Matthew 4

4 ¹Chieina Manglā Katharana Jishuli chipeena sui khavai lamhāngli thānvai. ²Kala ngashun hangmati ngayā hangmati khum kahaiwui thili, ana thaihaowa. ³Chipee china rāhānga, "Na Varewui Naomayarana jiakha lunggui hibingli khamui onkhavai kasolu."

⁴Kha ana ngahānkai, "Hithada kapihaida lei, 'Mina kashakazāmāng eina maringmana, kha ithumwui Avāwui khamor eina matuikashok tui saikora eina ringra.'"

⁵Chiwui thili chipee china ali kathara keinungli thānvāda, khorumshimwui atonli kānganing ngasaka, ⁶kala ali hānga, "Na Varewui Naomayarana jiakha nakhalatta ngawoktālu, kaja hithada kapihaida lei, 'Ana awui kazingraobingli nawui pongli ningmira, kala athumna athumwui pāng eina nali phungra, chithāda naphei lunggui akhali makhao khavai.'"

⁷Jishuna ali hānga, "Latluida hithada kapihaida lei, 'Nana nawui Avāli chāng matamalu.'"

⁸Latluida chipee china ali kaphung kajuiva̱ akhali thānvāda, okathuiwui wungram saikora kala chiwui tekhamatei ali chithei. ⁹Ana ali hānga, "Nana ngakhumshām eina ili khorumakha, hi saikora ina nali mira."

¹⁰Chieina Jishuna ali hānga, "Zatthuihaolu, Satan! Kaja hithada kapihaida lei, 'Nana nawui Avāli khorumra, kala amāngli otram ngatha̱ra.'"

¹¹Chieina chipee china ali horhaowa, kala yanglu, kazingraobingna rāda ali otram ngatha̱mi.

Galileeli Kahor Shokmi

¹²Johnli tukkhui kahaira kaji Jishuna shālaga Galileeli zatthuihaowa. ¹³Ana Nazarethwui eina thuihaida, Zebulun eina Naphtaliwui leiretli khalei shamadru kānda Capernaumli pamhaowa, ¹⁴Isaiah marānna hānghaikasā chi ungshung khavaina: ¹⁵Zebulunwui ngalei kala Naphtaliwui ngalei, shamadruwui apong, Jordan kānda, gentilebingwui Galilee, ¹⁶tangkhamangli kapambingna kahor kahak akha theihaira, kala kathiwui ngalei kala khaya̱li kapambingwui vang, athumwuitungli kahor shoka.

¹⁷Chi atamwui eina Jishuna hāshok khanganang, hānga, "Ningngateilu, kaja ithumwui Avā wungram nganaishunhaira."

Jishuna Awui Sākhangatha̱ Kharebingli Hokhui

¹⁸Jishuna Galilee ngayipheili zatlakha Peterla kaho Simon kala awui agato Andrew achinā khani ngayilungli khailan horkazat thei; kaja ani khai kaphā mina.

¹⁹Kala ana athumli hānga, "Ithi shurlu, nanili ina mi kaphā sāngasakra."

²⁰Ngalāngda anina khailan hortahaiphungda athi shurthuwa. ²¹Apam chiwui eina zatvālaga ana Zebedeewui naomayara James eina agato John, achinā khangatei khani, avāva̱ Zebedee eina ngasoda marikhonglungli khailan khopkasā thei, kala anili hokhui. ²²Ngalāngda anina marikhong kala avāva̱li nothāhailaga athi shurthuwa.

Avāna Awui Naomayara Khamorwui Eina Raimi

²³Ana Galileewui apam saikorali yaovai, wungramwui paokaphā hāshoka, athumwui synagogueli tamchithei, kala mibingwui ngachaili kazāt kachiva̱ kala kazātyur saikora raimi. ²⁴Awui pao Syria ngalei hupta ngayaovai. Mibingna kakazānao saikora, kazātyur khangatatei kala kachotkachāng eina singkhuibing, kameo kazangbing, khanuk kazābing, kala sheikasha̱bing, awuili khuirai, kala ana athumli raimi. ²⁵Mi kachungkhana Galileewui, Decapoliswui, Jerusalemwui, Judeawui, kala Jordan kānda khaleiwui eina awui thi shura. ^a a v25 Decapolis hi Galilee ngayiwui zingshoshong kala azol-zingshoshong pheivāk khalei, Gentile mibing kachungkha leikasa keinung tharāwui zangser akhana.