Baba Vanogadzirira Nzira
Johani, akapfeka nguo yemvere dzekamera, anoudza vanhu vazhinji vanouya kuzobhabhatidzwa kuti kuberekwa naAbhurahama hakuponesi munhu. Ipapo Jesu anokumbirawo kubhabhatidzwa, uye Johani anoramba achiti ndiye anofanira kubhabhatidzwa naye. Anobvuma, uye inzwi raBaba vake rinoti ndiye Mwanakomana wavo anodikanwa.
3 1Mumazuva iwayo Johani Mubhabhatidzi akauya, achiparidza murenje reJudhiya, 2“Tendeukai, nokuti umambo hwaBaba vedu hwaswedera pedyo.” 3Uyu ndiye uya akataurwa nezvake nomuprofita Isaya, achiti: “Inzwi rinodanidzira murenje, richiti: Gadzirai nzira yaIshe, ruramisai nzira dzake.”
4Johani aipfeka nguo yakagadzirwa nevhudzi regamera, aine bhanhire redehwe muchiuno chake; zvokudya zvake zvaiva mhashu nouchi hwomusango. 5Ipapo Jerusarema neJudhiya yose nedunhu rose rakapoteredza Jorodhani vakabuda vachienda kwaari, 6uye vakabhabhatidzwa naye muRwizi rwaJorodhani, vachireurura zvivi zvavo.
7Paakaona vaFarisi navaSadhusi vazhinji vachiuya kuzobhabhatidzwa, akati kwavari, “Imi vana venyoka! Ndiani akakuyambirai kuti mutize hasha dziri kuuya? 8Naizvozvo berekai zvibereko zvakafanira kutendeuka. 9Musafunga kuti mungati mumwoyo menyu, ‘Abhurahama ndibaba vedu,’ nokuti ndinokuudzai kuti: Baba vedu vanogona kumutsira Abhurahama vana kubva pamatombo aya. 10Demo ratova pamidzi yemiti, saka muti wose usingabereki zvibereko zvakanaka unotemwa wokandwa mumoto.
11“Ini ndinokubhabhatidzai nemvura kuti mutendeuke, asi uya anouya shure kwangu ane simba kundipfuura— handina kukodzera kutakura shangu dzake. Iye achakubhabhatidzai noMweya Mutsvene nomoto. 12Forogo yake yokuurutsa iri muruoko rwake; achachenesa buriro rake, agounganidza gorosi rake mudura, asi achapisa hundi nomoto usingadzimi.” a a v12 Forogo yokuurutsa yaishandiswa kukanda tsanga dzakapurwa mumhepo; gorosi rairema raidzokera pasi, asi hundi yakareruka yaipepereswa nemhepo.
Baba Vanogamuchira Mwanakomana Wavo
13Ipapo Jesu akabva kuGarirea akauya kuJorodhani kuna Johani, kuti abhabhatidzwe naye. 14Asi Johani akaedza kumudzivisa, achiti: “Ndini ndinofanira kubhabhatidzwa nemi, asi imi mouya kwandiri?”
15Jesu akamupindura akati, “Rega zvive saizvozvo iko zvino, nokuti ndizvo zvatinofanira kuita kuti tizadzise kururama kwose.” Saka Johani akamutendera.
16Jesu paakabhabhatidzwa, pakarepo akabuda mumvura, uye pakarepo matenga akazaruka kwaari; akaona Mweya waBaba vedu uchiburuka senjiva uchimhara pamusoro pake.
17Ipapo inzwi rakabva kudenga rikati, “Uyu ndiye Mwanakomana wangu, wandinoda; ndinofara maari.”