Me basika na mukanda
Dibuku

Tata ke Yidika Nzila

Yowane, yina vwandaka na kinkuti ya mika ya samo, zabisaka bankonga ya bantu yina kwizaka samu na mbotokolo ti kuvwanda bana ya Abalayami ke gulusa muntu ve. Na manima, Yesu lombaka na kubotama mpe, mpe Yowane mangaka, yandi tubaka ti ni yandi muntu fwanaka kubotama na Yesu. Yesu ndimaka, mpe ndinga ya Tata ya yandi tubaka ti yandi kele Mwana ya yandi ya zola.

Tata ya beto ke zonza na vese 17

Kapu 3.

Na bilumbu yina, Yowane Mubotiki kwizaka, yandi vwandaka longisa na yinsi ya kuyuma ya Zude, «Beno soba nkadulu ya beno, samu ti Kimfumu ya Tata ya beto me kuma pene-pene.» Yandi yina muntu yina mumbikudi Esaya tubilaka, ntangu yandi tubaka: «Muntu mosi ke na kuboka na yinsi ya kuyuma nde: “Beno yidika nzila sambu na Mfumu, mpe beno sungika banzila ya yandi!”»

Yowane lwataka kinkuti ya mika ya samo, mpe yandi kangaka singa ya mpusu ya kibulu na luketo ya yandi. Madya ya yandi vwandaka makonko ti mafuta ya nyosi ya mfinda. Na yina, bantu ya Yelusalemi, bantu ya kizunga nyonso ya Zude, mpe bantu ya bizunga nyonso yina kele pene-pene ya nzadi Yolodani, bawu basikaka samu na kukwenda na sika ya yandi, mpe Yowane botikaka bawu na nzadi ya Yolodani, ntangu bawu vwandaka fungula masumu ya bawu.

Ntangu yandi talaka ba-Falisye mingi mpe ba-Saduse ke kwiza samu na kubotama, yandi tubaka na bawu: «Beno dikanda ya banyoka! Nani kebisaka beno na kutina nkele yina ke kwiza? Na yina, beno buta bambuma yina ke lakisa ti beno me soba nkadulu. Beno banza ve na kutuba na beno mosi: “Abalayami kele tata ya beto,” samu ti mu ke zabisa beno: Tata ya beto lenda basisa bana ya Abalayami na matadi yayi. Ntangu yayi, soka me vwanda na mwanzi ya bayinti. Na yina, konso yinti yina ke buta ve bambuma ya mbote, ba ke zenga yawu mpe ba ke losa yawu na tiya.

«Mu ke botika beno na maza samu na kusoba nkadulu, kasi muntu yina ke kwiza na manima ya munu kele ngolo kuluta munu. Munu me fwana ve na kunata mapapa ya yandi. Yandi mosi ke botika beno na Mpeve ya Longo ti na tiya. Musoma ya yandi ya kuningisa bambuma kele na diboko ya yandi. Yandi ke yidika kisika ya yandi yina ke kabulaka bambuma, yandi ke bumba bambuma ya faline ya yandi na nzo ya kubumbila bima, kasi yandi ke yoka dititi ya bambuma na tiya yina ke zima ve ata fyoti.» a a v12 Ba vwandaka sadila musoma ya kuyengila bambuma samu na kulosa na zulu bambuma yina ba me kabula. Bambuma ya faline ya kizitu vwandaka vutuka bwa na ntoto, kasi dititi ya bambuma ya kupela vwandaka kwenda na mupepe.

Tata ke Yamba Mwana ya Yandi

Na yina, Yesu katukaka na Ngalili, yandi kwizaka na Yolodani na sika ya Yowane, samu ti Yowane kubotika yandi. Kasi Yowane mekaka na kukanga yandi nzila: «Munu kele na nsatu ya kubotama na nge, kasi nge ke kwiza na sika ya munu?»

Yesu vutulaka na yandi: «Bika yawu ntangu yayi, samu ti mutindu yayi beto fwana kulungisa mambu nyonso ya kudedama.» Na yina, Yowane bikaka yandi.

Na manima ya kubotama, Yesu basikaka na maza kaka ntangu yina. Mpe na mbala mosi, mazulu kabukaka na ntwala ya yandi. Yandi talaka Mpeve ya Tata ya beto, yawu ke kulumuka mutindu dibembe mpe ke kwiza kutentama na yandi.

Na yina, ndinga mosi katukaka na zulu, yawu tubaka: «Yandi yina kele Mwana ya munu, muntu yina mu ke zolaka; ni na yandi kele kilengi ya munu.»