Mwana wa Tata Wukhundikisi Muhukumuni
Kunima dya bilumbu makumaya, nzala yímukwata, amana Yesu wávutula muhukumuni mbala tatu ni ndinga ya Tata wetu, konda kusongila kima. Kunima wázinga ku Kaphedinawuma, wátela batu bana bisi tabula mbisi, bana básisa byosu muna mbala mosi, amana milumba-lumba mya batu myakwísa tuka mu makuma moosu, mu kunata boosu bana ka mutu ku kalenda belula.
4 1Amana Kitembu Kyatoma kyánata Yesu muna nganga, hanga kiphidi-mutu kamuhukumuna. 2Amana kunima dya kuzila madya bilumbu makumaya yi phipha makumaya, nzala yímukwata. 3Muhukumuni wísa amana wuzimbudi: «Yuka ni ngeyi wenina Mwana wa Nzambi, zimbula kwena matadi mama ndangu mákituka mapha.»
4Kaasi wávutula: «Básonika: “Batu basiku zinga mu dipha kaka, kaasi mu ndinga yosu yina yituka mu munwa wa Tata wetu.”»
5Amana kiphidi-mutu wumunati muna mbanza yatoma, amana wumunenginiki ha nzu ya Nzambi, kuna kisoka kyandi kya mudilu, 6amana wuzimbudi: «Yuka ni ngeyi wenina Mwana wa Nzambi, ditsusula hana tsi, mukuma básonika: “Nzambi kahána muswa kwena banzyo bandi kikuma kyaku, amana bakulela muna moku ma bawu, ndangu kulu dyaku didikhukulaku ku tadi dimosi.”»
7Yesu wumuzimbwadi: «Básonika hika: “Wusiku tsokila Tata waku.”»
8Amana kiphidi-mutu wumunati hika kuna mongu wa mudilu lawu, amana wumusongidi bipfumu bya tsi byosu yi khembu ya byawu. 9Wumuzimbwadi: «Yuka ni ngeyi wubukama amana wunsambila, byabi byosu yikuheka ngeyi.»
10Amana Yesu wumuzimbwadi: «Katuka, Satana! Mukuma básonika: “Sambila Tata waku, amana yandi kaka wúmusadila.”»
11Amana kiphidi-mutu wámusisa, hanga mu kithulumukina banzyo bisa amana bamusadila.
Mwini Wútemuka ku Ngadidi
12Muna tangwa káyuka ni bamukwatisa Yowani mu boloku, wákatuka wénda ku Ngadidi. 13Wásisa Nazaleti amana wénda kala ku Kaphedinawuma, ha kabeta ka yanga, mu kinzunga kya Zebuloni yi Nafatali, 14hanga malungila mambu mana kázonza mbikudi Yesaya: 15«Tsi ya Zebuloni yi tsi ya Nafatali, nzila ya yanga, ku sambwa dikwawu dya Yolutani, Ngadidi ya bisi makanda, 16batu bana benina mu phipa bámona mwini wa mbuta, amana kwena bana benina mu kinzunga yi mu kivula kya lufwa, hana bawu, mwini wútemuka.»
17Muna tangwa dina, Yesu wáyandika kusamuna musamu, kazimbula: «Balumunenu mbundu, mukuma Kipfumu kya Tata wetu kibwesukini.»
Yesu Wútela Balonguki Bandi ba Theti
18Buna kakala luta muna kabeta ka yanga dya Ngadidi, wámona baphangi bodi, Simoni wuna bisi tela Phetelu, yi phangi wandi Andele, bakala timbula wanda muna yanga, mukuma balobi bákala.
19Amana wubazimbwadini: «Ndandenu, amana yilukitula balobi ba batu.»
20Muna mbala mosi, básisa mawanda ma bawu amana bámulanda. 21Buna káphusana kuna thwala, wámona baphangi bakwawu bodi, Zyaki yi phangi wandi Yowani, bana ba Zebeteya; bawu bákala muna masuwa yi tata wa bawu Zebeteya, beka yidika mawanda, amana wábatela. 22Muna mbala mosi, básisa masuwa yi tata wa bawu amana bámulanda.
Tata Wubelula mu Nzila ya Mwana Wandi
23Yesu kákala kwenda kangala kinzunga kya Ngadidi kyosu, kákala longa muna nzu za kimvuka za bawu, kákala samuna Musamu wa Bukheti wa Kipfumu, yi kubelula maladi mosu yi bimbefu byosu ha kati dya batu. 24Tsangu zandi záyalangana mu tsi ya Sidiya yosu. Bámunatina bambefu boosu: bana bákala kwátwa kwena maladi ma mutindu yi mutindu yi misongu, bana bákala yangisa kwena bitembu bya mbi, bana ba kifu kya kubwa, biwokoku; amana wábabuka. 25Batu balawu bámulanda, bátuka ku Ngadidi, ku Mbanza Kumi, ku Yelusalemi, ku Yuteya yi ku sambwa dikwawu dya Yolutani. a a v25 Mbanza Kumi kyákala kimvuka kya mbanza kumi, zina mu kingi kyazo zakala za bisi makanda, zina zakala ku este yi ku sude-este ya yanga dya Ngadidi.
