Konetisyei Jeso eng' Tulweet
Kotebee Jeso eng' tulweet ak koguure che riirei, che ng'wandotiin, ak che kiusei beruuratiin, yeityo kointe ng'atuutik koriich: kong'eetee rumiichet agoi angeet, kong'eetee sokseet agoi geret, kong'eetee yosyoet agoi ng'olyoot ne lelach. Chametap puunik ne yaei lagok koegu ko uu Kwandanywa.
5 1Ye kingo keer Jeso tuiyosyek, kotogos tulweet; ak ye kingo kotebee, konyoonji tyongikyik. 2Ak koyaat kutinnyi ak kotoi konetisye icheek, kole: a a v2 Eng' konetisyetap tulweet komugul, ibendi Jeso piik che isubei si koek neegit ak Kwanda ko uu ineendet ineegei ne ngen, kong'alaalei kokoi agobo “Kwandang'wong' ne mi kipsengwet.”
3“Beruuratiin che poorotiin eng' muguleldo, amu po icheek laitornatetap Kwandanyo. 4Beruuratiin che riirotiin, amu kibeekyin icheek. 5Beruuratiin che ng'wandotiin, amu kitunji icheek ng'wony. 6Beruuratiin che amei rubeet ak melelda agobo imanda, amu kibiyong'u icheek. 7Beruuratiin che tinyei rireenet, amu kiriirin icheek. 8Beruuratiin che tiliileen muguleldo, amu keerei icheek Kwandanyo. 9Beruuratiin che yaei kaalyeet, amu kigurin lagogap Kwandanyo. 10Beruuratiin che kiusei agobo imanda, amu po icheek laitornatetap Kwandanyo.
11“Beruuratok ye teweerenok piik, ak koonotok, ak komwae tuguuk tugul che yaach che lembenot agaigaige, agobo anee. 12Oboiboi ak oboiboiyat, amu oo kooniseng'wong' eng' kipsengwet, amu ki koonot ko uu nooto maotik che ki mi taing'wong'.
Oegu Munyan ak Lapkeiyet
13“Oegu okweek munyugap ng'wony. Ago ngo put munyuk anyinynatennyi, kimunyang'u au kogeny? Mararaanit anyun kiy age tugul, ago kiwiri oldo ak kilugui piik.
14“Oegu okweek lapkeiyetap ng'wony. Ma kimuuchi koun nganaseet ne tononi parak tulweet. 15Ma mi chii ne naam tait ak konde oriit, ago indoi kitonget si koluuchi piik tugul che mi ko. 16Ko uu nooto, ingokweng'so lapkeiyeng'wong' eng' taitap piik, si koger poisyonikwok che miach ak kotoroor Kwandang'wong' ne mi kipsengwet.
Yanatei Weeriit Ng'atutik
17“Amabwaat ale ki anyonu si abeel Ng'atuutik anan Maotik; ma ki anyonu si abeel, ago si ayanat. 18Amu amwaiwok iman ale, agoi kobata kipsengwet ak ng'wony, ma kobata siruutyet agenge, anan tikeetap siruutyet age tugul, eng' Ng'atuutik, agoi koyaak tuguuk tugul. 19Age tugul anyun ne beel agenge eng' ng'atuutichu che mengeechen ak koneet alak ko uu nooto, kigurin ne ming'in eng' laitornatetap Kwandanyo; ago age tugul ne rib ak koneet, kigurin ne oo eng' laitornatetap Kwandanyo. 20Amu amwaiwok ale, ngot ma siirei imandang'wong' ne po siriik ak Pharisaik, ma ochut laitornatetap Kwandanyo.
Tuyo ak Tupcheng'ung' Taang'
21“Kagogas okweek kele kimwachi pichu che kolondo kole, ‘Amebar chii; age tugul ne par chii ko nyolu kirwooget.’ 22Ago amwaiwok ale: age tugul ne nereekyi tupchennyi ko nyolu kirwooget. Age tugul ne teweer tupchennyi ko nyolu kapkirwooget, ak age tugul ne le, ‘Inyee abusat!’ ko nyolu maatap Gehenna ne koroom.
23“Ngot anyun iib kagoochineng'ung' oldap kagoochinet, ak ibwaat yooto ale tinyei tupcheng'ung' kiy age ne agaige inyee, 24bagaakta kagoochineng'ung' yooto eng' taitap oldap kagoochinet, ui itui ak tupcheng'ung' taang', yeityo inyoo iib kagoochineng'ung'. 25Tui ak ng'oogindeng'ung' ichogune, ye kita omi ooreet kobooto ineendet, si matun kogoono inyee kirwoogindet, ak kirwoogindet kogoono kiptaiyat, ak kiwirin korgoreet. 26Amwaiwok iman ale, ma imanda yooto agoi iyan dinarit ne let.
Toi Tililindo eng' Muguleldo
27“Kagogas okweek kele kimwa kole, ‘Amayae adulam.’ 28Ago amwaiwok ale: age tugul ne geer kwony eng' mageet, ko kagoyai adulam ak ineendet eng' muguleldonyi. 29Ngot inachin kondang'ung' ne po tai, ng'at ak iwir oldo; amu karaaran ibeeti agenge eng' poortang'ung', ne kowiir poortang'ung' komugul Gehenna. 30Ngot inachin eung'ung' ne po tai, til ak iwir oldo. Karaaran ibeeti agenge eng' inyee, ne kowendi poortang'ung' komugul Gehenna.
31“Kimwa agine kole, ‘Age tugul ne oonei osotyonnyi, ingogoochi sireetap peesyet.’ 32Amwaiwok ale: age tugul ne oonei osotyonnyi, kobatee agobo kobogorisyek, ko yaei ineendet koname adulam; ak age tugul ne tun kwony ne ki kipeesye ko yaei adulam.
Ingoek ‘Ee’-ng'wong' koek ‘Ee’
33“Agine, kagogas okweek kele kimwachi pichu che kolondo kole: ‘Ameutyee kaarortaet, ago iyanjin Kwandanyo.’ 34Ago amwaiwok ale, amaiyas kobatee: amat iiyas eng' kipsengwet, amu ko keetitap laitornatetap Kwandanyo, 35anan eng' ng'wony, amu ko ng'echereetap keelyekyik, anan eng' Jerusalem, amu ko nganaseetap Laitoryat ne oo. 36Ak amat iiyas eng' metingung', amu ma imuuchi iyai suumeek agenge koek ne leelach anan ne tuiyan. 37Ingoek ‘Ee’-ng'wong' koek ‘Ee,’ ak ‘Achicha’-ng'wong' koek ‘Achicha’; kiy age tugul ne siirei chooto kobunu ne ya.
Siirtos Konda eng' Konda
38“Kagogas okweek kele kimwa kole, ‘Konda eng' konda ak keldet eng' keldet.’ 39Ago amwaiwok ale: amatononchin chiito ne ya. Ngo rabach chii cheegoong'ung' ne po tai, iweechi age agine. 40Ngot mach chii age tugul kong'aalun si koip tuning'ung', ingonyoor agine ngoring'ung'. 41Ak ngo kugalin chii age tugul si iwe mileet agenge, iwe ak ineendet mileetap aeng'. 42Goochi age tugul ne soomin, ak amat iweekyi ne machei kobesen kobun inyee.
Ochamei Puuniguk ko uu ye Yaei Ineendet
43“Kagogas keele ki mwa, ‘Ichame chiitap kokweng'ung' ak iweche puuneng'ung'.’ 44Ago amwaiwok ale, ochame puuniguk ak osaae agobo che usook, 45si oegu lagogap Kwandang'wong' ne mi kipsengwet, amu itei asiistanyi kobiit eng' che yaach ak che karaaran, ak kosendi ropta eng' che po imanda ak che ma po imanda. 46Ngo ochame che chamoogin, keljino nee nooto? Ma yaei agot taagigap aisuruut ko uu nooto? 47Ngo ogat tupchosyekwok kityo, nee ne oyaei kosiir alak? Ma yaei agot Pororyosyek ko uu nooto? 48Oegu anyun che ititaat, ko uu ye ititaat Kwandang'wong' ne mi kipsengwet.”