Mateo 4

4 ¹Pagkatapos, dinala ng Espiritu Santo si Jesus sa ilang upang tuksuhin ng diyablo. ²At pagkatapos mag-ayuno nang apatnapung araw at apatnapung gabi, siya ay nagutom. ³Lumapit ang manunukso at nagsabi, “Kung ikaw ang Anak ng Diyos, sabihin mong maging tinapay ang mga batong ito.”

⁴Ngunit sumagot siya, “Nasusulat, ‘Hindi lamang sa tinapay nabubuhay ang tao, kundi sa bawat salitang nagmumula sa bibig ng ating Ama.’”

⁵Pagkatapos, dinala siya ng diyablo sa banal na lungsod, itinayo siya sa pinakamataas na bahagi ng templo, ⁶at sinabi sa kanya, “Kung ikaw ang Anak ng Diyos, magpatihulog ka, sapagkat sinasabi ng Kasulatan, ‘Uutusan niya ang kanyang mga anghel tungkol sa iyo, at aalalayan ka nila sa kanilang mga kamay, upang hindi tumama sa bato ang iyong paa.’”

⁷Sinabi ni Jesus sa kanya, “Muli, nasusulat, ‘Huwag mong susubukin ang iyong Ama.’”

⁸Muli, dinala siya ng diyablo sa isang napakataas na bundok at ipinakita sa kanya ang lahat ng kaharian sa daigdig at ang kanilang karingalan. ⁹Sinabi niya sa kanya, “Ang lahat ng ito ay ibibigay ko sa iyo, kung ikaw ay yuyukod at sasamba sa akin.”

¹⁰Kaya't sinabi ni Jesus sa kanya, “Lumayas ka, Satanas! Sapagkat sinasabi ng Kasulatan, ‘Sambahin mo ang iyong Ama, at siya lamang ang paglingkuran mo.’”

¹¹Pagkatapos, iniwan siya ng diyablo, at biglang dumating ang mga anghel at nag-aruga sa kanya.

Sumikat ang Liwanag sa Galilea

¹²Nang mabalitaan niyang dinakip si Juan, umurong siya patungong Galilea. ¹³Iniwan niya ang Nazaret at nanirahan sa Capernaum, sa tabi ng dagat, sa lupain ng Zabulon at Neftali, ¹⁴upang matupad ang sinabi sa pamamagitan ni propeta Isaias: ¹⁵“Ang lupain ng Zabulon at ang lupain ng Neftali, ang daan sa dagat, sa kabila ng Jordan, Galilea ng mga Hentil, ¹⁶ang bayang nananahan sa kadiliman ay nakakita ng isang dakilang liwanag, at para sa mga nananahan sa lupain at lilim ng kamatayan, sa kanila ay sumikat ang isang liwanag.”

¹⁷Mula noon, nagsimulang mangaral si Jesus, na nagsasabi, “Magsisi kayo, sapagkat malapit na ang kaharian ng ating Ama.”

Tinawag ni Jesus ang Kanyang Unang mga Alagad

¹⁸Habang naglalakad sa tabi ng Dagat ng Galilea, nakita niya ang dalawang magkapatid, si Simon na tinatawag na Pedro at ang kapatid niyang si Andres, na naghahagis ng lambat sa dagat—sila ay mga mangingisda.

¹⁹At sinabi niya sa kanila, “Sumunod kayo sa akin, at gagawin ko kayong mangingisda ng mga tao.”

²⁰Agad nilang iniwan ang kanilang mga lambat at sumunod sa kanya. ²¹Nang magpatuloy siya mula roon, nakita niya ang dalawa pang magkapatid—si Santiago na anak ni Zebedeo at ang kapatid niyang si Juan—na kasama ng kanilang amang si Zebedeo sa bangka, na nag-aayos ng mga lambat, at tinawag niya sila. ²²Agad nilang iniwan ang bangka at ang kanilang ama at sumunod sa kanya.

Nagpapagaling ang Ama sa Pamamagitan ng Kanyang Anak

²³Nilibot niya ang buong Galilea, na nagtuturo sa kanilang mga sinagoga, na ipinapahayag ang mabuting balita ng kaharian, at nagpapagaling ng bawat sakit at karamdaman sa gitna ng mga tao. ²⁴Kumalat ang balita tungkol sa kanya sa buong Siria. Dinala nila sa kanya ang lahat ng may karamdaman—mga sinasakop ng iba't ibang sakit at hapdi, mga pinahihirapan ng mga demonyo, mga may epilepsya, mga paralisado—at pinagaling niya sila. ²⁵Sinundan siya ng napakaraming tao mula sa Galilea, sa Decapolis, sa Jerusalem, sa Judea, at sa kabila ng Jordan. ^a a v25 Ang Decapolis ay isang pangkat ng sampung lungsod na halos pawang Hentil sa silangan at timog-silangan ng Dagat ng Galilea.