጠግኑ አየ፤ ጠራቸውም። ²²ወዲያውም ጀልባይቱንና አባታቸውን ትተው ተከተሉት።

አባታችን በልጁ በኩል ፈወሰ

²³ኢየሱስም በምኵራባቸው እያስተማረ፣ የመንግሥትን ወንጌል እየሰበከ፣ በሕዝቡ መካከል ያለውን በሽታና ደዌ ሁሉ እየፈወሰ፣ በገሊላ ሁሉ ዞረ። ²⁴ዝናውም በሶርያ ሁሉ ተሰማ። በልዩ ልዩ በሽታና ሥቃይ የተያዙትን፣ በአጋንንት የተጠቁትን፣ የሚጥል በሽታ ያለባቸውንና ሽባዎችን፣ የታመሙትን ሁሉ ወደ እርሱ አመጡለት፤ እርሱም ፈወሳቸው። ²⁵ከገሊላ፣ ከዐሥሩ ከተማ፣ ከኢየሩሳሌም፣ ከይሁዳና ከዮርዳኖስ ማዶ ታላቅ ሕዝብ ተከተለው። ^a a v25 ዐሥሩ ከተማ (ዴካፖሊስ) በአብዛኛው የአሕዛብ የሆኑ ዐሥር ከተሞች ስብስብ ሲሆን፣ ከገሊላ ባሕር በስተ ምሥራቅና በደቡብ ምሥራቅ ይገኝ ነበር።