Mwanakomana waBaba Anotarisana noMuedzi
Ane nzara mushure memazuva makumi mana, Jesu anopindura muedzi katatu neshoko raBaba vake panzvimbo pokuratidza chinhu. Mushure maizvozvo anogara muKapenaume, anodana vabati vehove vanosiya mambure avo pakarepo, uye vanhu vazhinji vanouya vachibva kumativi ose vakatakura vose vakanga vasingagoni kuporeswa nomumwe munhu.
4 1Ipapo Mweya Mutsvene wakatungamirira Jesu kurenje kuti aedzwe nadhiabhorosi. 2Zvino akati atsanya kwamazuva makumi mana nousiku makumi mana, akava nenzara. 3Muedzi akauya akati, “Kana uri Mwanakomana waMwari, udza mabwe aya kuti ave chingwa.”
4Asi iye akapindura akati, “Kwakanyorwa kuchinzi, ‘Munhu haararame nechingwa chete, asi neshoko rimwe nerimwe rinobuda mumuromo waBaba vedu.’”
5Ipapo dhiabhorosi akamutora akaenda naye kuguta dzvene, akamumisa pamusoro-soro petemberi, 6akati kwaari, “Kana uri Mwanakomana waMwari, zviwisire pasi, nokuti Rugwaro runoti, ‘Acharayira vatumwa vake pamusoro pako, uye vachakutakura mumaoko avo, kuti urege kugumbusa rutsoka rwako pabwe.’”
7Jesu akati kwaari, “Zvakare kwakanyorwa kuchinzi, ‘Usaedza Baba vako.’”
8Zvakare dhiabhorosi akamutora akaenda naye kugomo refu-refu, akamuratidza umambo hwose hwenyika nokubwinya kwahwo. 9Akati kwaari, “Zvose izvi ndichakupa iwe, kana ukandikotamira ukandinamata.”
10Ipapo Jesu akati kwaari, “Ibva pano, Satani! Nokuti Rugwaro runoti, ‘Namata Baba vako, uvashumire ivo voga.’”
11Ipapo dhiabhorosi akamusiya, uye pakarepo vatumwa vakauya vakamushandira.
Chiedza Chinobuda muGarirea
12Zvino Jesu akati anzwa kuti Johani akanga asungwa, akabva akaenda kuGarirea. 13Akabva Nazareta akandogara muKapenaume, pedyo negungwa, munyika yaZebhuruni neyaNafutari, 14kuti zvizadzikiswe zvakataurwa nomuprofita Isaya zvichinzi: 15“Nyika yaZebhuruni nenyika yaNafutari, nzira yegungwa, mhiri kwaJorodhani, Garirea revahedheni, 16vanhu vaigara murima vakaona chiedza chikuru, uye avo vaigara munyika nomumumvuri worufu, chiedza chakabudira pamusoro pavo.”
17Kubvira panguva iyoyo Jesu akatanga kuparidza, achiti, “Tendeukai, nokuti umambo hwaBaba vedu hwava pedyo.”
Jesu Anodana Vadzidzi Vake Vokutanga
18Achifamba pedyo neGungwa reGarirea, akaona hama mbiri, Simoni ainzi Petro nomununʼuna wake Andireya, vachikanda mumbure mugungwa—vaiva vabati vehove.
19Akati kwavari, “Nditeverei, uye ndichakuitai vabati vavanhu.”
20Pakarepo vakasiya mimbure yavo vakamutevera. 21Achipfuurira mberi, akaona dzimwe hama mbiri—Jakobho mwanakomana waZebhedhi naJohani mununʼuna wake—vari muchikepe nababa vavo Zebhedhi, vachigadzira mimbure yavo, akavadana. 22Pakarepo vakasiya chikepe nababa vavo vakamutevera.
Baba Vanoporesa Kuburikidza noMwanakomana Wavo
23Akapota muGarirea mose, achidzidzisa mumasinagoge avo, achiparidza mashoko akanaka oumambo, uye achiporesa marudzi ose ezvirwere nehosha pakati pavanhu. 24Mukurumbira wake wakapararira muSiriya mose. Vakamuvigira vose vairwara—vakabatwa nemarudzi akasiyana-siyana ezvirwere nemarwadzo, vakatambudzwa namadhimoni, vaiva nezvipusha, vakaoma mitezo—akavaporesa. 25Mapoka makuru avanhu akamutevera achibva kuGarirea, kuDhekaporisi, kuJerusarema, kuJudhiya, uye mhiri kwaJorodhani. a a v25 Dhekaporisi raiva boka ramaguta gumi aigarwa zvikuru navahedheni kumabvazuva nokumaodzanyemba kwokumabvazuva kweGungwa reGarirea.