Bou Shouei Huonbou Yoa Haüyokei
Chalou saonyi mühei nyengan phaia, Jisuei ai ong atakteian, huonbou to sem jiha seneibü Bou ngüh danko jongaikei. Kho phaia haoei Kapernaum to kiteikei, haoeneibü tak tangshaitham apyobü ngaulapbü shuong ngakei, hoba kaophei pendoua mütshuong, aoei ong amaitikubü pendou leian, hao jungto loukei.
4 1Kheijinei Soushou Saopobüei Jisu, Satanei huonla shanga, yam to leikei. 2Hobaje haoei chalou saonyi hoba langyang saonyi mühei nyengan phaia, hao mühei haiteikei. 3Huonbouei louan laukei, “Nyi Mühghaü Shou kialonga, ho laang shuong to, shausiyung yeiashi, dogo lenshi.”
4Lausikei haoei jongaikei, “Hai doda, ‘Müt shausiyung alongei alangda, lausikei Bou sembung ka longbü ngüh pendouei langda.’”
5Kheijinei Satanei hao saopobü sangnyu to leian haukei, hoba Lembüchem thükkabü to hao loan phokukei, 6hoba hao to laukei, “Nyi Mühghaü Shou kialonga, no khulimbo yungkük to attiashi, aishanga Laishibaei lenda, ‘Haoei nyi shanga haoeibü khuthük hangangbü shuong to sakkulabü, hoba haoenei haoeneibü ika nyi onlabü, khei nyi you laang to akühlabü.’”
7Jisuei hao to laukei, “Nyibou hai doda, ‘Nyi kaibü Bou atakteijan.’”
8Kheijinei Satanei hao shongh thükkatham yaangbü che to leian angkei, hoba hao la kaodak kabü sangle pendou hoba haoeneibü soneikangbü lenkei. 9Haoei hao to laukei, “Nyi nyemtiko ngo lemalonga, ho pendou ngei nyi la kulabü.”
10Kheijinei Jisuei hao to laukei, “Satan, hauashi! Aishanga Laishibaei lenda, ‘Nyi kaibü Bou lemashi, hoba hao alongei khangenashi.’”
11Kheijinei Satanei hao apyokei, hoba mangde khuthük hangangbü shuong louan hao to thuikei.
Galila Ngesakbü Hauda
12Tou Johan lapan kia dogo haoei ditan, hao Galil to sepeian haukei. 13Haoei Nazaret apyoan, yungko nyangbü Kapernaum ka, Zebulun hoba Naphtali leilang ka settikei, 14khei Isaia thuseibü danko lenan phokubü ho loushedlabü: 15Zebulun leilang hoba Naphtali leilang, yungko lam, Jordan danjung, phangshuong Galil, 16Nakthüha kibü mütshuongei ngesakbü yaangbü che hapa, hoba haibü yemkao kaonyeka kibü shuong la, haoen thükto ngesakbü longkei.
17Kho chalou ka Jisuei songlenla khangkei, hoba laukei, “Maangpon sepeiashi, aishanga seneibü Bou Sangle nyangko loua.”
Jisuei Shaangbou Eikshuong Ngakei
18Jisu Galil yungkoa paijinei, haoei jaisi nyi, Peter dogo laubou Simon hoba haona Andria, haosieibü tak dei to tekko hapbei, aieilausi haosi ngaulapbü kikei.
19Hoba haoei haosi to laukei, “Kaiya, kü phai semashi, hoba ngei kan müt lapbü dan yeitilabü.”
20Kheijinei haosiei haosieibü tak apyoan hao phai sembei. 21Ladang hao khonei saashangko haukei, haoei jaisi nyi lubou, Zebedi shou Jakob si haona Johan, haosieibü bou Zebedi yoa long chenei tak lamleko hapbei, hoba haosi ngakei. 22Kheijinei haosiei long hoba haosieibü bou apyoan hao phai sembei.
Bouei Haoeibü Shou Danko Shat Maitida
23Haoei Galil pendou jembo haukei, haoeneibü sinagoga lenko, Sangle Ngühlang Maibü phinthonko, hoba mütshuong yoka shatsinyat phang pendou hoba shatbü phang pendou maitikukei. 24Haoeibü ngühlang Siria pendoua ae aakei. Haoenei shatbü pendou hao jungto leibakei — shat phang phang hoba khonkubü kaangan kibü, shabü souei lapbü, mangde tuongbü, hoba you si ik phei sibü — hoba haoei haoen maitikukei. 25Noknyüh yaangbüei Galil, Dekapoli, Jerusalem, Jihuda, hoba Jordan danjung ka hao phai sembei. a a v25 Dekapoli kho Galil Yungko shaangla aenei hoba yungthang aenei kibü, phangshuong juongbü kibü sangnyu an liko kikei.
