Mwana ya Tata Ke Kutana na Muntu ya Kutonta
Na manima ya bilumbu makumi yiya, Yesu vwandaka na nsatu, mpe yandi vutulaka na muntu ya kutonta bambala tatu na mpova ya Tata ya beto, na kisika ya kumonisa kima mosi. Na manima, yandi kwendaka zinga na Kapenawume, bokilaka bilobi yina yambulaka mpwasa ya bawu kaka mbala mosi, mpe bankonga ya bantu kwizaka katuka na bisika nyonso, bawu nataka bantu nyonso yina muntu ya nkaka lendaka kubelusa ve.
4 1Na yina, Mpeve ya Longo nataka Yesu na yinsi ya kuyuma samu ti Zabulu kutonta yandi. 2Na manima ya kumina nsoki bilumbu makumi yiya mpe mpimpa makumi yiya, yandi vwandaka na nsatu. 3Muntu ya kutonta kwizaka mpe tubaka: «Kana nge kele Mwana ya Nzambi, zabisa matadi yayi na kukuma mampa.»
4Kasi yandi vutulaka: «Ya kele ya kusonama: “Muntu ke zingaka na mampa kaka ve, kasi na konso dyambu yina ke basikaka na yinwa ya Tata ya beto.”»
5Na yina, Zabulu nataka yandi na mbanza ya longo, telamisaka yandi na kisika ya zulu-zulu ya Yinzo ya Nzambi, 6mpe zabisaka yandi: «Kana nge kele Mwana ya Nzambi, losa nge mosi na nsi, samu ti Dibuku ya Nzambi ke tubaka: “Yandi ke pesa bambazi ya yandi lutumu na yina me tadila nge, mpe bawu ke nata nge na maboko ya bawu, samu ti nge kubula dyaka ve dikulu ya nge na ditadi.”»
7Yesu tubaka na yandi: «Ya kele dyaka ya kusonama: “Nge fwana kusombola ve Tata ya nge.”»
8Na yina, Zabulu nataka yandi dyaka na mongo mosi ya nda mingi, mpe lakisaka yandi bimfumu nyonso ya yinza mpe nkembo ya bawu. 9Yandi tubaka na yandi: «Kana nge fukama mpe sambila munu, mu ke pesa nge bima yayi nyonso.»
10Na yina, Yesu zabisaka yandi: «Katuka awa, Satana! Samu ti Dibuku ya Nzambi ke tubaka: “Sambila Tata ya nge, mpe sadila kaka yandi mosi.”»
11Na yina, Zabulu bikaka yandi, mpe na mpamukunu bambazi kwizaka mpe sadilaka yandi.
Nsemo Ke Talana na Ngalili
12Ntangu Yesu waka ti ba tulaka Yowane na boloko, yandi vutukaka na Ngalili. 13Yandi bikaka Nazaleti, mpe kwendaka kuzinga na Kapenawume, na kumu ya dyanga, na yinsi ya Zebuloni mpe Nefatali, 14samu ti mambu yina mumbikudi Esaya tubaka salama: 15«Yinsi ya Zebuloni mpe yinsi ya Nefatali, nzila ya dyanga, na simu ya Yolodani, Ngalili ya bantu yina kele ve ba-Zwife, 16bantu yina ke zinga na kati ya mpimpa me tala nsemo ya nene, mpe samu na bayina ke zinga na kizunga mpe kitombe ya lufwa, nsemo me talana na bawu.»
17Katuka ntangu yina, Yesu bandaka na kulongisa, yandi tubaka: «Beno soba nkadulu, samu ti Kimfumu ya Tata ya beto me kuma pene-pene.»
Yesu Ke Bokila Bilandi ya Yandi ya Ntete
18Ntangu Yesu vwandaka tambula na lweka ya dyanga ya Ngalili, yandi talaka bampangi zole, Simoni yina ba ke bokilaka Pyele mpe leki ya yandi Andele, bawu vwandaka losa mpwasa na kati ya dyanga, samu ti bawu vwandaka bilobi.
19Yesu zabisaka bawu: «Beno landa munu, mpe mu ke kumisa beno bilobi ya bantu.»
20Na mpamukunu, bawu yambulaka bampwasa ya bawu mpe landaka Yesu. 21Yandi tambulaka dyaka fyoti, mpe talaka bampangi zole ya nkaka, Zaki mwana ya Zebede mpe leki ya yandi Yowane, bawu vwandaka na kati ya bwatu kintwadi na tata ya bawu Zebede, bawu vwandaka yidika bampwasa, mpe yandi bokilaka bawu. 22Kaka na ntangu yina, bawu bikaka bwatu mpe tata ya bawu, mpe landaka yandi.
Tata Ke Belusa na Nzila ya Mwana ya Yandi
23Yesu tambulaka na kizunga ya Ngalili ya mvimba, mpe longisaka na bayinzo ya lusambulu ya bawu, kusamuna Nsangu ya Mbote ya Kimfumu, mpe kubelusa bimbevo nyonso mpe bifuuma nyonso na kati ya bantu. 24Nsangu ya yandi mwanganaka na kizunga nyonso ya Sili. Bawu nataka na sika ya yandi bantu nyonso yina vwandaka na bimbevo—bayina vwandaka ya kukangama na bimbevo ya mutindu na mutindu mpe na bampasi, bayina vwandaka na bampeve ya yimbi, bayina vwandaka na kimbevo ya kubwa, mpe bayina vwandaka ya bifuuma—mpe yandi belusaka bawu. 25Nkonga ya nene ya bantu landaka yandi, katuka na Ngalili, na Dekapole, na Yelusalemi, na Zude, mpe na simu ya Yolodani. a a v25 Dekapole vwandaka kimvuka ya bambanza kumi, yina mingi ya bawu vwandaka ya bantu yina kele ve ba-Zwife, na esete mpe na sude-esete ya dyanga ya Ngalili.