Mwana wa Baba Asathimbana na Nyakuyesera
Mbali na njala pidamala ntsiku makumi manai, Yezu atawira nyakuyesera katatu na fala ya Baba wace mbakhonda kupangiza cinthu. Buluka akhala ku Kapernaumi, acemera anyakuphata nsomba anasiya makhoka awo pa ndzidzi ubodzi ene, ndipo mwinji usafika kubulukira kumbali zonsene mbaunyamula onsene nee akhakwanisa anango kuwangisa.
4 1Na tenepo Nzimu Wakucena atsogolera Yezu ku thando toera ayeserwe na dyabu. 2Pakumala kujala ntsiku makumanai na masiku makumanai, abva njala. 3Nyakuyesera abwera mbalonga tenepa: “Mungakhala Mwana wa Mulungu, panga miyala iyi toera ikhale mikate.”
4Mbwenye iye atawira tenepa: “Pyalembwa kuti, ‘Munthu nkhabe kukhala maso na nkate basi tayu, mbwenye na fala yonsene inabuluka n'kanwa mwa Baba wathu.’”
5Na tenepo dyabu ankwata mbaenda naye ku nzinda wakucena, amuimisa pa mbuto yakumwamba kakamwe ya templo, 6mbampanga tenepa: “Mungakhala Mwana wa Mulungu, tayani pantsi, thangwi Malemba asalonga kuti, ‘Iye anadzapanga aanju ace thangwi ya imwe, iwo anadzakunyamulani m'manja mwawo, toera mwendo wanu ukhonde kugwanda pa mwala.’”
7Yezu ampanga tenepa: “Pontho pyalembwa kuti, ‘Lekani kuyesera Baba wanu.’”
8Pontho dyabu ankwata mbaenda naye pa phiri yakulapha kakamwe, mbampangiza maumambo onsene a dziko na mbiri yawo. 9Iye ampanga tenepa: “Pyonsene pyenepi ndinakupasani, mungagodama na kundilambira.”
10Na tenepo Yezu ampanga tenepa: “Buluka, Sathani! Thangwi Malemba asalonga kuti, ‘Lambira Baba wako, mbuntumikira Iye ekha basi.’”
11Na tenepo dyabu ansiya, mwakucimwana aanju abwera mbantsalakana.
Ceza Casema ku Galileya
12Pidabva iye kuti Juwau akhadamangwa, abwerera ku Galileya. 13Asiya Nazareti, mbaenda kukhala ku Kafarnaumu, cifupi na bara, m'dziko ya Zabuloni na Nafitali, 14toera pikwanirisike pidalongwa na mprofeta Izaiya, kuti: 15“Dziko ya Zabuloni na dziko ya Nafitali, njira ya bara, kusena kwa Yordani, Galileya wa anthu akunja, 16anthu akhakhala mu cidima aona ceza cikulu, na ale akhakhala m'dziko na n'thundzi wa kufa, pa iwo pasema ceza.”
17Kubulukira n'dzidzi unoyu Yezu atoma kumwaza mphangwa, mbalonga tenepa: “Tcunyukani, thangwi Umambo wa Baba wathu wafika cifupi.”
Yezu Asacemera Anyakupfundza Ace Akutoma
18Mu kufamba n'khundu mwa Bara ya Galileya, aona abale awiri, Simau akhacemerwa Pedhru na m'bale wace Andreya, mbaponya nyau m'bara, thangwi akhali anyakuphata ntsomba.
19Iye aapanga tenepa: “Nditowereni, Ine ndinakucitani anyakuphata anthu.”
20Mwakucimbiza asiya nyau zawo mbantowera. 21Mu kupitiriza kutsogolo, aona abale anango awiri—Tiyago mwana wa Zebedeyu na Juwau m'bale wace—m'bote pabodzi na baba wawo Zebedeyu, mbasasanyira nyau zawo, mbaacemera. 22Mwakucimbiza asiya bote na baba wawo mbantowera.
Baba Asawangisa Kubulukira mwa Mwana Wace
23Iye azungunuka Galileya yonsene, mbapfundzisa m'masinagoga mwawo, mbamwaza mphangwa zadidi za Umambo, mbawangisa matenda onsene na nyatwa zonsene pakati pa anthu. 24Mphangwa za iye zamwazika mu Siriya yonsene. Ambweresera anthu onsene akhaduwala—akhaphatwa na matenda akusiyana-siyana na kupha, akhathabuswa na madimonyo, akhadwala thukutha, na akhalamala manungo—mbaawangisa. 25Mbumba zizinji zantowera kubulukira ku Galileya, ku Dhekapoli, ku Yerusalema, ku Yudeya, na kusena kwa Yordani. a a v25 Dhekapoli ikhali mwinji wa mizinda khumi, yakuti anthu azinji akhali anthu akunja, yakhali kumabulukiro a dzuwa na ku ntsasa-mabulukiro kwa Bara ya Galileya.
