Mateo 4

4 ¹Unya gidala sa Espiritu Santo si Jesus ngadto sa kamingawan aron sulayan sa yawa. ²Ug human sa pagpuasa sulod sa kap-atan ka adlaw ug kap-atan ka gabii, gigutom siya. ³Miduol ang Manunulay ug miingon, “Kon ikaw ang Anak sa Dios, sugoa kining mga bato nga mahimong tinapay.”

⁴Apan mitubag siya, “Nahisulat na, ‘Dili lamang sa tinapay mabuhi ang tawo, kondili sa matag pulong nga mogula sa baba sa atong Amahan.’”

⁵Unya gidala siya sa yawa ngadto sa balaang siyudad, ug gipatindog siya sa kinatas-ang bahin sa templo, ⁶ug miingon kaniya, “Kon ikaw ang Anak sa Dios, ambak ngadto sa ubos, kay nag-ingon ang Kasulatan, ‘Mandoan niya ang iyang mga anghel mahitungod kanimo, ug sapnayon ka nila sa ilang mga kamot, aron dili maigo sa bato ang imong tiil.’”

⁷Miingon si Jesus kaniya, “Nahisulat usab, ‘Dili mo sulayan ang imong Amahan.’”

⁸Gidala siya pag-usab sa yawa ngadto sa usa ka hataas kaayo nga bukid ug gipakita kaniya ang tanang gingharian sa kalibotan ug ang ilang himaya. ⁹Miingon siya kaniya, “Kining tanan ihatag ko kanimo, kon moyukbo ka ug mosimba kanako.”

¹⁰Unya miingon si Jesus kaniya, “Pahawa, Satanas! Kay nag-ingon ang Kasulatan, ‘Simbaha ang imong Amahan, ug siya lamang ang alagaran.’”

¹¹Unya mibiya kaniya ang yawa, ug sa kalit miabot ang mga anghel ug nag-alagad kaniya.

Misidlak ang Kahayag sa Galilea

¹²Sa pagkadungog niya nga si Juan gidakop, mibalik siya sa Galilea. ¹³Mibiya siya sa Nazaret ug mipuyo sa Capernaum, nga daplin sa dagat, sa teritoryo sa Zabulon ug Neptali, ¹⁴aron matuman ang gipamulong sa propeta nga si Isaias: ¹⁵“Ang yuta sa Zabulon ug ang yuta sa Neptali, ang dalan sa dagat, tabok sa Jordan, ang Galilea sa mga Hentil, ¹⁶ang mga tawo nga nagpuyo sa kangitngit nakakita sa usa ka dakong kahayag, ug alang sa mga nagpuyo sa dapit ug landong sa kamatayon, misidlak kanila ang usa ka kahayag.”

¹⁷Sukad niadtong taknaa, nagsugod si Jesus sa pagwali, nga nag-ingon, “Paghinulsol kamo, kay haduol na ang gingharian sa atong Amahan.”

Gitawag ni Jesus ang Iyang Unang mga Tinun-an

¹⁸Samtang naglakaw siya daplin sa Dagat sa Galilea, nakita niya ang duha ka managsoon, si Simon nga gitawag ug Pedro ug si Andres nga iyang igsoon, nga nagtaktak sa pukot ngadto sa dagat—mga mananagat sila.

¹⁹Ug miingon siya kanila, “Sunod kamo kanako, ug himoon ko kamong mga mangingisda ug mga tawo.”

²⁰Dihadiha gibiyaan nila ang ilang mga pukot ug misunod kaniya. ²¹Sa pagpadayon niya gikan didto, nakita niya ang laing duha ka managsoon—si Santiago nga anak ni Zebedeo ug si Juan nga iyang igsoon—diha sa sakayan uban sa ilang amahan nga si Zebedeo, nga nag-ayo sa ilang mga pukot, ug gitawag niya sila. ²²Dihadiha gibiyaan nila ang sakayan ug ang ilang amahan ug misunod kaniya.

Nag-ayo ang Amahan Pinaagi sa Iyang Anak

²³Milibot siya sa tibuok Galilea, nga nagtudlo sa ilang mga sinagoga, nagmantala sa maayong balita sa gingharian, ug nag-ayo sa tanang matang sa sakit ug balatian taliwala sa katawhan. ²⁴Mikaylap ang balita mahitungod kaniya sa tibuok Siria. Gidala nila kaniya ang tanang nanagsakit—gipanggunitan sa nagkalainlaing balatian ug kasakit, gisakit sa mga yawa, patulon, ug paralitiko—ug giayo niya sila. ²⁵Dagkong panon sa katawhan ang misunod kaniya gikan sa Galilea, sa Decapolis, sa Jerusalem, sa Judea, ug sa tabok sa Jordan. ^a a v25 Ang Decapolis maoy usa ka pundok sa napulo ka siyudad nga kadaghanan Hentil, nga nahimutang sa sidlakan ug habagatan-sidlakan sa Dagat sa Galilea.