Pa om Sa Kapaisa na Bathemnu ding Maitwang Ongme
Ni sombali nung chaam ongluga, Jisu na pa-aam khatchale pi mu thang lang ma, ani Pa om chong bina bathemnu ding siari thum hou thou nge. Haba nung bi Capernaum bi han ongluga, bani kik bing ding kahan bina sat thangnu nga maannu rwan ding kou thangluga, khatle lampui brum bina mi tamga, katei tudannuna pi sa thang ngam maknu mi brumza, Bakim bi phun hung rwe.
4 1Haba nung Katha Bathiangnuna Jisu ding Diabol na bathem lang ramhaang bi kalwang hung rwe. 2Maanna thamlai sombali khatle zingpha sombali hweiga ongnu nung, Maan chaam ngaak rwe. 3Bathemnu na hungluga rinne, “Nang Rikrwang Sa Kapaisa gaye dabe, hei lung bing ding uilu pi to lang rinro.”
4Atiyeda Maanna katake, “Heiya hiak thang nge, ‘Mi nun ga uilu khatchana ring make, atiyeda ani Pa om bamun bina hungnu chong bing brumzana ringlune.’”
5Haba nung Diabol na Bating namlian bathiangnu bi kalwang hungluga, kalum in om basaang kataknu riak la pi han thang rwe. 6khatle Bakhou rinne, “Nang Rikrwang Sa Kapaisa gaye dabe, Napum Bahak kachak tawo, balangbe hiak thang ngaaknu ga dannuwe, ‘Nating ngaaksian thang lang Baom tambaan chonglang rwan khou Maanna chongtan pi thanglune, khatle bani kutna Nating pon kadou thou thanglune, hagana Naket lung bi kadeng maklune.’”
7Jisu na bakhou rinne, “Heiya le hiak thang nge, ‘Nani Pa ding bathem su mako.’”
8Haba nung bi Diabol na Bating rammwan basaang takka ongnu la kalwang kaluga, talei ram om krwang talei bing khatle baom lwat liannu bing Bakhou pi mu thang rwe. 9Maanna Bakhou rinne, “Nangna kekhok detaluga ating kalumsan dabe, hei bing brumza ding eina Nang khou pi thangne.”
10Haba nung Jisu na bakhou rinne, “Seitaan, se swakro! Balangbe hiak thang nge, ‘Nani Pa ding kalumsan towo, khatle Maan khatchana ding chwanlaang towo.’”
11Haba nung Diabol na Bating thangsialuga se swak rwe, khatle haba kahan bi tambaan chonglang rwan hungluga Bating chwanlaang to thang rwe.
Galilee bi Baan ga Chuiye
12Atun John ding qwan in bi thang damnu ga Maanna ngaisunu kaan bi, Maan Galilee taram la pen thou dam ngaake. 13Maanna Nazareth bina se swakluga, tuipui paan bi amnu, Zebulun le Naphtali taram bi ongnu Capernaum bi lung ngaake, 14heiya thiamting Isaiah na rin thang ngaaknu ga hung tang lang naye: 15“Zebulun taram khatle Naphtali taram, tuipui lampui, Jordan raan la, Jentail rwan om Galilee, 16kazingnu bi ongnu mi nunna baan kaliannu mu rwe, khatle thinu taram le thinu lim bi ongnu nun khou, bani chung bi baan khat tip thang rwe.”
17Haba kaan bina Jisu na sacham kasam lang hou thouluga rinne, “Sung lero, balangbe ani Pa om krwang talei nai rwe!”
Jisu na Baom Kama Kataknu Potroi Rwan ding Kouwe
18Jisu na Galilee tuipui paan bi se hungnu kaan bi, Maanna unao pat ni, Peter ding kounu Simon le banao Andrew ding tuipui bi kalang sat ong ngaaknu mu rwe; balangbe barwei ga ngaa namnu mi ngaake.
19Atiga Maanna barwei khou rinne, “Anung suiyo, Eina narwei ding mi namnu mi pi to thangne.”
20Haba kahan bina banina bani om kalang bing ga sat thangsialuga Maan nung sui drwe. 21Maan habei gana se swaknu kaan bi, Zebedee sa kapaisa James khatle banao John, unao pat ni katei ding barwei pa Zebedee le li sung bi kalang photka ongnu Maanna muluga, barwei ding kou rwe. 22Haba kahan bina banina li le bani pa ding le sat thangsialuga Maan nung sui drwe.
Pa na Basa Kapaisa Paan bina Pi Sa Thangme
23Maanna Galilee taram brumza bi seluga, bani om synagogue bing bi bachu thangga, krwang talei om sacham kasam thangse ngaake, khatle mi nun lak pi kasa kanaa bing khatle tanat bachaat bingna naanu mi nun ding pi sa thang ngaake. 24Bakhou om cham ma Syria taram brumza bi thei chang thou dam ngaake. Banina bachaat bachaat tanat kasia khatle riangrenu na namnu, ri kasia khutnu, kachao naanu, pum baang thinu, naanu bing brumza ding Bakhou phun hung ngaake, atiga Maanna bani ding pi sa thang rwe. 25Mi khang puina Galilee, Decapolis, Jerusalem, Judea taram bing khatle Jordan tuiqwa raan la lamangna Banung sui ngaake. a a v25 Decapolis ga Galilee tuipui om chak pek khatle chak-tang pek bi ongnu, atak bi Jentail rwan om namlian som khak khomnu khat ngaake.