ማቴዎስ 5

5 ¹ኢየሱስም ሕዝቡን ባየ ጊዜ ወደ ተራራ ወጣ፤ በተቀመጠም ጊዜ ደቀ መዛሙርቱ ወደ እርሱ መጡ። ²አፉንም ከፍቶ እንዲህ ሲል ያስተምራቸው ጀመር፦ ^a a v2 በተራራው ስብከት ሁሉ ላይ፣ ኢየሱስ ተከታዮቹን እርሱ ራሱ ወደሚያውቀው ከአብ ጋራ ወዳለው ቅርበት ይስባቸዋል፤ ደጋግሞም “በሰማይ ያለው አባታችሁ” እያለ ይናገራል።

³“በመንፈስ ድኾች የሆኑ ብፁዓን ናቸው፤ የአባታችን መንግሥት የእነርሱ ናትና። ⁴የሚያዝኑ ብፁዓን ናቸው፤ መጽናናትን ያገኛሉና። ⁵የዋሆች ብፁዓን ናቸው፤ ምድርን ይወርሳሉና። ⁶ጽድቅን የሚራቡና የሚጠሙ ብፁዓን ናቸው፤ ይጠግባሉና። ⁷መሐሪዎች ብፁዓን ናቸው፤ ምሕረትን ያገኛሉና። ⁸ልባቸው ንጹሕ የሆነ ብፁዓን ናቸው፤ አባታችንን ያዩታልና። ⁹የሚያስታርቁ ብፁዓን ናቸው፤ የአባታችን ልጆች ይባላሉና። ¹⁰ስለ ጽድቅ የሚሰደዱ ብፁዓን ናቸው፤ የአባታችን መንግሥት የእነርሱ ናትና።

¹¹“ሰዎች ስለ እኔ ብለው በሚሰድቧችሁ፣ በሚያሳድዷችሁና በእናንተ ላይ ክፉውን ሁሉ በሐሰት በሚናገሩባችሁ ጊዜ ብፁዓን ናችሁ። ¹²ዋጋችሁ በሰማይ ታላቅ ነውና ደስ ይበላችሁ፤ ሐሴትም አድርጉ፤ ከእናንተ በፊት የነበሩትን ነቢያት እንዲሁ አሳድደዋቸዋልና።

እናንተ ጨውና ብርሃን ናችሁ

¹³“እናንተ የምድር ጨው ናችሁ። ጨው ጣዕሙን ቢያጣ ግን እንደ ገና በምን ይጣፍጣል? ወደ ውጭ ተጥሎ በሰዎች ከመረገጥ በቀር ወደ ፊት ለምንም አይጠቅምም።

¹⁴“እናንተ የዓለም ብርሃን ናችሁ። በተራራ ላይ የተቀመጠች ከተማ ልትሰወር አትችልም። ¹⁵ማንም መብራት አብርቶ ከዕንቅብ በታች አያስቀምጥም፤ ነገር ግን በቤት ውስጥ ላሉ ሁሉ እንዲያበራ በመቅረዝ ላይ ያስቀምጠዋል። ¹⁶እንዲሁ ሰዎች መልካሙን ሥራችሁን አይተው በሰማይ ያለውን አባታችሁን እንዲያከብሩ፣ ብርሃናችሁ በፊታቸው ይብራ።

ወልድ ሕግን ይፈጽማል

¹⁷“ሕግንና ነቢያትን ለመሻር የመጣሁ አይምሰላችሁ፤ ልፈጽም እንጂ ለመሻር አልመጣሁም። ¹⁸እውነት እላችኋለሁ፤ ሰማይና ምድር እስኪያልፉ ድረስ፣ ሁሉም እስኪፈጸም ድረስ፣ ከሕግ አንዲት ፊደል ቢሆን አንዲት ነጥብ አታልፍም። ¹⁹ስለዚህ ከእነዚህ ከታናናሾቹ ትእዛዛት አንዲቱን የሚሽርና ሌሎችን እንዲሁ የሚያስተምር ማንም ቢሆን በአባታችን መንግሥት ታናሽ ይባላል፤ የሚጠብቃቸውና የሚያስተምራቸው ግን በአባታችን መንግሥት ታላቅ ይባላል። ²⁰እላችኋለሁና፤ ጽድቃችሁ ከጻፎችና ከፈሪሳውያን ጽድቅ ካልበለጠ በቀር፣ ወደ አባታችን መንግሥት ከቶ አትገቡም።

አስቀድመህ ከወንድምህ ጋራ ታረቅ

²¹“ለቀደሙት ሰዎች፣ ‘አትግደል፤ የሚገድል ሁሉ ለፍርድ ይጋለጣል’ እንደ ተባለ ሰምታችኋል። ²²እኔ ግን እላችኋለሁ፤ በወንድሙ ላይ የሚቈጣ ሁሉ ለፍርድ ይጋለጣል። ወንድሙን የሚሰድብ ለሸንጎ ይጋለጣል፤ ‘አንተ ሞኝ!’ የሚል ደግሞ ለእሳት ገሃነም ይጋለጣል።

²³“ስለዚህ ስጦታህን በመሠዊያው ላይ ስታቀርብ፣ ወንድምህ በአንተ ላይ የያዘው ነገር እንዳለ በዚያ ብታስታውስ፣ ²⁴ስጦታህን በዚያ በመሠዊያው ፊት ተወው፤ አስቀድመህ ሄደህ ከወንድምህ ጋራ ታረቅ፤ ከዚያም መጥተህ ስጦታህን አቅርብ። ²⁵ከከሳሽህ ጋራ በመንገድ ላይ ሳለህ ፈጥነህ ታረቅ፤ አለዚያ ለዳኛው አሳልፎ ይሰጥህ ይሆናል፤ ዳኛውም ለሎሌው፣ አንተም ወደ ወኅኒ ትጣል ይሆናል። ²⁶እውነት እልሃለሁ፤ የመጨረሻውን ሳንቲም እስክትከፍል ድረስ ከዚያ ከቶ አትወጣም።

ንጽሕና ከልብ ይጀምራል

²⁷“‘አታመንዝር’ እንደ ተባለ ሰምታችኋል። ²⁸እኔ ግን እላችኋለሁ፤ ወደ ሴት በፍትወት የሚመለከት ሁሉ፣ በልቡ አስቀድሞ ከእርሷ ጋራ አመንዝሯል። ²⁹ቀኝ ዐይንህ የሚያሰናክልህ ከሆነ፣ አውጥተህ ከአንተ ጣለው፤ ሰውነትህ ሁሉ ወደ ገሃነም ከሚጣል ይልቅ ከአካልህ አንዱ ቢጠፋ ይሻልሃልና። ³⁰ቀኝ እጅህ ኀጢአት እንድትሠራ የሚያደርግህ ከሆነ፣ ቈርጠህ ከአንተ ጣለው፤ ሰውነትህ ሁሉ ወደ ገሃነም ከሚገባ ይልቅ ከአንተ አንዱ ክፍል ቢጠፋ ይሻልሃልና።

³¹“ደግሞም፣ ‘ሚስቱን የሚፈታ ሁሉ የፍች ጽሑፍ ይስጣት’ ተብሏል። ³²እኔ ግን እላችኋለሁ፤ ስለ ዝሙት ካልሆነ በቀር ሚስቱን የሚፈታ ሁሉ አመንዝራ ያደርጋታል፤ የተፈታችውንም ሴት የሚያገባ ሁሉ ያመነዝራል።

አዎ ያልኸው አዎ ይሁን

³³“ደግሞም ለቀደሙት ሰዎች፣ ‘መሐላህን አታፍርስ፤ ለአባታችን ፈጽመው’ እንደ ተባለ ሰምታችኋል። ³⁴እኔ ግን እላችኋለሁ፤ ከቶ አትማሉ፤ በሰማይ አይሁን፤ የአባታችን ዙፋን ነውና፤ ³⁵በምድርም አይሁን፤ የእግሩ መረገጫ ነውና፤ በኢየሩሳሌምም አይሁን፤ የታላቁ ንጉሥ ከተማ ናትና። ³⁶በራስህም አትማል፤ አንዲትን ጠጉር እንኳ ነጭ ወይም ጥቁር ልታደርግ አትችልምና። ³⁷‘አዎ’ ያላችሁት ‘አዎ’፣ ‘አይሆንም’ ያላችሁትም ‘አይሆንም’ ይሁን፤ ከዚህ የሚበልጠው ከክፉው ነው።

ከዐይን ስለ ዐይን አልፋችሁ ሂዱ

³⁸“‘ዐይን ስለ ዐይን፣ ጥርስ ስለ ጥርስ’ እንደ ተባለ ሰምታችኋል። ³⁹እኔ ግን እላችኋለሁ፤ ክፉ ሰውን አትቃወሙ። ቀኝ ጕንጭህን በጥፊ የሚመታህ ቢኖር፣ ሌላውንም ጕንጭህን አዙርለት። ⁴⁰ሊከስህና እጀ ጠባብህን ሊወስድ የሚፈልግ ቢኖር፣ ካባህንም ተውለት። ⁴¹ማንም አንድ ምዕራፍ ሂድ ብሎ ቢያስገድድህ፣ ከእርሱ ጋራ ሁለት ሂድ። ⁴²የሚለምንህን ስጥ፤ ከአንተም ሊበደር የሚፈልገውን አትከልክል።

እርሱ እንደሚወድ ጠላቶቻችሁን ውደዱ

⁴³“‘ባልንጀራህን ውደድ፤ ጠላትህንም ጥላ’ እንደ ተባለ ሰምታችኋል። ⁴⁴እኔ ግን እላችኋለሁ፤ ጠላቶቻችሁን ውደዱ፤ ለሚያሳድዷችሁም ጸልዩ፤ ⁴⁵በሰማይ ያለው አባታችሁ ልጆች ትሆኑ ዘንድ፤ እርሱ ፀሐዩን በክፉዎችና በበጎዎች ላይ ያወጣልና፤ ዝናቡንም በጻድቃንና በዐመፀኞች ላይ ያዘንባልና። ⁴⁶የሚወዷችሁን ብትወዱ፣ ምን ዋጋ አላችሁ? ቀራጮች እንኳ እንዲሁ አያደርጉምን? ⁴⁷ወንድሞቻችሁን ብቻ ሰላም ብትሉ፣ ከሌሎች ይልቅ ምን ትበልጣላችሁ? አሕዛብ እንኳ እንዲሁ አያደርጉምን? ⁴⁸ስለዚህ የሰማዩ አባታችሁ ፍጹም እንደ ሆነ፣ እናንተም ፍጹማን ሁኑ።”