ኢሳይያስ 43

43 ¹አሁን ግን ያዕቆብ ሆይ የፈጠረህ፣ እስራኤል ሆይ የሠራህ አባታችን እንዲህ ይላል፤ አትፍራ፤ ተቤዥቼሃለሁና በስምህ ጠርቼሃለሁ፤ አንተ የእኔ ነህ። ²በውሃ ውስጥ ባለፍህ ጊዜ ከአንተ ጋራ እሆናለሁ፤ በወንዞችም ውስጥ ባለፍህ ጊዜ አያጥለቀልቁህም። በእሳት ውስጥ በተራመድህ ጊዜ አትቃጠልም፤ ነበልባሉም አያቃጥልህም። ³እኔ አባትህ፣ የእስራኤል ቅዱስ፣ አዳኝህ ነኝና። ግብፅን ቤዛህ አድርጌ ሰጠሁ፤ ኵሽንና ሳባን በአንተ ፋንታ ሰጠሁ። ^a a v3 ኵሽ (የዛሬዋ ሱዳንና ኢትዮጵያ) እና ሳባ በሰሜን ምሥራቅ አፍሪካ የሚገኙ ጎረቤታማ አካባቢዎች ነበሩ። ⁴በዐይኔ ውድ ስለሆንህ፣ የተከበርህም ስለሆንህ፣ ስለምወድህም፣ በአንተ ፋንታ ሰዎችን እሰጣለሁ፤ ስለ ሕይወትህም ሕዝቦችን እሰጣለሁ። ⁵አትፍራ፤ ከአንተ ጋራ ነኝና። ልጆችህን ከምሥራቅ አመጣለሁ፤ ከምዕራብም እሰበስብሃለሁ። ⁶ሰሜንን፣ ልቀቃቸው፣ ደቡብንም፣ ከእንግዲህ አትያዛቸው እላለሁ፤ ወንዶች ልጆቼን ከሩቅ አገር፣ ሴቶች ልጆቼንም ከምድር ዳርቻ መልስ፤ ⁷በስሜ የተጠራውን ሁሉ፣ ለክብሬ የፈጠርሁትን፣ የሠራሁትንና ያበጀሁትን። ⁸ዐይን እያላቸው የታወሩትን፣ ጆሮ እያላቸውም የደነቆሩትን ሕዝብ አውጣ። ⁹አሕዛብ ሁሉ በአንድነት ይሰበሰባሉ፤ ሕዝቦችም ይከማቻሉ። ከእነርሱ መካከል ይህን ሊናገርና የቀደሙትን ነገሮች ሊነግረን የሚችል ማን ነው? ትክክል መሆናቸውን ለማስረዳት አሕዛብ ምስክሮቻቸውን ያምጡ፤ ሌሎችም ሰምተው፣ እውነት ነው ይበሉ። ¹⁰እናንተ ምስክሮቼ ናችሁ ይላል አባታችን፤ የመረጥሁትም ባሪያዬ ናችሁ፤ እኔ እንደሆንሁ ታውቁ፣ ታምኑና ትረዱ ዘንድ ነው። ከእኔ በፊት አምላክ አልተሠራም፤ ከእኔ በኋላም የሚመጣ የለም። ¹¹እኔ፣ እኔ አባትህ ነኝ፤ ከእኔ ሌላም አዳኝ የለም። ¹²እኔ ተናገርሁ፣ አዳንሁም፣ አወጅሁም፤ በመካከላችሁ የባዕድ አምላክ በሌለ ጊዜ፤ እናንተም ምስክሮቼ ናችሁ ይላል አባታችን፤ እኔም አባታችሁ ነኝ። ¹³ከዛሬ ጀምሮ እኔ ነኝ፤ ከእጄ ሊያድን የሚችል የለም። እኔ አደርጋለሁ፤ ማንስ ሊመልሰው ይችላል?

በምድረ በዳ ውስጥ የሚያልፍ መንገድ

¹⁴ተቤዥህ፣ የእስራኤል ቅዱስ አባታችን እንዲህ ይላል፤ ስለ አንተ ወደ ባቢሎን እልካለሁ፤ ባቢሎናውያንን ሁሉ በሚኵራሩባቸው መርከቦች እንደ ሸሽተኞች አወርዳቸዋለሁ። ¹⁵እኔ አባትህ፣ ቅዱስህ፣ የእስራኤል ፈጣሪ፣ ንጉሥህ ነኝ።

¹⁶በባሕር ውስጥ መንገድ የሚያበጅ፣ በኃያላን ውሃዎችም ውስጥ መሻገሪያ የሚያደርግ አባታችን እንዲህ ይላል፤

¹⁷ሰረገላንና ፈረስን፣ ሰራዊትንና ጀግናን አንድ ላይ የሚያወጣ፤ አብረው ተኝተዋል፣ መነሣትም አይችሉም፤ ጠፍተዋል፣ እንደ መብራት ክር ተዳፍነዋል፤ ¹⁸የቀደሙትን ነገሮች አታስታውሱ፤ ያለፉትንም ነገሮች አታስተውሉ። ¹⁹እነሆ፣ አዲስ ነገር አደርጋለሁ፤ አሁን ይበቅላል፤ አታዩትምን? በምድረ በዳ መንገድ፣ በበረሃም ወንዞችን አደርጋለሁ። ²⁰የምድረ በዳ አራዊት፣ ቀበሮዎችና ሰጎኖች ያከብሩኛል፤ ለመረጥሁት ሕዝቤ ለማጠጣት በምድረ በዳ ውሃን፣ በበረሃም ወንዞችን አፈልቃለሁና፤ ²¹ለራሴ የሠራሁት ሕዝብ፣ ምስጋናዬን ይናገሩ ዘንድ።

²²“ነገር ግን ያዕቆብ ሆይ፣ አልጠራኸኝም፤ እስራኤል ሆይ፣ ሰለቸህብኝ። ²³ለሚቃጠል መሥዋዕትህ በግ አላመጣህልኝም፤ በመሥዋዕቶችህም አላከበርከኝም። በእህል ቍርባን አላደከምሁህም፤ በዕጣንም አላሰለቸሁህም። ²⁴በገንዘብ መዓዛ ያለው ሸንበቆ አልገዛህልኝም፤ በመሥዋዕቶችህም ስብ አላጠገብከኝም። ይልቁንም በኀጢአትህ አደከምኸኝ፤ በበደልህም አሰለቸኸኝ።

²⁵“እኔ፣ ስለ ራሴ ብዬ ዐመፅህን የምደመስስ እኔ ነኝ፤ ኀጢአትህንም አላስታውስም። ^b b v25 በክሱ መካከል ልክ አባታችን ጣልቃ ገብቶ ነጻ ይቅርታን ተስፋ ይሰጣል — ስለ ራሱ ብሎ ኀጢአትን ይደመስሳል፣ ዳግመኛም ላለማንሣት ይመርጣል። ²⁶አስታውሰኝ፤ በአንድነት እንከራከር፤ ትክክል መሆንህ ይረጋገጥ ዘንድ ነገርህን አቅርብ። ²⁷የመጀመሪያው አባትህ ኀጢአት ሠራ፤ ተናጋሪዎችህም በእኔ ላይ ዐመፁ። ^c c v27 የመጀመሪያው አባት የሚለው ምናልባት የእስራኤልን መሥራች ቅድመ አያት ያዕቆብን ወይም አብርሃምን ያመለክታል። ²⁸ስለዚህ የመቅደሱን መኳንንት አራከስሁ፤ ያዕቆብን ለጥፋት፣ እስራኤልንም ለስድብ አሳልፌ ሰጠሁ።”