Matiu 5

5 ¹Nígbà tí Jesu rí ọ̀pọ̀ ènìyàn, ó gun orí òkè; nígbà tí ó jókòó, àwọn ọmọ-ẹ̀hìn rẹ̀ wá sọ́dọ̀ rẹ̀. ²Ó sì ya ẹnu rẹ̀, ó bẹ̀rẹ̀ sí kọ́ wọn, ó wí pé: ^a a v2 Jákèjádò Ìwàásù Orí Òkè, Jesu ń fa àwọn ọmọlẹ́yìn rẹ̀ wọ inú ìjẹ́fẹ́ kan náà pẹ̀lú Baba tí òun fúnra rẹ̀ mọ̀, ó ń sọ̀rọ̀ léraléra nípa “Baba yín tí ń bẹ ní ọ̀run.”

³“Ìbùkún ni fún àwọn tálákà ní ẹ̀mí, nítorí tiwọn ni ìjọba Baba wa. ⁴Ìbùkún ni fún àwọn tí ń ṣọ̀fọ̀, nítorí a ó tù wọ́n nínú. ⁵Ìbùkún ni fún àwọn ọlọ́kàn tútù, nítorí wọn yóò jogún ilẹ̀ ayé. ⁶Ìbùkún ni fún àwọn tí ebi ń pa tí òǹgbẹ sì ń gbẹ wọ́n nítorí òdodo, nítorí a ó tẹ́ wọn lọ́rùn. ⁷Ìbùkún ni fún àwọn aláàánú, nítorí a ó ṣàánú wọn. ⁸Ìbùkún ni fún àwọn ọlọ́kàn mímọ́, nítorí wọn yóò rí Baba wa. ⁹Ìbùkún ni fún àwọn onílàjà, nítorí a ó pè wọ́n ní ọmọ Baba wa. ¹⁰Ìbùkún ni fún àwọn tí a ń ṣe inúnibíni sí nítorí òdodo, nítorí tiwọn ni ìjọba Baba wa.

¹¹“Ìbùkún ni fún yín nígbà tí àwọn ènìyàn bá gàn yín, tí wọ́n ṣe inúnibíni sí yín, tí wọ́n sì ń parọ́ onírúurú ibi sí yín nítorí mi. ¹²Ẹ yọ̀, kí inú yín sì dùn, nítorí èrè yín pọ̀ ní ọ̀run, nítorí bẹ́ẹ̀ gẹ́gẹ́ ni wọ́n ṣe inúnibíni sí àwọn wòlíì tí ó wà ṣáájú yín.

Ẹ̀yin Ni Iyọ̀ àti Ìmọ́lẹ̀

¹³“Ẹ̀yin ni iyọ̀ ayé. Ṣùgbọ́n bí iyọ̀ bá di aláìládùn, báwo ni a ṣe lè mú un dùn padà? Kò wúlò fún ohunkóhun mọ́ bí kò ṣe láti dà á nù, kí àwọn ènìyàn sì tẹ̀ ẹ́ mọ́lẹ̀.

¹⁴“Ẹ̀yin ni ìmọ́lẹ̀ ayé. Ìlú tí ó wà lórí òkè kò lè fi ara pamọ́. ¹⁵Kò sí ẹni tí ó tan fìtílà, tí yóò gbé e sí abẹ́ òsùwọ̀n, bí kò ṣe pé yóò gbé e kalẹ̀ sórí ọ̀pá fìtílà, kí ó lè tan ìmọ́lẹ̀ fún gbogbo ẹni tí ń bẹ nínú ilé. ¹⁶Bákan náà, ẹ jẹ́ kí ìmọ́lẹ̀ yín mọ́lẹ̀ níwájú àwọn ènìyàn, kí wọ́n lè rí iṣẹ́ rere yín, kí wọ́n sì yin Baba yín tí ń bẹ ní ọ̀run lógo.

Ọmọ náà Mú Òfin Ṣẹ

¹⁷“Ẹ má ṣe rò pé mo wá láti pa Òfin tàbí àwọn Wòlíì rẹ́—èmi kò wá láti pa wọ́n rẹ́, bí kò ṣe láti mú wọn ṣẹ. ¹⁸Nítorí lóòótọ́ ni mo wí fún yín pé: títí ọ̀run àti ayé yóò fi kọjá, lẹ́tà kan, àmì kan, kì yóò kọjá kúrò nínú Òfin, títí gbogbo rẹ̀ yóò fi parí. ¹⁹Nítorí náà, ẹnikẹ́ni tí ó bá rú ọ̀kan nínú àwọn òfin kékeré wọ̀nyí, tí ó sì kọ́ àwọn ẹlòmíràn bẹ́ẹ̀, ni a ó pè ní ẹni kékeré jù nínú ìjọba Baba wa; ṣùgbọ́n ẹnikẹ́ni tí ó bá pa wọ́n mọ́, tí ó sì kọ́ni, ni a ó pè ní ẹni ńlá nínú ìjọba Baba wa. ²⁰Nítorí mo wí fún yín pé, bí òdodo yín kò bá ju ti àwọn akọ̀wé àti àwọn Farisi lọ, ẹ kì yóò wọ ìjọba Baba wa láé.

Kọ́kọ́ Bá Arákùnrin Rẹ Làjà

²¹“Ẹ ti gbọ́ pé a ti wí fún àwọn ará ìgbàanì pé, ‘Ìwọ kò gbọdọ̀ pànìyàn; ẹnikẹ́ni tí ó bá pànìyàn yóò wà lábẹ́ ìdájọ́.’ ²²Ṣùgbọ́n mo wí fún yín pé: ẹnikẹ́ni tí ó bá bínú sí arákùnrin rẹ̀ yóò wà nínú ewu ìdájọ́. Ẹnikẹ́ni tí ó bá gan arákùnrin rẹ̀ yóò wà nínú ewu ìgbìmọ̀, ẹnikẹ́ni tí ó bá sì wí pé, ‘Ìwọ òmùgọ̀!’ yóò wà nínú ewu ọ̀run àpáàdì oníná.

²³“Nítorí náà, bí ìwọ bá ń mú ọrẹ rẹ wá síbi pẹpẹ, tí ìwọ sì rántí níbẹ̀ pé arákùnrin rẹ ní ohun kan sí ọ, ²⁴fi ọrẹ rẹ sílẹ̀ níbẹ̀ níwájú pẹpẹ, kọ́kọ́ lọ bá arákùnrin rẹ làjà, lẹ́yìn náà kí o wá fi ọrẹ rẹ rúbọ. ²⁵Yára bá ẹni tí ó fi ẹ̀sùn kàn ọ́ làjà, nígbà tí ẹ ṣì wà ní ọ̀nà pẹ̀lú rẹ̀, kí ó má bàa fà ọ́ lé onídàájọ́ lọ́wọ́, kí onídàájọ́ fà ọ́ lé olùṣọ́ lọ́wọ́, kí a sì sọ ọ́ sínú ọgbà ẹ̀wọ̀n. ²⁶Lóòótọ́ ni mo wí fún ọ, ìwọ kì yóò jáde láé, àfi bí o bá ti san owó ẹyọ tí ó kẹ́yìn.

Ìwà Mímọ́ Ń Bẹ̀rẹ̀ Nínú Ọkàn

²⁷“Ẹ ti gbọ́ pé a ti wí pé, ‘Ìwọ kò gbọdọ̀ ṣe panṣágà.’ ²⁸Ṣùgbọ́n mo wí fún yín pé: ẹnikẹ́ni tí ó bá fi ojú ìfẹ́kúfẹ̀ẹ́ wo obìnrin ti ṣe panṣágà pẹ̀lú rẹ̀ nínú ọkàn rẹ̀ ná. ²⁹Bí ojú ọ̀tún rẹ bá mú ọ kọsẹ̀, fà á yọ, kí o sì sọ ọ́ nù—ó sàn kí o pàdánù ẹ̀yà ara rẹ kan ju kí a sọ gbogbo ara rẹ sínú ọ̀run àpáàdì lọ. ³⁰Bí ọwọ́ ọ̀tún rẹ bá mú ọ dẹ́ṣẹ̀, gé e kúrò, kí o sì sọ ọ́ nù. Ó sàn kí o pàdánù ẹ̀yà kan nínú rẹ ju kí gbogbo ara rẹ lọ sínú ọ̀run àpáàdì lọ.

³¹“A sì tún wí pé, ‘Ẹnikẹ́ni tí ó bá kọ aya rẹ̀ sílẹ̀ gbọdọ̀ fún un ní ìwé ìkọ̀sílẹ̀.’ ³²Mo wí fún yín pé: ẹnikẹ́ni tí ó bá kọ aya rẹ̀ sílẹ̀, àfi nítorí ẹ̀ṣẹ̀ àgbèrè, ó mú kí ó di ẹni tí ó ṣe panṣágà; ẹnikẹ́ni tí ó bá sì fẹ́ obìnrin tí a kọ̀ sílẹ̀, ó ṣe panṣágà.

Jẹ́ Kí Bẹ́ẹ̀ni Rẹ Jẹ́ Bẹ́ẹ̀ni

³³“Lẹ́ẹ̀kan sí i, ẹ ti gbọ́ pé a ti wí fún àwọn ará ìgbàanì pé: ‘Ìwọ kò gbọdọ̀ da ìbúra rẹ—ṣùgbọ́n mú un ṣẹ fún Baba wa.’ ³⁴Ṣùgbọ́n mo wí fún yín pé, ẹ má ṣe búra rárá: ìbá à ṣe fi ọ̀run búra, nítorí ìtẹ́ Baba wa ni, ³⁵ẹ má sì fi ayé búra, nítorí àpótí ìtìsẹ̀ fún ẹsẹ̀ rẹ̀ ni, ẹ má sì fi Jerusalemu búra, nítorí ìlú ọba ńlá ni. ³⁶Ẹ má sì fi orí yín búra, nítorí ẹ kò lè sọ irun ẹyọ kan di funfun tàbí dúdú. ³⁷Ẹ jẹ́ kí ‘Bẹ́ẹ̀ni’ yín jẹ́ ‘Bẹ́ẹ̀ni,’ àti ‘Bẹ́ẹ̀kọ́’ yín, ‘Bẹ́ẹ̀kọ́’; ohunkóhun tí ó bá kọjá èyí láti ọ̀dọ̀ ẹni ibi ni ó ti wá.

Kọjá Ojú fún Ojú

³⁸“Ẹ ti gbọ́ pé a ti wí pé, ‘Ojú fún ojú àti eyín fún eyín.’ ³⁹Ṣùgbọ́n mo wí fún yín pé: ẹ má ṣe kọ ojú ìjà sí ẹni ibi. Bí ẹnìkan bá gbá ọ ní ẹ̀rẹ̀kẹ́ ọ̀tún, yí èkejì padà sí i pẹ̀lú. ⁴⁰Bí ẹnìkan bá fẹ́ fi ọ́ sùn, kí ó sì gba ẹ̀wù àwọ̀tẹ́lẹ̀ rẹ, jẹ́ kí ó gba agbádá rẹ pẹ̀lú. ⁴¹Bí ẹnìkan bá sì fi ipá mú ọ láti rìn ọ̀nà kan, bá a rìn ọ̀nà méjì. ⁴²Fi fún ẹnikẹ́ni tí ó bá béèrè lọ́wọ́ rẹ, má sì ṣe kọ ẹni tí ó bá fẹ́ yá nǹkan lọ́wọ́ rẹ sílẹ̀.

Fẹ́ Àwọn Ọ̀tá Rẹ Bí Òun Ti Ń Ṣe

⁴³“Ẹ ti gbọ́ pé a ti wí pé, ‘Ìwọ yóò fẹ́ aládùúgbò rẹ, kí o sì kórìíra ọ̀tá rẹ.’ ⁴⁴Ṣùgbọ́n mo wí fún yín pé, ẹ fẹ́ àwọn ọ̀tá yín, kí ẹ sì gbàdúrà fún àwọn tí ń ṣe inúnibíni sí yín, ⁴⁵kí ẹ lè di ọmọ Baba yín tí ń bẹ ní ọ̀run, nítorí ó mú kí oòrùn rẹ̀ ràn sórí ènìyàn ibi àti rere, ó sì rọ òjò sórí olódodo àti aláìṣòdodo. ⁴⁶Bí ẹ bá fẹ́ àwọn tí ó fẹ́ràn yín, èrè kí ni ìyẹn? Àwọn agbowó-orí pàápàá kò ha ṣe bẹ́ẹ̀ gẹ́gẹ́? ⁴⁷Bí ẹ bá kí àwọn arákùnrin yín nìkan, kí ni ẹ ṣe tí ó ju ti àwọn ẹlòmíràn lọ? Àwọn Kèfèrí pàápàá kò ha ṣe bẹ́ẹ̀? ⁴⁸Nítorí náà, ẹ jẹ́ pípé, gẹ́gẹ́ bí Baba yín tí ń bẹ ní ọ̀run ti jẹ́ pípé.”